Ձեր վստահելի աղբյուրը

«Հոկտեմբերի 28-ին կառավարության որոշմամբ Արագածոտնի մարզպետ է նշանակվել Ռազմիկ Պետրոսյանը, մամուլը հետաքրքրվել  էր և ԿԳՄՍ նախարարությունից պաշտանական տվյալ էր ստացել, որ Պետրոսյանը դիպլոմ է ստացել Հովնանյանի անվան համալսարանից 2002թ. ին, այն դեպքում, երբ այդ համալսարանը չի ունեցել անգամ  գործունեության լիցենզիա»,-կառավարության հետ հարցուպատասխանի ժամանակ հայտնեց «Հայաստան» խմբակցության պատգամավոր Արեգնազ Մանուկյանը:

Պատգամավորը հայտնեց, որ մարզպետն ու մարզպետարանը չի հերքել կեղծիքի փաստը, իսկ ԿԳՄՍ նախարարության տված պատասխանի համաձայն այդ դիպլոմն անցողիկ չէ, քանի որ գործունեության ժամանակ այն եղել է չհավատարմագրված ԲՈՒՀ:

Մանուկյանը հետքարքրվեց, թե կառավարությունը Ռազմիկ Պետոսյանին նշանակելիս չգիտեր, որ նրա կրթական ցենզը չի համապատասխանում մարզպետի պաշտոնին և ինչո՞ւ է անգամ այս հարցի բացահայտումից հետո նա շարունակում մնալ մարզպետ:

Տարածքային կառավարման և ենթակառուցվածքների նախարար Գնել Սանոսյանը բացատրեց, որ կառավարությունում պարզ ընթացակարգով ընդունում են փաստաթղթեր, որոնք այդ վարչությունները պարտավոր չեն ստուգել:

«Կառավարությունում ոչ մեկը չի ստուգում, թե 2002 թվականին որևէ բուհ լիցենզիա  ունի, այն ավարտվել է, թե ոչ»,-հայտարարեց Գնել Սանոսյանը և հավելեց՝  որ հարցն իրավական տիրույթում է և այնտեղ էլ պարզաբանում կստանա:

Արեգնազ Մանուկյանը հայտնեց, որ իր հրապարակած փաստերի հիման վրա, արդեն պետք է արագացված տեմպերով քննություն իրականացվեր և պետրոսյանը պաշտոնանկ արվեր:

Պատգամավորն ասաց, որ կարող է եզրակացնել, որ իմանալով մարզպետի պաշտոնին չհամապատասխանելու մասին, նշանակվել է, հետևաբար կա ապօրինի նշանակված մարզպետ, որը պետական բյուջեին վնաս է տալիս՝ ստանալով աշխատավարձ, հավելավճար, ծառայողական մեքենա:

«Եթե շարունակում է պաշտոնավարել, ուրեմն այս մարդը իշխանություններին պետք է ՔՊ-ին ձայներ ապահովելու համար»,-նկատեց «Հայաստան» խմբակցության պատգամավորը և հիշեցրեց, որ Նիկոլ Փաշինյանը նախկինում իր ֆեյսբուքյան էջով հայտարարել էր, որ իր անմիջական ցուցումով գործ է հարուցվել իր մերձավոր ազգականի նկատմամբ, որը կեղծ դիպլոմ էր ներկայացրել և նշանակվել «Դիլիջան» ազգային պարկի փոխտնորեն՝ գրելով. «Սա նոր Հայաստանն է, վարչապետի որևէ ազգական չի կարող վեր լինել օրենքից, կամ լինել արտոնյալ»:

«Նոր Հայաստանում ամեն ինչ ձևական ֆեյսբուքյան գրառումների համա՞ր է,  հպատ որակված քաղաքացիներին խաբելո՞ւ և լայքեր կորզելու համա՞ր է»,-հարցրեց Մանուկյանը:

Գնել Սանոսյանը հորդորեց  հարգանքով վերաբերվել Ռազմիկ Պետրոսյանի անցած ուղուն: