Ձեր վստահելի աղբյուրը

«Վստահեցնում եմ՝ նախարարությունը չունի դպրոցների իր նախընտրելի տնօրենների ցուցակ, մրցույթներն անցնում են կարգին համաձայն, նախարարությունն անձնավորված մոտեցումներ չունի, հետևում է, որ դպրոցներում որակական առաջընթաց գրանցեն»,- կառավարության ճեպազրույցների սրահում լրագրողներին հայտնեց ԿԳՄՍ նախարար Վահրամ Դումանյանը՝ պատասխանելով նրանց այն հարցին, թե արդյոք դպրոցների անցանկալի տնօրեններից ազատվելու խնդիր է դրված, քանի որ դպրոցների տնօրենների ընտրության մրցույթներին մասնակցած անձինք նշում են, որ իշխանությունն իր թեկնածուներին է անցկացնում։

Անդրադառնալով Երևանի քաղաքապետին անվտահություն հայտնելու գործընթացին՝ Դումանյանն ասաց, թե ինքը տեղյակ չէ, որ Երևանի ավագանու «Իմ քայլը» խմբակցությունը քաղաքապետ Հայկ Մարությանին անվստահություն հայտնելու գործընթաց է սկսել և այդ մասին իմացավ լրագրողի հարցից:

«Քիչ առաջ ձեզանից իմացա, չեմ տիրապետում փաստական տվյալների, հետևաբար ենթադրության հիման վրա կարծիք հայտնելու ցանկություն չկա»,- հայտարարեց ԿԳՄՍ նախարարը։

Հարցին, թե որպես երևանցի ինչպես է գնահատում քաղաքապետի աշխատանքը, նախարարը հորդորեց ոլորտային հարցեր տալ՝ նշելով, թե փորձագետ չէ։

Նա հավաստիացրեց, որ քաղաքապետարանի հետ որևէ կոնֆլիկտ չունեն համագործակցության առումով։