Ձեր վստահելի աղբյուրը

ԱԺ «Հայաստան» խմբակցությունն առաջարկում է այսօր Ազգային ժողովում լսումներ կազմակերպել գերիների, անհետ կորած զինծառայողների հարազատների մասնակցությամբ:

«Նկատի առնելով երեկվանից գերիների, անհետ կորածների հարազատների պահանջներն ու  վրդովմունքը, այսօր էլ Ազգային ժողովի հարակից տարածքում մեր հայրենակիցների հավաքը՝ առաջարակում ենք կոնսենսուսով որոշում կայացնել այսօր կառավարության հետ հարցուպատասխանից հետո անցկացնել լսում՝ հրավիրելով Նիկոլ Փաշինյանին, պաշտպանության և արտաքին գործերի նախարարներին, ԱԱԾ տնօրենին, նաև հարազատների ներկայացուցիչներին՝  հնչեցվող հարցերին պատասխաններ տալու համար»,- ԱԺ հերթական նիստի սկզբում ասաց «Հայաստան» խմբացության քարտուղար Արծվիկ Մինասյանը:

Նա նշեց, որ սա կարևոր է, որովհետև բազմաթիվ հարցեր, որոնք բարձրաձայնվում են մեր հայրենակիցների կողմից, հավանաբար քաղաքական մեծամասնությանն էլ են դիմել, շատ իրական հնարավորություն է այստեղ դրանց բոլորին պատասխաններ տալու համար:

Հիշեցնենք՝ համացանցում տեսանյութ էր հայտնել, որտեղ ԱԺ նախագահ Ալեն Սիմոնյանը մի զրույցի ժամանակ ասում է, որ «էդ գերիներն իմ համար արդեն չկան», գերիները դասալիք են։ Դրանից հետո գերիների, անհետ կորածների հարազատները  բողոքի ակցիա էին իրականացրել կառավարության մոտ: Նրանք փակել էին դեպի Հանրապետության հրապարակ տանող փողոցները՝ պահանջելով Ալեն Սիմոնյանին՝ պատասխան տալու իր հայտարարության համար: