Ձեր վստահելի աղբյուրը

ԱԺ-ում կառավարության հետ հարցուպատասխանի ժամանակ «Պատիվ ունեմ» խմբակցության պատգամավոր Աննա Մկրտչյանն ընթերցեց 2020 թ. նոյեմբերի 9-ի հայտարարության 9-րդ կետը՝ «Հայաստանը երաշխավորում է տրանսպորտային անվտանգ հաղորդակցությունը Ադրբեջանի և Նախիջևանի միջև: Այդ տրանսպորտային հաղորդակցության նկատմամբ վերահսկողությունն իրականացնելու է ռուսական ԱԴԾ-ն»:

Այնուհետև ընդդիմադիր պատգամավորը հնչեցրեց հարցը. «Սա ի՞նչ է, եթե ոչ մի քանի կոմպոնենտից բաղկացած ուղղակի միջանցք: Առաջինը՝ Հայաստանը երաշխավորում է  թշնամու  անվտանգությունն այն պարագայում, երբ մինչև հիմա մեր քաղաքացիներին մեր սուվերեն տարածքից  առևանգում, գերի են տանում, խոշտանգում ու սպանում, երկրորդ ՝ Հայաստան պետության հաշվին  տրամադրվում է ճանապարհ և այդ  ճանապարհի նկատմամբ վերահսկողություն է իրականացնելու երրորդ պետության  անվտանգային ծառայությունը: Սա ի՞նչ է, եթե ոչ միջանցք:

Հարցն ուղղվում է  բացառապես նոյեմբերի  9-ի հայտարարությունը ստորագրած, այդ թվում  հայտարարության 9-րդ կետի տակ ստորագրած անձնավորությանը»:

Նիկոլ Փաշինյանը նախ ասաց.  «Ես կարծում եմ, որ պետք է ընդհանրապես հարցը տվող  պատգամավորի քաղաքական ուժը կողմնորոշովի մի հարցում՝ ինքը մեկնաբանում է  տե՞քստը, թե՞ ինքը հաղորդում է ուրիշների մեկնաբանությունը, որ իրենց հանձնարարված է որպես սեփական մեկնաբանություն հաղորդել:

Եթե կարդում եք այդ կետը, կարդացեք, որ գրված է՝ նախ բացվում են տարածաշրջանի բոլոր տնտեսական և տրանսպորտային կապերը»:

Ն.Փաշինյանի խոսքով, տրանսպորտային հաղորդակցության նկատմամբ  հսկողությունը իրականացնում է ՌԴ Անվտանգության դաշնային ծառայություն:

«Ի՞նչ է դա նշանակում: Այսինքն… Դուք հիմա մեկնաբանում եք… Դա ամենևին այդպիսի մեկնաբանություն չունեմ, մեր բոլոր մեկնաբանությունները մանրամասն ձևակերպված են ԱԳՆ հայտարարության մեջ:

Հարցի էությանը ո՞րն է: Դուք ուզում եք ստանալ պատասխան՝ մենք միջանցքի վերաբերյալ  պայմանավորվածություն ունե՞նք, թե՞ դուք ուզում եք, որ մենք միջանցքի վերաբերյալ պայմանավորվածություն ունենանք:

Ես ձեր ասած մեկնաբանությունների հետ համաձայն չեմ: Եթե  ձեր ուզածը դա է, դա այլ խնդիր է»,- նշեց նա:

Ն.Փաշինյանն ասաց, որ մի քանի անգամ են ասել՝ պատրաստ են և շահագրգռված  տարածաշրջանային տնտեսական և տրանսպորտային կապերի բացմամբ. «Այո,  Ադրբեջանի արևմտյան շրջանները պետք է երկաթուղային և ավտոմոբիլային հաղորդակցություն ստանան Նախիջևանի ինքնավար հանրապետության հետ ՀՀ տարածքով, ՀՀ-ն էլ Ադրբեջանի տարածքով  երկաթուղային կապ Իրանի և Ռուսաստանի, ավտոմոբիլային  հաղորդակցություն Ադրբեջանի տարածքով ՌԴ հետ: Մենք կարծում ենք, որ պետք է գնանք այս տրամաբանության լուծումների և, կարծում ենք, այն, ինչ առաջարկում ենք, արձանագրել ենք ԱԳՆ հայտարարության մեջ, լիարժեք համապատասխանում է  մեր երկրի շահերին»:

«Ես այդ հռետորիկան չեմ հասկանում, որ մենք մեր բոլոր ճանապարհները  պետք է փակենք, որպեսզի ոչ մեկ մեր ճանապարհով չանցնի: Այդ տրամաբանությունը առաջ են քաշել նրանք, ովքեր ցանկացել են, որ ՀՀ-ով տրանզիտ չլինի, տրանսպորտային ուղիները փակ լինեն և այդպես շարունակ»,- ասաց Ն. Փաշինյանը:

Աննա Մկրտչյանն արձագանքեց. «Նախ, իմ քաղաքական ուժի հանձնարարականների մասով:  Ես շատ լավ հասկանում եմ, որ ձեր մոտ այդ սխեման աշխատում է,  այստեղ նստածներին սմս եք գրում, դա աշխատում է, մեզ մոտ դա չի աշխատում:

Հարգելի հայրենակիցներ, ես մեկնաբանություն չէի տալիս,  ընթերցում էի 9-րդ կետը, բառացի ասում է, որ ՀՀ տրամադրած  հաղորդակցության նկատմամբ հսկողությունն իրականացնում է  այլ ծառայություն, ոչ թե ՀՀ որևէ պետական մարմին»:

Ընդդիմադիր պատգամավորը շարունակելով խոսքը՝ ասաց. «Նախորդ մոտեցումը, որ իմ հարցերի հետ կապված որդեգրել էիք, մասնավորապես, չմոտենալ, ձեզ համար  ավելի շահեկան էր, որովհետև պատասխանի մեջ  ոչ քաղաքական, ոչ իրավական, ոչ դիվանագիտական անդրադարձ չկար, դրա համար այդ տեսանկյունից գնահատելը շատ դժվար է: Երևի թե  գեղասահքի  կանոններով գնահատելուց ուղղակի ասեմ, որ նախորդ  դեպքերում արտիստիզմը ձեր մոտ գերակշռում էր, հիմա թե արտիստիզմը, թե պատասխանի տեխնիկան ուղղակի զրոյական է»: