Ձեր վստահելի աղբյուրը

Բարձրագույն դատական խորհուրդը քննում է Երևան քաղաքի ընդհանուր իրավասության դատարանի դատավոր Զարուհի Նախշքարյանին կարգապահական պատասխանավարության ենթարկելու միջնորդությունը: Միջնորդությունը ներկայացրել է արդարադատության նախարարությունը: Այս վարույթը հարուցվել է դատավորի դեմ Հանրային խորհրդի նախկին նախագահ Ստոյպա Սաֆարյանի դիմումի հիման վրա:

Մինչ միջնորդության քննությունը, ԲԴԽ անդամ Անի Մխիթարյանը հայտարարեց ինքնաբացարկ հայտնելու մտադրության մասին։ Խորհրդակցական սենյակում դատարանը որոշեց բավարարել ինքնաբացարկի միջնորդությունը։

ԲԴԽ անդամ Մեսրոպ Մակյանը նույնպես բարձրաձայնեց ինքնաբացարկի հիմքերի մասին՝ նշելով, որ հայց էր ներկայացրել՝ գումարի բռնագանձման պահանջի մասին, որը դատավոր Նախշքարյանի կողմից բավարարվել է, հետևաբար, օբյեկտիվ դիտորդի մոտ կարող են կասկածներ լինել՝ իր անկողմնակալության վերաբերյալ:

ԲԴԽ֊ն մերժեց Մակյանի ինքնաբացարկի միջնորդությունը։ 

Զարուհի Նախշքարյանի ներկայացուցիչ Սիրանուշ Սահակյանը բացարկի միջնորդություն ներկայացրեց  ԲԴԽ իրավաբան անդամ Լիպարիտ Մելիքջանյանին:

«Կան որոշակի փաստեր, որոնք  կասկածի տակ են դնում նրա անկողմնակալությունը: Մասնավորապես, պարոն Լիպարիտ Մելիքջանյանը  ընտրվել է նախկին քաղաքական ուժի կողմից: Բոլոր գիտնական անդամները անբացատրելի պայմաններում հրաժարականներ էին տվել, բացի նրանից: Միակ բացատրությունը մեզ համար դա նոր քաղաքական ուժի խաղի կանոններն ընդունելն է,  հակառակ պարագայում անբացատրելի է, թե ինչու նախկին անդամները որոշակի հանգամանքների ներքո հրաժարականներ էին  տալիս, նրանց փոխարինում էին  նոր քաղաքական ուժին պատկանող թեկնածուները»,- ասաց նա:

Նա նշեց, որ Լ.Մելիքջանյանը եղել է «Ելք» դաշինքի թեկնածու, այս ընթացքում առնչվել է «Իմ քայլը» քաղաքական ուժի ղեկավարի հետ: Բացի այդ, ըստ Ս.Սահակյանի, Մելիքջանյանը Նիկոլ Փաշինյանի հետ նույն դպրոցն է հաճախել, դպրոցական տարիներին շփվել են։ 

ԲԴԽ-ն խորհրդակացական սենյակից վերադառնալով՝ հայտարարեց, որ մերժել են բացարկի միջնորդությունը, ԲԴԽ նախագահի պաշտոնակատար Գագիկ Ջհանգիրյանն ասաց, որ Փաշինյանը և Մելիքջանյանը չեն հաճախել նույն դպրոցը։

Հիշեցնենք, որ Բարձրագույն դատական խորհուրդը Երևան քաղաքի ընդհանուր իրավասության դատարանի դատավոր Զարուհի Նախշքարյանի վերաբերյալ արդեն երկու կարգապահական վարույթով որոշում կայացրել է. ԲԴԽ-ն  միջնորդություններից մեկը մերժել էր, իսկ մյուսով՝ «Իկրայի գործով», կիրառել խիստ նկատողություն։

Զարուհի Նախշքարյանին արդարադատության նախարարությունը մեղադրում է այն բանի համար, որ Նիկոլ Փաշինյանի դստեր հայցով քննվող մի քաղաքացիական «Իկրայի գործի» շրջանակներում ինքնաբացարկ չի հայտնել՝ այն պայմաններում, երբ ժամանակին քննադատել է հայտնի «վնգստացող դատավորներ» արտահայտությունը։

ԲԴԽ անդամներ Մխիթարյանն ու Չիչոյանը դեմ էին  քվեարկել ԲԴխ որոշմանը, իսկ  Մակյանն ու Մխիթարյանը հատուկ կարծիք են ունեցել։

Այսօրվա նիստում Մ.Մակյանն ասաց, որ հատուկ կարծիքը ներկայացնելու ժամկետը սպառված չէ. «Բայց ընդամենը երկու բառով կարող եմ բարձաձայնել. իմ կարծիքը եղել է այն, որ այդ կարգապահական խախտման համար դատավորի նկատամբ խիստ նկատողություն կիրառելը խիստ պատժի միջոց է»: