Ձեր վստահելի աղբյուրը

«Խոսքի ազատությունը ենթադրում է տեղեկություններ փնտրելու և գտնելու ազատությունը, մինչդեռ մենք լրատվամիջոցի վրա դնում ենք հետախուզա-ԱԱԾ-ական պարտականություններ՝ իմաստազրկելով Սահմանադրության 42-րդ հոդվածից ածանցվող տեղեկություններ փնտրելու և ստանալու բուն էությունը»,- ԱԺ-ում հայտնեց «Հայաստան» խմբակցության պատգամավոր Լիլիթ Գալստյանը՝ ներկայացնելով «Զանգվածային լրատվության մասին» օրենքում փոփոխություններ և լրացումներ կատարելու մասին օրենքի նախագծի վերաբերյա իր տեսակետը։

Պատգամավորը պնդեց, որ նախագիծն առանց հիմնավորման է և բխում է իշխող ուժի՝ երկրում վախի մթնոլորտ ստեղծելու և համատարած վերահսկողություն սահմանելու նկրտումներից։

«Առաջարկվող փոփոխությունը նախատեսում է պատասխանատվություն նույնականացման տվյալներ չունեցող աղբյուրներին հղում տալու դեպքում և այն պարագայում, երբ լրատվամիջոցների փոխանցած տեղեկատվությունն ապօրինի խոսք է պարունակում»,- նախագիծը ներկայացրեց համահեղինակ, ՔՊ պատգամավոր Թագուհի Ղազարյանը:

Նախագծի համահեղինակներն են նաև նույն խմբակցության պատգամավորներ Արթուր Հովհաննիսյանը, Վահագն Հովակիմյանը, Սարգիս Խանդանյանը:

ՔՊ խմբակցության պատգամավորը հավաստիացրեց, որ այն խոսքի ազատության սահմանափակում չէ, այլ դրանով ընդամենը նույնականացման տվյալներ չունեցող աղբյուրները համարվում են անանուն աղբյուրներ և դրանց լուրերը հրապարակելը պատժվելու է օրենքով:

Նախագիծը պաշտպանեց նաև կառավարության ներկայացուցիչ՝ արդարադատության նախարար Կարեն Անդրեասյանը:

«Այսօր խոսքի ազատության որոշակիորեն սահմանափակման դիրքերից ելույթ էր ունենում Կարեն Անդրեասյանը, որը շատ ավելի երկար ժամանակ հանդես է եկել խոսքի ազատության պաշտպանելու դիրքերից»,- իր ելույթում արձանագրեց «Հայաստան» խմբակցության պատգամավոր Արամ Վարդևանյանը և հիշեցրեց, որ1971 թվականին անգլիական «Սանդեյ թայմս» օրաթերթը գաղտնի լուր էր հրապարակել, որը վերաբերում էր մի կարևոր ընկերության խոշոր գործարքի։ Այն առնչվում էր հազարավոր մարդկանց, և այն այդ պահին դիտարկվել էր որպես զրպարտություն ու օրվա իշխանությունն դ համարել էր խախտում, բայց 10 տարի անց Եվրոպական դատարանն այդ որոշումը համարել էր խոսքի ազատության խախտում:

«Հայաստան» խմբակցության մյուս պատգամավորը՝ Լիլիթ Գալստյանը տեղեկացրեց, որ «Ինֆորմացիայի ազատության կենտրոնի» կողմից ԱԺ-ն ճանաչվել է տեղեկատվության ազատությանը սպառնացող և լրագրողների իրավունքները սահմանափակող պետական կառույց:

«Մեր և լրագրողական համայնքի կարծիքով ներկայացված նախագիծը ռեպրեսիվ է, խաթարելու է Հայաստանի Հանրապետության խոսքի ազատությունը և տեղեկատվության հասանելիության իրավունքը»,- ասաց Գալստյանը:

Նա նաև շեշտեց, որ ՔՊ պատգամավորները նախագիծը քննարկման են դրել առանց շահառու լրատվամիջոցների հետ քննարկման, իսկ երբ «Հայաստան» խմբակցությունն է ԱԺ-ում այդ նախագծի վերաբերյալ հանրային քննարկում կազմակերպել, օրինագծի հեղինակները չեն բարեհաճել մասնակցել դրան:

Գալստյանը գտնում է, որ այն խնդրահարույց է մարդու իրավունքներ միջազգային պրակտիկայի և Սահմանադրության տեսանկյունից։

«Չնույնականացվող աղբյուրն, ըստ էության, նույնական է անանուն աղբյուրի հետ և լրատվամիջոցի իրավունքների դաշտում է որոշում կայացնել և այս կամ այն լուրի առնչությամբ հղում անել»,- ասաց «Հայաստան» խմբակցության կին պատգամավորը:

Օրինագծի հեղինակները և արդարադատության նախարարը պնդեցին, որ այն պետք է ընդունվի: