Ձեր վստահելի աղբյուրը

«Երեմյան փրոջեքթս» ընկերությանը պատկանող «Բուրգըրի» ռեստորանում, «Տաշիր Պիցցա» ցանցի կետերում, Տաթև դպրոցում արձանագրված թունավորումների դեպքերով հարուցվել են քրեական գործեր։ Այս մասին Panorama.am-ին հայտնեցին ոստիկանությունից՝ ավելացնելով, որ քրեական գործերն ուղարկվել են քննչական կոմիտե։

Ոստիկանության հասարակայնության հետ կապերի և լրատվության բաժնից Panorama.am-ի հարցերին ի պաասխան այդպես էլ հստակ պատասխան չհնչեց, թե որ դեպքով Քրեական օրենսգրքի որ հոդվածի հատկանիշներով են հարուցվել քրեական գործեր։

«Կամ 277 հոդվածի հատկանիշներով, կամ՝ 279 հոդվածի»,-ասացին ոստիկանությունից՝ ողջ օրվա ընթացքում չհստակեցնելով  հոդվածը։

Քննչական կոմիտեից Panorama.am-ի հետ զրույցում հաստատեցին միայն «Տաշիր պիցցա»-ի թունավորումների փաստով հարուցված քրեական գործի առկայությունը։ Այլ մանրամասներ իրավապահ այս մարմնից էլ չհայտնեցին։

Նշենք, որ Քրեական օրենսգրքի 277 հոդվածը վերաբերում է  Սանիտարահակահամաճարակային կանոնները խախտելուն.  «Սանիտարահակահամաճարակային կանոնները խախտելը, որն անզգուշությամբ առաջացրել է մարդկանց զանգվածային հիվանդացում կամ թունավորում՝ պատժվում է տուգանքով` նվազագույն աշխատավարձի առավելագույնը երկուհարյուրապատիկի չափով, կամ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով, կամ ազատազրկմամբ` առավելագույնը երեք տարի ժամկետով»։

Քրեական օրենսգրքի 279 հոդվածը վերաբերում է անվտանգության պահանջներին չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելուն։ Այն սահմանում է. «Սպառողների կյանքի կամ առողջության անվտանգության պահանջներին չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելը կամ նշված ապրանքների, աշխատանքների կամ ծառայությունների` անվտանգության պահանջներին համապատասխանությունը հավաստող պաշտոնական փաստաթղթերն ապօրինի հանձնելը կամ օգտագործելը, եթե այդ արարքներն անզգուշությամբ վնաս են պատճառել մարդու առողջությանը պատժվում է տուգանքով` նվազագույն աշխատավարձի երկուհարյուրապատիկից չորսհարյուրապատիկի չափով, կամ ազատազրկմամբ` առավելագույնը երկու տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով կամ առանց դրա»։

Հիշեցնենք, որ ՍԱՏՄ ղեկավար Գեորգի Ավետիսյանը Panorama.am-ին տված հարցազրույցում հայտարարել էր,  թե «Տաշիր պիցցա»-ում, թե «Երեմյան փրոջեքթս»-ի սննդի կետում թունավորումների պատճառը եղել է մարդկային գործոնը, ոչ թե հումքը։

«Երեմյան փրոջեքթս» ընկերությանը պատկանող «Բուրգըրի» («Burgery Angus & More») հասարակական սննդի կազմակերպությունում արձանագրված սննդային թունավորման դեպքի կապակցությամբ ՍԱՏՄ-ից ավելի վաղ հայտնել էին, որ համաձայն փորձաքննության արդյունքների, նմուշառված «Հավի մսի խճողակ» և «Տավարի մսի խճողակ» արտադրատեսակներում հայտնաբերվել է սալմոնելա:

Ավելի վաղ Հիվանդությունների վերսհկման ու կանխարելման ազգային կենտրոնը հայտարարել էր, որ  «Բուրգըրի» հանրային սննդի կազմակերպությունում իրականացված  դիտարկումներւ և ուսումնասիրությունների արդյունքում պարզվել է, որ  ընդհանուր առմամբ պատշաճ չեն պահպանվում սանիտարահիգիենիկ կանոնները:

Մասնավորապես՝ խախտվում են արտադրական գործընթացների հաջորդականության սկզբունքը (հոսքայնությունը), սննդամթերքի պահպանման և պատրաստման կանոնները, պատշաճ չեն իրականացվում սենքերի և մակերեսների մաքրման և ախտահանման աշխատանքները (այդ է վկայում արտաքին միջավայրի առարկաների մակերեսների լաբորատոր հետազոտության արդյունքում հայտնաբերված մանրէային աղտոտվածությունը), կազմակերպությունները ապահովված չեն համապատասխան սենքային պայմաններով և անհրաժեշտ խոհանոցային գույքով:

Կենտրոնից ընդգծել էին, որ աշխատակիցների մոտ աղիքային վարակիչ հիվանդությունների հարուցիչների հայտնաբերումը վկայում է, որ աշխատակիցների կողմից չեն պահապանվում անձնական հիգիենայի կանոնները՝ ձեռքերի, արտահագուստի լվացում և ախտահանումը, ախտահանիչ միջոցների պատշաճ կիրառումը:

Հիշեցնենք, որ սույն թվականի նոյեմբերի 20-ին «Բուրգըրի» հասարակական սննդի կազմակերպությունում սնված 13 քաղաքացի, «աղիքային վարակ» նախնական ախտորոշմամբ, հոսպիտալացվել էր Ինֆեկցիոն հիվանդությունների ազգային կենտրոնում:

«Երեմյան Փրոջեքթս» կազմակերպությանն են պատկանում «Պանդոկ Երևան» ռեստորանների ցանցը, «Երևանի Շաուրմա» արագ սննդի ռեստորանների ցանցը, «Լավաշ» ռեստորանը, «Շերեփ» ռեստորանը, ինչպես նաև «Լիվինգսթոն»-ը, «Սմոքինգ շեֆ»-ը, «Պանդոկ Երևան. գետափին»-ը։