Ձեր վստահելի աղբյուրը

«Նախորդ գումարման Ազգային ժողովն իր վերջին շնչում՝ 2021 թ․ հուլիսի 30-ին ընդունել է օրենք ծանր վիրավորանքի քրեականացման վերաբերյալ, և այդ օրենքը արդեն իսկ գործում է։ Այդ օրենքը լրջագույն խնդիրներ ունի Սահմանադրության և մարդու իրավունքների ազատության ու պաշտպանության կոնվենցիայի հետ»,- Աժ-ում ՀՀ Քրեական օրենսգրքում փոփոխություն կատարելու մասին և ՀՀ Քրեական դատավարության օրենսգրքում փոփոխություն կատարելու մասին օրենքների նախագծերի  փաթեթն առաջին ընթերցմամբ ընդունելու հարցի քննարկմանն ասաց Հայաստան» խմբակցության պատգամավոր Աղվան Վարդանյանը:

Նա նշեց, որ վիրավորանքի քրեականացումը որևէ իրավաչափ նպատակ չի հետապնդել, իրականում ունեցել է մեկ նպատակ` քրեաիրավական միջոցների գործադրման սպառնալիքով սահմանափակել ազատ խոսքը, հրապարակային քննադատությունը, հատկապես հանրային պաշտոն զբաղեցնող քաղաքական անձանց դեպքում։

«Մինչդեռ ՄԻԵԴ-ը բազմիցս նշել է, որ խոսքի ազատությունը կարող է լինել ոչ միայն ընդունելի խոսքը, այլ նաև այն արտահայտությունները, որոնք կարող են ցնցող, վիրավորական կամ վրդովեցուցիչ համարվել որոշ մարդկանց կողմից։

Սա իրականում օրենք է մեկ մարդու, մեկ անձի դեմ  քննադատությունը սահմանափակելու, պատժելու քրեական գործեր հարուցելու վերաբերյալ։ Վստահ եղեք, որ այդ բոլոր  քրգործերը վերաբերում են հենց այդ մեկ մարդուն և ընդդիմության նկատմամբ կատարված որևէ արտահայտությունների պարագայում իրավական հետևանքներ չեն առաջացրել»,- ասաց Ա.Վարդանյանը։

Ընդդիմադիր պատգամավորի խոսքով,  օրենքի կիրառման դեպքում հնարավոր են կամայական մոտեցումներ։

«Պարզ չէ նաև, թե այս օրենքում հասարակական գործունեության բնագավառներից ինչու են առանձնացրել միայն լրագրողական և  հրապարակախոսական գործունեությունները»,- նշեց նա:

Ա. Վարդանյանի խոսքով, ակնհայտ է, որ նույն արարքի համար չի կարելի միաժամանակ քրեական և քաղաքացիական գործեր հարուցել։

«Այս օրենքը արդեն իսկ արձագանք է գտել միջազգային հանրության շրջանակում, ՄԻՊ-ն այս օրենքի սահմանադրականությունը վիճարկել է ՍԴ-ում, իսկ «Freedom house» իրավապաշտպան կազմակերպությունը կոչ է արել անհապաղ դադարեցնել հակասահմանադրական օրենքի կիրառումը»,- հիշեցրեց նա՝ զգուշացնելով, որ առաջիկայում այս կարգի հայտարարությունները շատ ավելին են լինելու, նկատում է, որ հայաստանյան  խոսքի և մամուլի ազատության մի շարք ՀԿ-ներ, որոնք մահաքնի մեջ էին վերջին երեք տարիներին, արթնացել են, և նրանք ևս այս ուղղությամբ աշխատելու են այս օրենքի անթույլատրելիության մասին խոսելով։

Աղվան Վարդանյանը վստահեցրեց, որ այս օրենքն իր նպատակին չի ծառայելու։

«Մերժելով հայհոյանքը, հայհոյախոսությունն ընդհնարապես, պետք է ոչ թե սպառնալիքով սա դադարեցնել, այլ պետք է օրինակ ծառայենք։ Ինչպես երկրի բարձրագույն պաշտոնյաներն են իրենց պահում, հասարակությունն էլ իրեն այդպես է պահելու։

Մի մտածեք, որ  մեր քաղաքացիները ձևերը չեն գտնելու իրենց գնահատականը տալու համապատասխան պետական պաշտոնյաներին: Սրանով մենք այդ քննադատությունը, մտածողությունը ոչ թե արմատախիլ ենք անում, այլ տեղափոխում ենք մարդկանց մտքերի մեջ, մարդիկ տասնյակ ուրիշ ձևերով կարողանալու են իրենց գնահատակնները տալ։

Այս օրենքով Հայաստանն ակնհայտ հետընթաց է ապրում, ձեր սիրած նախկին իշխանությունները ապաքրեականացրել էին այս վիրավորանքի հոդվածները, դուք եկել եք և վերադառնում եք նախկին վիճակին։ Ժողովրդավարության բաստիոնը ակնհայտ հարձակում է գործում խոսքի ազատության, մամուլի ազատության և մարդկանց կարծիքների ազատության վրա»,- ասաց «Հայաստան» խմբակցության պատգամավոր Աղվան Վարդանյանը: 

«Հայաստան» խմբակցությունն Հայաստանի Հանրապետության քրեական օրենսգրքում փոփոխություն կատարելու մասին նախագծով առաջարկում է Քրեական օրենսգրքի 137.1-ին հոդվածն ուժը կորցրած ճանաչել:

«Այս հարցում հապաղումը ոչ միայն էապես վտանգելու է ժողովրդավարությունը Հայաստանի Հանրապետությունում, ժողովրդավարական հաստատությունների գործունեությունը, այլև դրա կիրառումն անխուսափելիորեն հանգեցնելու է պետության պարտությանը ՄԻԵԴ-ում, ինչն էլ իր հերթին հանգեցնելու է հարկատուների հաշվին գոյացող պետական միջոցներից փոխհատուցման տրամադրմանը»,- նշված է նախագծի հիմնավորման մեջ: