Ձեր վստահելի աղբյուրը

«Քանի որ օրենքով չի նախանշվում այն նպատակները, որոնց կարելի է ուղղել այդ գումարները, ապա ոչ ոք չի կարող վաղն ավագանուց պահանջել, թե ինչո՞ւ այդ գումարները չեն օգտագործում հենց հանքարդյունաբերության հետևանքներն ազդակիր համայքններում վերացնելու համար»,-խորհրդարանում հայտարարեց «Հայաստան» խմբակցության պատգամավոր Արմենուհի Կյուրեղյանը՝ ելույթ ունենալով կառավարության հեղինակած Հարկային օրենսգրքում փոփոխություններ կատարելու մասին նախագիծի վերաբերյալ:

Նախագծով նախատեսվում է հանքարդյունաբերությունից գանձվող ռոյալթիների 2%-ը տրամադրել ազդակիր համայնքներին՝ հանքարդյունաբերության բացասական ազդեցությունը մեղմելու ծրագրեր իրականացնելու համար:

Կյուրեղյանը նկատեց, որ առաջարկվող փոփոխությունը կարևոր է, քանի որ համայնքային բյուջեն ավելացվում է, ինչը կնպաստի այն խնդիրների լուծմանը, որոնք կմեղմեն նրանց վրա հանքարդյունաբերության բացասական ազդեցությունը:

Պատգամավորն առաջարկեց օրենքով սահմանել այն նպատակները, որոնց պետք է ուղղված լինեն այդ միջոցները:

«Հակառակ դեպքում ստացվում է, որ կառավարությունը փորձում է ամեն մի նոր հնարավորությունն օգտագործել ՏԻՄ-երի նկատմամբ ազդեցությունը մեծացնելու համար»,- հայտնեց ընդդիմադիր պատգամավորը և նկատեց, որ իշխանությունների այս վարքագիծը հասկանալի է՝ հատկապես, որ վերջին ՏԻՄ ընտրությունների արդյունքում իշխող ուժն էապես նվազեցրել է իր քվեների թիվը՝  ինչքան էլ ՔՊ ներկայացուցիչները փորձեն դրանք իրենց հաղթանակը ներկայացնել:

Արմենուհի Կյուրեղյանը բերեց ՔՊ-ի սիրած Իջևանի և իր սիրած Վանաձորի ՏԻՄ ընտրությունների արդյունքները, ըստ որոնց՝ Իջևանում ՔՊ-ն նախորդ ընտրություններում ստացել էր 5900 ձայն, իսկ վերջինում՝ 3200 քվե, իսկ Վանաձորում 25900-ից հասել են 8200-ի՝ նվազելով 68 %-ով:

«Ինչքան էլ ասեք, որ հաղթել եք, դուք պարտվում եք օր-օրի և դիմադրության շարժումը մեծանում է, և եթե դուք սա ներկայացնում եք ժողովրդավարության հաղթանակ, ապա եկեք արձանագրենք, որ ժողովրդավարության հաղթանակը սկսվում է ՏԻՄ-երից ձեր՝ իշխանական ուժի դուրսվռնդումով և այն մեծ թափ է հավաքելու»,- հայտարարեց Կյուրեղյանը: