Ձեր վստահելի աղբյուրը

Չկար մեղադրանքի գեթ մեկ տող, տառ, որ կհամապատասխաներ օրենքին: Այս մասին լրագրողների հետ զրույցում ասաց Վանաձորի ՏԻՄ համամասնական ընտրություններում առավել մեծ թվով ձայներ ստացած «Մամիկոն Ասլանյան» դաշինքի ընտրացուցակը գլխավորող Մամիկոն Ասլանյանի պաշտպան Լուսինե Սահակյանը՝ Ասլանյանին մեղսագրվող մեղադրանքը համարելով ապօրինի։

«Այն արարքները, որոնք մեղսագրվում են Մամիկոն Ասլանյանին,հանցագործություն համարվել ուղղակի չեն կարող՝ նա օրենքով սահմանված կարգով է գործել՝ իր լիազորությունների շրջանակում և օրենքի տառին համապատասխան»,- ասաց Սահակյանը:

Նրա խոսքով՝ այս հարցը բարձրացվել է նաև դատարանի առջև և հստակ ընդգծվել, որ հիմնավոր կասկածը բացակայում է։

Պաշտպանի գնահատմամբ՝ այս պահին կալանավորելու միջնորդություն ներկայացնելը կապ ունի Վանաձորում առաջիկայում սպասվող համայնքապետի ընտրությունների հետ:

«Ակնհայտ է, որ այս փուլում պետք է նրան կալանավորելու միջնորդություն ներկայացվեր, որովհետև ակնհայտ միջամտություն է իրականացվում ընտրությունների ընթացքին: Մենք նաեւ դատարանի առջև հարց ենք բարձրացրել, որ ժողովրդի իշխանության հարց գոյություն ունի, քանի որ ՀՀ Սահմանադրության համաձայն՝ ժողովուրդն իր իշխանությունն իրացնում է նաև ՏԻՄ ընտրություններում պաշտոնատար անձանց ընտրելով, և որ պետությունում երաշխավորվում է ժողովրդի իշխանությունն ու ոչ ոք դրան միջամտելու իրավունք չունի: Այս պարագայում ուղիղ միջամտություն է կատարվում, և հակասահմանադրական քայլեր են արվում։ Ժողովրդի իշխանության դեմ է գնում իշխանությունը՝ նման քաղաքական հետապնդում իրականացնելով»,- ասաց Լուսինե Սահակյանը:

Մանրամասն՝ տեսանյութում։