Ձեր վստահելի աղբյուրը

«Այսօր մեզ մոտ տոտալ տիրում է իրավական ամենաթողություն: Դա մեկ նպատակ է հետապնդում՝ կոտրել մեր ողջ ազգի ողնաշարը, չկարողանանք դիմադրել այն մարտահրավերներին, որոնք գրեթե բոլոր գերտերությունների կողմից այսօր նետված են դեպի Հայաստան»,- ԲԴԽ մոտ լրագրողների հետ զրույցում ասաց ԱԺ «Հայաստան» խմբակցության պատգամավոր, «Վերածնվող Հայաստան» կուսակցության նախագահ Վահե Հակոբյանը:

Հիշեցնենք, որ ընդդիմադիր ուժերն այսօր ժամը 13:00-ից հավաքվել են Բարձրագույն դատական խորհրդի (ԲԴԽ) դիմաց, որից հետո երթով շարժվելու են ՀՀ դատախազություն։

Վահե Հակոբյանն ընդգծեց, որ այսօրվա այս հավաքով ուզում են ոչ ասել իրավական ամենաթողությանը, ինչպես նաև՝ կանգ առնի իրավական ամենաթողությունը: Քաղաքական գործիչը համոզված է, որ ընդդիմության հավաքները կարող են արդյունք ունենալ:

Նա նշեց, որ Քաջարանի գործող քաղաքապետը, Գորիսի, Վանաձորի ընտրված համայնքապետերն ապօրինի կալանավորված են, վառ ապացույցն ընթացող դատական գործընթացներն են:

«Բայց ԲԴԽ-ի աչքերը փակ են այդ գործընթացների վրա, որոնք կատարվում են: Մարդիկ հրաժարվում են ցուցմունքներից, որոնք իրենք տվել են ճնշման տակ, որի մասին իրենք  բարձրաձայնում են: Բայց՝ ասողին լսող է պետք: Ասել ենք ու ասելու ենք՝ չենք հրաժարվելու  ցանկացած մեթոդներից, որպեսզի հասնենք նրան, որ մեր պետության ղեկին լինեն ազգային շահն առաջին պլան բերող մարդիկ»,- ասաց Վահե Հակոբյանը:

Ընդդիմադիր պատգամավորի խոսքով, այսօր բոլոր խնդիրների հիմքում մեկն է՝ Նիկոլի հեռացումը, դրանից հետո ամեն ինչ ինքնըստինքյան իր տեղը կընկնի:

«Այս ճնշումները սկսվեցին Սյունքում: Այդ ճնշումների ներքո  կորցրեցինք Գորիս-Կապան, Կապան-Ճակատեն  ճանապարհները: Հիմա տարածվել է ողջ Հայաստանով, ու մեր հանրությունը պետք է վերջապես հասկանա, թե ուր են մեզ տանում այսօր այս իշխանությունները: Ակնհայտ է չէ՞, ուր են տանում:

Այն ժամանակ, երբ Ադրբեջանի զինուժը գտվում է մեր սուվերեն տարածքում, այսպես  կոչված մեր վարչապետը կառուցողական հանդիպումներ է ունենում իր գործընկեր Ալիևի հետ: Դրա հետևանքներն  անմիջապես տեսնում ենք, մեր գերիները շարունակում են գտնվել Ադրբեջանի բանտերում»,- ասաց Վահե Հակոբյանը:

Ուղիղ եթերը՝ «Թերթ.ամ»-ի: