Ձեր վստահելի աղբյուրը

«Մենք դեմ չենք խաղաղությանը և սահմանագծմանը, սակայն այսօր պայմանները գոյություն չունեն»,- ԱԺ-ում ճեպազրույցում ասաց «Հայաստան» խմբակցության ղեկավար Սեյրան Օհանյանը:

Նա նշեց, որ թուրք-ադրբեջանական տանդեմի և նրանց ռազմավարական գործընկերոջ կողմից  ճնշումները ՀՀ նկատմամբ շարունակվում են և դա արտահայտվում է ոչ միայն հռետորաբանությամբ, հայատացությամբ, այլ նաև ՀՀ սահմաններին տիրող իրավիճակով. «Փաստացի իրենք  ներխուժել են մեր սահմաններ, ռազմավարական բարձունքներ, ճանապարհներին են կանգնել ու վերահսկում են, այսօրվա իշխանությունների կառավարման օրոք Հայաստանի տարածքում մի կետից մյուս կետը գնալու համար անցնում ենք Ադրբեջանի տարածքով:  Սա անընդունելի է մեզ համար»:

Ս.Օհանյանի խոսքով, սահմանագծման և սահմանազատման գործընթացը որևէ կերպով չպետք է վնաս հասցնի Արցախի ինքնիշխանության հարցին:

«Ընդունելով խաղաղության պայմանները՝ ճանաչում ենք Ադրբեջանի տարածքային ամբողջականությունը, իսկ դա նշանակում է մի մեծ քար նետել Արցախի ճակատագրի վրա։

Մեր մյուս պնդումը կայանում է նրանում, որ արագ կերպով պետք է միջոցներ ձեռնարկել բանակի, ուժային կառույցների վերականգնման, վերազինման սահմանների ամրապնդման համար, մեր ռազմավարական գործընկերների հետ քաղաքականության հստակեցման ուղղությամբ»,- ասաց ընդդիմադիր խմբակցության ղեկավարը:

Խոսելով ռազմագերիների նկատմամբ քրեական գործեր հարուցելուն, Ս.Օհանյանն. «ԶՈւ համազորային կանոնադրությունների մեջ նշված է, թե զինծառայողները ինչպիսի իրավունքներ, պարտականություններ և պատասխանատվություն ունեն նաև մարտական գործողությունների ժամանակ։ Այնտեղ նշված է, որ զինծառայողները պետք է իրենց պարտքը մինչև վերջ կատարեն, ղեկավար կազմը պետք է ապահովի պարտականությունների կատարումը, այնտեղ նշված է նաև, թե որոնք են գերության պայմանները:

Այս իրականության մեջ պետք է ուսումնասիրվեն, թե որոնք են այն պայմանները, որոնցում զինծառայողները հայտնվել են գերության մեջ։ Առաջին հերթին բարոյական նորմ է, որպեսզի պատասխանատվություն կրեն պետական և ռազմական կառավարման համակարգում գտնվող այն անձինք, որոնք ստեղծել են այդ գերության պայմանները։ Առաջին հերթին պետք է քննեն, պատասխանատության համապատասխան քայլեր իրականացնեն այն մարդկանց նկատմամբ, որոնք ստեղծել են այդ պայմանները, որ մարդիկ գերի ընկնեն:

Այսօր, երբ վերլուծում ենք ստեղծված իրավիճակը, մենք ունենք ժողովրդի մեծ զանգված, որ գերի է մեկ մարդու ապիկար կառավարմանը և ունենք մեկ մարդ` կառավարության ղեկավարը, որ գերի է Ալիևին, կատարում է  նրա կամքը, նրա ճնշման ներքո է գտնվում»,- ասաց Օհանյանը։

Ինչ վերաբերում է իր անշարժ գույքի վրա կալանք դնելուն՝ Ս. Օհանյանն ասաց, որ իրեն հրավիրել են դատախազություն, բայց ԱԺ քառօրյա նիստերի ընթացքում զանգահարել ու տեղեկացրել է, որ հետո կներկայանա:

«Այն, ինչ հայտարարագրել եմ, այդքանն էլ ունեմ, չգիտեմ՝ ինչ գույքի վրա են կալանք դրել»,- ասաց «Հայաստան» խմբակցության  ղեկավարը: