Ձեր վստահելի աղբյուրը

«Առաջին իսկ հայացքից 2022 թ. բյուջեում ամրագրված ՀՆԱ-ի 7% աճի կանխատեսվող ցուցանիշն անիրատեսական է և դժվար հավատալի»,- ՀՀ հաջորդ տարվա բյուջեի նախագծի քննարկման ժամանակ հայտնեց Տնտեսական հարցերի մշտական հանձնաժողովի նախագահ, «Հայաստան» խմբակցության պատգամավոր Վահե Հակոբյանը:

Նա պնդեց, որ կայուն տնտեսություն և Հայաստանի նման անվտանգային լուրջ խնդիրներ չունեցող ԵԱՏՄ երկրներն իրենց բյուջեներում դրել են ՀՆԱ-ի անհամեմատ ավելի համեստ աճի ցուցանիշներ և թվարկեց դրանք՝ Ռուսաստանի Դաշնություն 2,8%, Ղազախստան 3.7%, Ղրղըզստան 4.7 %, Վրաստան 5.5 %:

Նկատելով, որ 2022թ. բյուջեով կապիտալ ծախսերը նախատեսվում է ավելացնել 130 մլրդ դրամով՝ Հակոբյանը նկատեց, որ այն արվում է ներկայիս իրողության պայմաններում, երբ գործադիրն այս տարվա կապիտալ ծախսերը շուրջ 30 %-ով չի կատարել:

«Ձեր կոլեգան՝ Վահան Քերոբյանը կանխատեսել էր 15% թռիչքաձև աճ, բայց ինչպես նշեցիք դուք, այն 5% է կազմել և, եթե նույնիսկ այսքանով փակենք տարին, համարում եմ, որ ներկայիս վիճակում լավ ցուցանիշ կլինի»,- հարցը զեկուցող Տիգրան Խաչատրյանին դիմեց Վահե Հակոբյանը՝ մեկ անգամ ևս շեշտելով, որ 7% նախատեսված տնտեսական աճն անիրագործելի է:

Տնտեսական հարցերի մշտական հանձնաժողովի նախագահը հավանական չհամարեց նաև արդյունաբերության 8% աճն այն դեպքում, երբ այնտեղ չկա դիվերսիֆիկացիա:

«Եթե հույսներդ դրել եք հանքարդյունաբերության վրա, ապա պետք է հիշեցնեմ, որ արդեն գործադիրը սահմանելէ 15% պետական տուրք հանքանյութի արտահանման համար և կառավարությունը պատրաստվում է ներկայացնել ռոյալթիի ևս մեկ բարձրացում, որը կարճաժամկետ առումով միգուցե կարող է ունենալ հարկային դրական արդյունք, բայց երկարաժամկետ առումով ունենալու ենք ոլորտի փլուզում»,- շեշտեց Վահե Հակոբյանը:

Անդրադառնալով կառավարության կողմից պարբերաբար հրապարակվող ցուցանիշին, ըստ որի՝ 2021 թվականի հունվար-հուլիսին անվանական աշխատաարձն աճել է 5,7 %-ով՝ կազմելով 197 հազար դրամ՝ Հակոբյանն ասաց. «Այս ցուցանիշը կառավարությունը շարունակ հրապարակում է և հանրությանը գցում մոլորության մեջ, բայց արդեն նոր 2022 թ. բյուջեի նախագծում ստիպված արձանագրել է, որ հուլիսին սպառողական գների ինդեքսի 6.1 % գնաճի պարագայում իրական աշխատավարձը նվազել է 0.4 %-ով: Սա 6.1 % գնաճի դեպքում, իսկ հոկտեմբերին այն արդեն կազմել է 9,1 %»:

Պատգամավորը պնդեց, որ կառավարությունը մանիպուլյացնում է հանրությանը՝ հաշվի չառնելով գնաճը և առաջարկեց բյուջեով նանխատեսված 7% տնտեսական աճի նշաձողն իջեցնել 5-5.5 %-ի: