Երևանում որոշ երթուղիների ավտոբուսների վարորդներ գործադուլ են արել

Հասարակություն 11:06 13/12/2021 Հայաստան

Երևանում որոշ երթուղիների ավտոբուսների վարորդներ գործադուլ են արել

Այսօր վաղ առավոտից Երևանի քաղաքային տրանսպորտի մի խումբ վարորդներ երթուղի դուրս չեն եկել: Նրանք հավաքվել են Ջրվեժի ավտոպարկում, պահանջում են հանդիպում քաղաքապետ Հայկ Մարությանի հետ: Վարորդները պահանջում են աշխատավարձի բարձրացում։

Երևանի քաղաքապետի խոսնակ Հակոբ Կարապետյանը նշում է՝ նմանատիպ սաբոտաժը ծայրահեղ անընդունելի է և չի կարող արդյունք տալ։

«Հարգելի երևանցիներ,

Այսօր առավոտվանից հանրային տրանսպորտի մի շարք երթուղիներ չեն աշխատում՝ վարորդների բոյկոտի պատճառով։

Վարորդները պահանջում են աշխատանքային պայմանների բարելավում, մասնավորապես, աշխատավարձի բարձրացում։

Ներկայումս քաղաքապետարանը հանրային տրանսպորտի վարորդներին վճարում է մաքուր (հարկերը հանած) շուրջ 260 000 դրամ աշխատավարձ՝ 15 օրվա աշխատանքի համար։

Մեր տեղեկությունների համաձայն, որոշ վարորդներ պահանջում են նաև վերադառնալ վճարման նախկին «պլանային» համակարգին, երբ վարորդը ստանում էր նվազագույն աշխատավարձ և ուղեվարձերից «սև» եկամուտ։

Քաղաքային իշխանությունը վճռական է տրանսպորտի բարեփոխումների հարցում և շարունակելու է հետևողական քայլերը՝ հանրությանը որակյալ տրանսպորտային ծառայություն մատուցելու և օրինականության դաշտում աշխատելու ուղղությամբ։ Միևնույն ժամանակ, մենք շարունակաբար բարելավում ենք և բարելավելու ենք վարորդների աշխատանքային պայմանները։

Նմանատիպ սաբոտաժը ծայրահեղ անընդունելի է և չի կարող արդյունք տալ։

Քաղաքապետարանի համապատասխան ստորաբաժանումները այս պահին աշխատանքներ են տանում՝ վիճակը շտկելու և տրանսպորտի բնականոն աշխատանքը վերականգնելու ուղղությամբ։
Հայցում ենք Ձեր ներողամտությունը անհարմարության համար»,- գրել է Հակոբ Կարապետյանը :

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: