Ձեր վստահելի աղբյուրը

«Այնպես չէ, որ Սահմանադրական դատարանը հատուկ նորարարություն է կատարել, վերարտադրել է Սահմանադրության 96-րդ հոդվածը, դրա մասին գիտեին բոլորը, առնվազն պարտավոր էին իմանալ դրա մասին իրավապահները»,- ԱԺ-ում լրագրողների հետ զրույցում ասաց ԱԺ «Հայաստան» խմբակցության պատգամավոր Արամ Վարդևանյանը:

Դեկտեմբերի 9-ին Սահմանադրական դատարանը ՀՀ Ազգային ժողովի պատգամավորների ընդհանուր թվի առնվազն մեկ հինգերորդի դիմումի հիման վրա` ՀՀ քրեական դատավարության օրենսգրքի 31-րդ հոդվածի 1-ին մասի 3-րդ կետի, 295-րդ հոդվածի 1-ին մասի երկրորդ պարբերության՝ Սահմանադրությանը համապատասխանության հարցը որոշելու վերաբերյալ որոշում է կայացրել։ Սահմանադրական դատարանը արձանագրել է, որ անազատության մեջ գտնվող պատգամավորի կարգավիճակ չունեցող անձը պատգամավորի կարգավիճակ ձեռք բերելու պահից, չի կարող պահվել անազատության մեջ։

Հիշեցնենք, որ «Հայաստան» խմբակցության երեք պատգամավոր՝ Արմեն Չարչյանը, Մխիթար Զաքարյանն ու Արթուր Սարգսյանը, կալանավորված են: 

Ա.Վարդևանյանը նշեց, որ մի քանի անգամ կրկնել է ՍԴ համապատասխան հոդվածը, բայց անտեսվել է. «Անտեսվել է  նրա համար, որ մեր գործընկերներին այսքան ամիս խայտառակ ապօրինի կերպով պահեն կալանավորված»:

Ա. Վարդևանյանի խոսքով, ՍԴ-ի որոշումից հետո այլ կարծիք չի կարող լինել և պատգամավորները պետք է ազատ արձակվեն:

«ՍԴ-ն ասում է՝ մեր երեք գործընկերները պատգամավորներ են, հետևաբար եթե պատգամավոր են, չեն կարող լինել կալանավորված բացառությամբ ԱԺ համաձայնությամբ:
Սահմանադրական դատարանի որոշումը պարտադիր է բոլորի համար, մանևրելու տեղ բացարձակ չկա»,- ասաց պատգամավորը:

Արամ Վարդևանյանի խոսքով, բոլոր այն դատավորների հետ կապված, որոնք այդ խայտառակ դատական ակտերը կայացրել են, պատգամավորներին պահել կալանավորած, հետևանքներ լինելու են:

«Օրենքով սահմանված բոլոր միջոցները ձեռնարկվելու են, որովհետև Հայաստանում չպետք է  լինեն դատավորներ, որոնք Սահմանադրության տարրական կանոնները չեն տիրապետում»,- ասաց ընդդիմադիր պատգամավորը:

Արամ Վարդևանյանն ասաց, որ միջազգային կազմակերպություններից բոլորին այս պարզ ճշմարտությունը ներկայացվել էր՝ պատգամավորներն անձեռնմխելի են, բայց «Հայաստան» խմբակցությունից երեք պատգամավոր չեն կարողանում գնալ, մասնակցել նիստերին, ինչպես բոլոր մնացած պատգամավորները, քանի որ գտնվում են «Վարդաշեն» ՔԿՀ-ում:

«Միջազգային կազմակերպություններից ոչ ոք ոչ մի գործողություն չձեռնարկեց, առնվազն ես ոչ մի հրապարակային հայտարարություն չտեսա: Սա ցավ է, խոսում է  այն մասին, որ գտնվում ենք իրավական  տեսանկյունից շատ վտանգավոր, ծայահեղ վտանգավոր և բարդ դրության մեջ»,- ասաց «Հայաստան» խմբակցության պատգամավորը:

Նա նշեց, որ ՍԴ-ի որոշման տեքստից հասկանալի է, որ որոշ հարցերի չի կարողացել  ամբողջությամբ անդրադառնալ, պարզ է՝ ճնշումը եղել է:

Ինչ վերաբերում է իրավապահ համակարգի հնարավոր հետագա քայլերին, Արամ Վարդևանյանն ասաց. «5 ամիս մարդկանց ապօրինի կալանավորելուց հետո էլ ինչ պետք է անեն, իրավունքների խախտման էլ ի՞նչ ախորժակ ունենա: Արմեն Չարչյանին ոչ միայն 5 ամիս կալանավորել են, նաև առողջությունն են քայքայել: Էլ ավելի ի՞նչ են ուզում: Բոլորս հասկանում ենք, որ սա բռնապետություն է, որի դեմ ամեն օր պայքարում ենք և պայքարելու ենք»: