Ձեր վստահելի աղբյուրը

Եվրոպական խորհրդի նախագահ Շառլ Միշելի՝ Հայաստանի ու Ադրբեջանի ղեկավարների հետ Բրյուսելում տեղի ունեցած հանդիպումից հետո ԵԽ-ն տարածել է հայտարարություն։ Նշվում է, որ երեք ղեկավարների հանդիպման հիմնական նպատակը Հարավային Կովկասում անվտանգության, կայունության, բարգավաճման ստեղծումն է, ինչն ի նպաստ կծառայի տարածաշրջանում ապրող բոլոր մարդկանց։

Հանդիպմանը Փաշինյանն ու Ալիևն ընդգծել են, որ 2020 թվականի նոյեմբերի 9-ին և 2021թ. հունվարի 11-ին ստորագրված եռակողմ հայտարարությունների առանցքային պարտավորությունները կատարվում են, իսկ այս տարվա նոյեմբերի 26-ին Սոչիում ձեռք բերված պայմանավորվածությունները պետք է ամրապնդվեն։ Շառլ Միշելը բարձր է գնահատել երկու երկրների ղեկավարների կողմից ձեռնարկած քայլերը տարածաշրջանում դեէսկալացիայի համար՝ վերջերս Հայաստանի ու Ադրբեջանի սահմանին զինված բախումներից հետո, նշել է, որ մասնավորապես իր աջակցությամբ ստեղծվել է ուղիղ կապ երկու երկրների պաշտպանության նախարարների միջև։

«Այդ մեխանիզմը կարող է ծառայել հետագա միջադեպերը կանխելու համար, դրական ազդեցություն ունենալ լարվածության նվազման համար»,-ասել է նա։

ԵԽ նախագահը շեշտել է մարդասիրական խնդիրների լուծման կարևորությունը, ողջունել է վերջերս Ադրբեջանի կողմից տասը ձերբակալված հայերի ազատ արձակումը, ինչպես նաև Հայաստանի կողմից ականապատ բոլոր քարտեզների հանձնումը։

Նա կոչ է արել լիարժեք և արագ կերպով լուծել հումանիտար բոլոր խնդիրները ՝ կալանավորներին ազատ արձակել, անդրադառնալ  անհայտ կորածների ճակատագրին,  միաժամանակ գիտակցելով, որ երկու կողմերի մարդասիրական ժեստերը նպաստում են վստահության և խաղաղության առաջընթացին նպաստող միջավայրի ստեղծմանն ու հաշտեցմանը։

Նշվում է, որ ԵՄ-ն կշարունակի աջակցել ականազերծման ջանքերին, այդ թվում՝ տրամադրելով փորձագիտական խորհրդատվություն և օգնություն հակամարտությունից տուժած բնակչությանը։ ԵՄ-ն նաև կշարունակի աջակցել Հայաստանի և Ադրբեջանի միջև վստահության ամրապնդման միջոցառումներին։

Հանդիպմանը քննարկվել է ԵՄ-ի և երկու երկրների միջև առկա և հեռանկարային առևտրատնտեսական գործընկերությունը, ինչպես նաև ԵՄ-ի մտադրությունը՝ տնտեսական խորհրդատվական հարթակ գործարկելու վերաբերյալ։

Փաշինյանն ու Ալիևը համաձայնել են, որ սահմազատման ու սահմանագծման աշխատանքների շուրջ բանակցությունների մեկնարկի համատեքստում  պետք է իրականացվեն այլ քայլեր լարվածության նվազեցման ու բանակցությունների համար բարենպաստ մթնոլորտի ստեղծման համար։  ԵԽ նախագահը կոչ է արել Բաքվին ու Երևանին ակտիվ աշխատել լարվածության թոթափման ուղղությամբ։

Եվրոպացի դիվանագետն ընդգծել է Հայաստանի ու Ադրբեջանի միջև՝ ընդհանուր առմամբ Հարավային Կովկասում ենթակառուցվածքների  վերականգնման կարևորությունը՝ հարգելով  բոլոր երկրների սուվերենությունը։

Համաձայնություն է ձեռք բերվել  շարունակել երկաթուղային գծերի վերականգնումը՝ փոխադարձության սկզբունքով սահմանային և մաքսային հսկողության համապատասխան պայմանավորվածությունների համաձայն։ ԵՄ-ն պատրաստ է աջակցել հաղորդակցության ուղիների զարգացմանը՝ իր Տնտեսական և ներդրումային ծրագրին համապատասխան:

Առաջարկվող տնտեսական խորհրդատվական հարթակը նույնպես կարող է նպաստել այս գործընթացին: Ղեկավարները պայմանավորվել են հետևել իրենց հանդիպման արդյունքներին և մնալ ներգրավված պրոցեսին։