Ձեր վստահելի աղբյուրը

«Հայաստանում այսօր տեղի են ունենում համատարած ապօրինություններ ու բռնաճնշումներ, յուրաքանչյուր օր կալանավորվում են մարդիկ, ազատությունից զրկվում են անձինք իրենց քաղաքական հայացքների համար»,- ԲԴԽ մոտ ակցիայի ժամանակ լրագրողների հետ զրույցում ասաց ՀՅԴ ԳՄ ներկայացուցիչ, ԱԺ փոխնախագահ Իշխան Սաղաթելյանը:

Նա նշեց, որ այդ բոլոր հրահանգներն իջեցվում են հենց Բարձրագույն դատական խորհրդի շենքից ու դատախազությունից, ովքեր Փաշինյանի  ձեռքին դարձել են բութ գործիք Հայաստանում բռնություններ իրականացնելու և մեկ մարդու բռնապետություն հաստատելու համար:

«Հավաքվել ենք մեր բողոքի ձայնը բարձրացնելու, դիմադրելու այս ապօրինությունների շղթային, պահանջելու ազատ արձակել քաղբանտարկյալներին, ովքեր կալանավորված են բացառապես իրենց  քաղաքական գործունեության համար: Այսօր Հայաստանում կալանավորում են այն մարդկանց, ովքեր  փորձում են պայքարել Հայաստանի թրքացման, Արցախի հայաթափման դեմ: Սա է իրականությունը, պետք է կանխենք, վերջ  դնենք այս ապօրինություններին, չարիքի կառավարությանն ուղարկենք  գրողի ծոցը, որովհետև յուրաքանչյուր օր թուլացնում է մեր ժողովրդի դիմադրողականությունը, յուրաքանչյուր օր մեր երկիրը տանում է նոր պարտությունների ու զիջումների»,- ասաց Ի. Սաղաթելյանը:

Նա նշեց, որ պետք է համախմբել ողջ առողջ ուժերին, ընդդիմադիր դաշտն ու հեռացնել այս իշխանությանը. «Դիմադրությունը պետք է լինի  երկու ճակատով՝ դիմադրություն թշնամուն, դիմադրություն թշնամու շահերը սպասարկող  այսօր Հայաստանի իշխանության ղեկին հայտնված մարդկանց: Երբ ձևավորենք համազգային դիմադրություն, թշնամին կհեռանա մեր սահմաններից, սրանք իրենց  աթոռներից»: