Ձեր վստահելի աղբյուրը

«Նախագծի ընդունման անհրաժեշտությունը պայմանավորված է ՎԶԵԲ-ի աջակցությամբ իրականացվող Գյումրու քաղաքային ճանապարհների ծրագրի շրջանակներում կապալառու և մատակարար կազմակերպությունների հետ կնքված երեք պայմանագրով 2021 թվականին ստանձնած պարտավորությունների ամբողջ ծավալով կատարման համար»,-կառավարության նիստում հայտարարեց տարածքային կառավարման և ենթակառուցվածքների նախարար Գնել Սանոսյանը:

Վերջինս զեկուցեց 2021թ ՀՀ պետական բյուջեում հերթական վերաբաշխում նախատեսող նախագիծը:

Նախարարը տեղեկացրեց, որ Տարածքային կառավարման և ենթակառուցվածքների նախարարության «Գյումրու քաղաքային ճանապարհներ» ծրագրի շրջանակներում շենքերի և շինությունների  կապիտալ վերանորոգման, և մեքենաների և սարքավորումների ձեռքբերման նպատակով 948 մլն դրամ  է անհրաժեշտ հատկացնել։

Ըստ Սանոսյանի՝ «Գյումրու քաղաքային ճանապարհներ» ծրագիրն երկու բաղադրիչ ունի՝ փողոցների բարեկարգում և էներգախնայող արտաքին լուսավորության ցանցի ստեղծում:

Նրա խոսքով՝ ծրագրի ընդհանուր գումարը 23.84 մլն եվրո է, ծրագրի շինարարական աշխատանքները սկսվել են 2019 թ.-ից և կշարունակվեն մինչև 2022 թ-ն:

Նախարարը հայտնեց, որ 15.4 մլն եվրոն ուղղված է ճանապարհների, փողոցների և հարակից ենթակառուցվածքների հիմնանորոգմանը, 6.5 մլն եվրոն նախատեսված է արտաքին լուսավորության ցանցի համար::

Գնել Սանոսյանի ներկայացմամբ՝ նախատեսված է 26 կմ ճանապարհների ասֆալտապատում, որն ընդգրկում է Գյումրիի 37 փողոց՝ իրենց բոլոր ենթակառուցվածքներով, նաև դրանց լուսավորության ցանցի փոփոխման ծրագրեր:

Նա հավաստիացրեց, որ 2022 թ.  նախատեսված ճանապարհների 26 կիլոմետրն ավարտված կլինի, ինչպես նաև երեք հրապարակները ու լուսավորության ամբողջ ցանցը ձևավորված կլինի: