Ձեր վստահելի աղբյուրը

«Դատավորները ենթարկվում են կարգապահական պատասխանատվության հիմնականում արդարադատության նախարարության ներկայացրած միջնորդությունների հիման վրա: Բարձրագույն դատական խորհրդի կողմից կայացված որոշումները վերջնական են, դատավորը որոշումը վիճարկելու հնարավորություն չունի»,-ասուլիսում ասաց փաստաբան Մելանյա Առուստամյանը:

Ըստ նրա, ստացվում է իրողություն, երբ ՀՀ յուրաքանչյուր քաղաքացի կարող է պաշտպանել իր իրավունքները եռաստիճան դատական համակարգով, իսկ դատավորները պաշտպանված չեն օրենքով և ՀՀ տարածքում չկա մի դատարան, որտեղ դատավորը կարող է վիճարկել իր նկատմամբ կայացրած ԲԴԽ որոշումը:

«Սա հիմնախնդրի է, քանի որ դատավորը  չի կարող վիճարկել իր խախտված իրավունքների օրինականությունը: ԲԴԽ ակտերը երբեմն կայացվում են չպատճառաբանված, չհիմնավորված, այդ մասին են վկայում հենց ԲԴԽ կայացրած որոշումների վերաբերյալ ԲԴԽ անդամների կողմից արտահայտված հատուկ կարծիքները, որոնց համաձայն ԲԴԽ-ն  երբեմն կայացնում է ոչ համաչափ պատիժ, օրինակ խիստ նկատողություն, որին պետք է հաջորդի լիազորությունների դադարեցում»,-  ասաց Մ.Առուստամյանը՝ հավելելով, որ չկա որևէ մարմին, որը կքննի ԲԴԽ կայացրած որոշումների օրինականությունը ու կտա պատասխան: 

Փաստաբանի խոսքով, սա ընդհանուր խնդիր է, այսինքն դատավորն իրավունք չունի վիճարկել իր նկատմամբ կայացված ակտի օրինականությունը, ինչը միջազգային կոնվենցիաների համապատասխան նորմերի խախտում է:

Մ.Առուստամյանն ընդգծեց, որ պետք է բարձրաձայնել դատավորների անպաշտպանվածության մասին: 

«Արդարացի դատական ակտեր կայացնող դատավորներն են հիմնականում պատասխանատվության ենթարկվում»,- ասաց փաստաբանը: 

Մ.Առուստամյանի խոսքով, այն դատավորները, ովքեր հույս էին ներշնչում, որ արդար դատական համակարգը կայանում է,  այդ դատավորների գործունեությունը վտանգված է: Եթե կարգապահական վարույթների հարուցումը շարունակական բնույթ կրի, ապա, կարծում է, կզրկվեն արդար դատական համակարգ ունենալու հույսից: 

Փաստաբանն ասաց, որ պետք է լինի ԲԴԽ որոշումների բողոքարկման հնարավորություն, անհրաժեշտ է մեխանիզմները գտնել: 

«Մենք արդեն գործ ունենք վեթթինգի հետ: Կարգապահական վարույթների հարուցման միջոցով կարծես թե իրականացվում է վեթթինգ»,- ասաց Մ.Առուստամյանը: