Ձեր վստահելի աղբյուրը

«Գործընթացը, որ տեղի էր ունեցել մեր գործընկերների կալանավորման հետ, հակասահմանադրական էր: Ակնկալել որևէ այլ որոշում, կնշանակեր, որ Հայաստանում ընդհանրապես չի գործում Սահմանադրությունը, ՀՀ-ն, որ հռչակված է իրավական պետություն, ամենևին որևէ աղերս չունի իրավական պետության հետ»,- լրագրողների հետ զրույցում ասաց «Հայաստան» խմբակցության պատգամավոր Էլինար Վարդանյանը` խոսելով Սահմանադրական դատարանի որոշման մասին պատգամավորների անձեռնմխելիության վերաբերյալ, որի հիմքով քիչ առաջ ազատ արձակվեցին «Հայաստան» խմբակցության պատգամավորներ Արմեն Չարչյանը, Արթուր Սարգսյանն ու Մխիթար Զաքարյանը:

Նա ընդգծեց, որ մինչ այդ տեղի ունեցած գործընթացներն իսկապես հակաիրավական էին և ՍԴ այս որոշումը եկավ ևս մեկ անգամ փաստելու, որ մինչ այս իրենց գործընկերները կալանքի տակ են եղել բացառապես քաղաքական որոշման արդյունքում, եղել է քաղաքական հետապնդում:

Էլինար Վարդանյանը չբացառեց, որ դատախազությունը կարող է միջնորդություն ներկայացնել կալանավորված պատգամավորներին անձեռնմխելիությունից զրկելու պահանջով՝ հաշվի առնելով մինչ այս տեղի ունեցած հակաիրավական գործողությունները:

«Պետք է մեկ բան արձանագրենք, որ քրեական դատավարության կարգավորումներին համապատասխան կալանքի միջնորդություն ներկայացնելուց պետք է հիմնավորվի, թե ինչ նոր ի հայտ եկած հանգամանք կա, որով պայմանավորված այդ անձինք պետք է վերցվեն կալանքի: Մինչդեռ այս պահին այդպիսի հանգամանք գոյություն չունի»,- ասաց Էլինար Վարդանյանը։