Ձեր վստահելի աղբյուրը

Կորոնավիրուսի «Օմիկրոն» և «Դելտա» շտամները կարող են միաժամանակ ներթափանցել մարդու մարմնի բջիջներ և հանգեցնել նոր, նույնիսկ ավելի վտանգավոր տեսակի վիրուսի առաջացմանը։ Այս մասին երեքշաբթի հայտարարել է ամերիկյան Pfizer դեղագործական ընկերության գլխավոր բժիշկ Փոլ Բերթոնը՝ ելույթ ունենալով Մեծ Բրիտանիայի խորհրդարանի Համայնքների պալատի գիտության և տեխնոլոգիայի հանձնաժողովում, հաղորդում է «ՏԱՍՍ» գործակալությունը։

«Հարավային Աֆրիկայում կատարված գիտական ​​հետազոտությունները ցույց են տալիս, որ մարդիկ, հատկապես թուլացած իմունային համակարգ ունեցողները, կարող են վարակվել միանգամից երկու վիրուսով: Դա հնարավոր է հիմա՝ հաշվի առնելով վարակների քանակը, որոնք մենք տեսնում ենք», - ասել է բժիշկը,որի խոսքը մեջբերում է Daily Mail-ը:

Հրատարակության կողմից հարցված փորձագետների կարծիքով, երկու շտամներն էլ կարող են վարակել նույն բջիջը և այդպիսով մուտացիայի ենթարկվել, սակայն իրադարձությունների նման զարգացման հավանականությունը գնահատվում է չափազանց ցածր։

Նշվում է, որ կորոնավիրուսային պանդեմիայի ընթացքում հայտնաբերվել է, այսպես կոչված, շտամների ռեկոմբինացիայի երեք դեպք, որոնք, ի վերջո, չեն նպաստել նոր մուտացիայի առաջացմանը և չեն առաջացրել վարակի նոր բռնկում։

Օրինակ, նման դեպք տեղի է ունեցել այս տարվա սկզբին Մեծ Բրիտանիայում։ Հունվարին հայտնաբերվել է վիրուսի մի տարբերակ, որն առաջացել է ալֆա շտամի միաձուլումից B.1.177 շտամի հետ, որն առաջին անգամ հայտնաբերվել է Իսպանիայում:

Պարբերականը նաև հիշեցրել է ևս մեկ ռեկոմբինացիա, որը գրանցվել է ԱՄՆ Կալիֆորնիա նահանգում՝ փետրվարին այն բանից հետո, երբ ալֆա շտամը միաձուլվել է B.1.429 տեսակի հետ: Այնուամենայնիվ, ի վերջո, մասնագետները նկատել են այս շտամով վարակվելու շատ քիչ թվով դեպքեր: