Ձեր վստահելի աղբյուրը

Նիկոլ Փաշինյանի անվտանգության պետի ժամանակավոր պաշտոնակատար, ԱԱԾ սպա, բաժնի պետ Հովհաննես Գևորգի Վարդանյանն այսօր Երևանի ընդհանուր իրավասության դատարանի Շենգավիթ նստավայրում վկայի կարգավիճակով ցուցմունք տվեց «իկրայի գործով»։ 

Նա ասաց, որ ծանուցում չի ստացել, իր՝ «բերման ենթարկելու» դատարանի որոշման մասին տեղեկացել է լրատվամիջոցներից, չի ճանաչում այս գործով ամբաստանյալ Նարեկ Սամսոնյանին։

Դատավոր Արտուշ Գաբրիելյանը նրան հիշեցրեց, որ Հ. Վարդանյանին երեք անգամ ծանուցում է ուղարկվել, մինչդեռ նա չի ներկայացել։ Գաբրիելյանը նախազգուշացրեց, որ վկան պետք է կեղծ ցուցմունք չտա, ապա հորդորեց պատմել, թե ինչ գիտի այս գործի մասին։

«Գործի մասին տեղեկացել եմ լրատվամիջոցներից։ Գրել են, որ անվտանգության աշխատակիցները գնացել են, գնել են իկրա։ Դա մեր գործառույթների հետ կապ չունեցող պրոցես է եղել։ Բացառում եմ նման բան միանշանակ։ Նման հրահանգ չենք ստացել, նման հրահանգներով իմ աշխատակիցները չեն ուղղորդվել»,- ասաց Հ. Վարդանյանը՝ նշելով, որ դեմ չէ իր ցուցմունքի հրապարակմանը։

Հարցին, հնարավո՞ր է՝աշխատակիցները գնել են, ինքը տեղյակ չէ, Վարդանյանը պատասխանեց՝ բացառում է, քանի որ իր աշխատակիցներն ամեն ինչի մասին պատշաճ զեկուցել են իրեն, ինչպես կարգն է։

Սամսոնյանի պաշտպան Ռուբեն Մելիքյանը հարցրեց՝ Վարդանյանի՝ ԱԱԾ համակարգում աշխատելուց՝ 2003-ից ի վեր, եղե՞լ է հանձնարարություն, որը չի մտնում նրա ծառայողական պարտականությունների մեջ, բայց նա կատարել է։

«Թույլ տվեք այդ հարցին չպատասխանել»,- նշեց Վարդանյանը։

Դատավորն էլ հիշեցրեց, որ վկան իրավունք չունի հրաժարվել հարցերին պատասխանելուց։
«Ոչ օրինաչափ հրահանգներ երբեք չեմ ստացել իմ ծառայության ընթացքում»,- ասաց Վարդանյանը։

Մելիքյանը հետաքրքրվեց՝ արդյոք եղել են դեպքեր, երբ նա կատարել է անվտանգության  ապահովումից դուրս որևէ բան, օրինակ, ներողություն խնդրեց ու նշեց, «անձրևանոց պահել»։

«Անձրևանոց պահելն աշխատանքի պրոցես է։ Պարտադիր չէ, որ անձրևանոցը դիտարկվի հենց անձրևանոց։ Թույլ տվեք, այդ հարցին էլ չպատասխանել՝ զուտ  ծառայողական անհրաժեշտությունից ելնելով, հենց անձրևանոց պահելու նպատակը»,- ասաց նա։

Վարդանյանը նշեց, եթե իր աշխատակիցները կատարել են որևէ բան, որ իրենց իրավասության մեջ չի մտնում, ծառայողական քննության արդյունքում ենթարկվել են պատասխանատվության, հիշեցրեց՝ իրենք ապահովում են անձի անվտանգությունը։

Մելիքյանը հարցրեց, եթե հանձնարարություն տրվի, գնալ մի իր բերել, ինչպե՞ս կգնահատի, այն մտնո՞ւմ է ծառայողական պարտականությունների մեջ, թե՞ ոչ։

«Ըստ անհրաժեշտության, տեղին լինելու կարգավիճակից ելնելով»,- ասաց Վարդանյանը։

Մելիքյանը հայտարարեց այլ հարցեր չունի։

Այսօրվա դատական նիստին ներկայանալու համար ծանուցում էին ստացել 5 վկա, ևս երկուսի նկատմամբ հարկադրանքի միջոց կիրառելու որոշումներ էր կայացվել, սակայն դատական նիստին ներկայացել է վկաներից միայն Հովհաննես Վարդանյանը։

Դատարանը հաջորդ դատական նիստին ներկայանալու համար որոշում կայացրեց բոլոր վկաների նկատմամբ հարկադրանքի միջոց կիրառելու և բերման ենթարկելու մասին։ Հաջորդ դատական նիստը հետաձգվեց մինչև 2022թ մարտի 7-ը, ժամը՝ 12։30-ն։