Ձեր վստահելի աղբյուրը

Սահմանադրական դատարանն այսօր ավարտեց բանավոր ընթացակարգով «Հայաստանի Հանրապետության բնակչության սանիտարահամաճարակային անվտանգության ապահովման մասին» ՀՀ օրենքի 20.1-ին հոդվածի 3-րդ մասի, 22-րդ հոդվածի 3-րդ պարբերության և ՀՀ առողջապահության նախարարի 2021 թվականի օգոստոսի 20-ի N 65-Ն հրամանի՝ Սահմանադրությանը համապատասխանության հարցի դատաքննությունը: Դատարանը հեռացավ խորհրդակացական սենյակ որոշում կայացնելու:

Հիշեցնենք, որ ՍԴ դիմել է «Հայաստան» դաշինքը՝ վիճարկելով առողջապահության նախարարի այն հրամանի՝ համաձայն որի՝ հանրային աշխատողները կամ պետք է պատվաստվեն կորոնավիրուսի դեմ, կամ 14 օրը մեկ ներկայացնեն ՊՇՌ թեստի բացասական պատասխան։

Նիստից հետո լրագրողների հետ զրույցում ՍԴ-ում ԱԺ պատգամավորների ընդհանուր թվի առնվազն մեկ հինգերորդի ներկայացուցիչ Արամ Վարդևանյանն ասաց, որ Սահմանադրական դատարանի որոշումը առանցքային է մի պարզ պատճառով, որ գնահատավելու է միջամտության սահմանադրականությունը:

«Մեծ հույս ունեմ, որ ՍԴ-ն կանդրադառնա նաև այն հարցին, թե ինչպես է ստացվում, որ պետությունը բազմաթիվ հարցերում ծախսի բեռը վերցնում է իր վրա, իսկ այս դեպքում թեստավորման ծախսը թողնում քաղաքացու վրա»,- նշեց նա: 

Ա. Վարդևանյանի խոսքով, ՍԴ-ն կարող է նաև այս հարցին անդրադառնալ՝  արդյո՞ք պետությունն իր պարտականությունները կատարել է, թե ոչ. «Ես պնդում եմ՝ պետությունը ՊՇՌ հետազոտումները ինքը պետք է կատարի և կարող էր դա կատարել»:

Նա նշեց, որ թեստավորումը եթե պետությունը նախատեսում է որպես պարտականություն, պետք է վերահսկի դրա գների քաղաքականությունը, այդ հարցում միջամտի, քանի որ պետությունն է դա որպես պարտականություն նախատեսում:

«Ունենք  ՊՇՌ հետազոտումներ, որոնց արժեքը 40 հազար դրամ է, 68 հազար դրամ աշխատավարձ ստացող մարդը եթե ընկնում է  այդ մեկ  կլինիկայի հույսին և 40 հազար դրամ պետք է վճարի ՊՇՌ հետազոտման համար, դա ողջամի՞տ է: Դա աբսուրդ է: Նույն հաջողությումբ 10, 15, 20 հազար  դրամն էլ է առավել քան մեծ ծախս, քանի որ խոսքը գնում է  ամսվա մեջ  երկու անգամ անելու մասին: Բավական մեծ ծախսային բեռ է:

Երբ դրա ինքնարժեքը մոտ 2000 դրամ է, ինչպե՞ս կարող է դինամիկ այդպես բարձրանա: Կարծես բիզնես ոլորտ լինի, որտեղ մարդիկ միլիոնատեր են դառնում: Թող պետությունը սուբսիդավորի, իրենք էլ դառնան միլիոնատեր, բայց ոչ մարդու գրպանից պոկեն ու դառնան»,- ասաց Արամ Վարդևանյանը:

Նա նշեց, որ ՀՀ քաղաքացին չպետք է լինի ծախսեր պարտադրելու մատերիալ,  առհասարակ ՀՀ քաղաքացու հետ  պարտադրանքով չեն խոսում: