Ձեր վստահելի աղբյուրը

Վեդիում ՏԻՄ ընտրություններից հետո այսօր պետք  է կայանար նորընտիր ավագանու  անդրանիկ նիստը։ Սակայն ինչպես ասում են՝  շաբաթն ուրբաթից շուտ եկավ։

Վեդիի ընտրություններում պարտված ՔՊ-ի ու «Հանրապետություն» կուսակցության ընտրացուցակներում ընդգրկված թեկնածուներն ինքնաբացարկի ու մանդատից հրաժարվելու դիմումներ ներկայացրեցին։ Արդյունքում կնշանակվեն նոր ընտրություններ։

Այս զարգացումների շուրջ Panorama.am-ը զրուցել է Ռաֆիկ Անդրեասյանի հետ, որի ղեկավարած  Ուրցաձոր համայնքն ընդգրկվել է Վեդի խոշորացված համայնքում։ Ռաֆիկ Անդրեասյանն ընտրություններին մասնակցում էր «Իմ հզոր համանք» դաշինքի ընտրացուցակով, որն առավել մեծ թվով ձայներ էր ստացել։ 

Panorama.am-Պարոն Անդրեասյան, ինչպե՞ս եք գնահատում «Քաղաքացիական Պայմանագիր» և «Հանրապետություն» կուսակցությունների նման քայլը։
Ռաֆիկ Անդրեասյան-Ես արդեն ասել եմ, որ նրանք առաջին հերթին ոտնահարել են հենց իրենց ընտրողների շահերը։ Ո՞նց պետք է գնահատեմ։ Սա ձև չի էլի, ոնց  որ ժողովուրդն իրենց խաղալիքը լինի։ Չի կարելի ժողովրդի հետ նման կերպ վարվել։

Panorama.am-Հիշո՞ւմ եք, որ Նիկոլ Փաշինյանը հայտարարեց՝ կամ ես կընտրվեմ վարչապետ, կամ ՀՀ-ում ընդհանրապես վարչապետ չի ընտրվի։ Փաստորեն  հենց այս սկզբունքով են առաջնորդվում նաև նրա թիմակիցները։
Ռաֆիկ Անդրեասյան-Իհարկե, ես ամեն բան շատ լավ հիշում եմ, հիշում եմ նրա բոլոր հայտարարությունները, որոնք պետությանը մեծ վնաս են հասցրել։ Ես վաղուց ասել եմ, եթե ՏԻՄ-երում  համամասնական ընտրությունների մասին օրենքը մնա նույնը, ապա դա անհատի իրավունքի խախտում է։ Ժողովրդավարության զարգացման առումով շատ կարևոր է, որ մարդը կարողանա միայնակ առաջադրվել՝ մեծամասնական ընտրակարգով։ Նաև էս կարգի խոշորացված համայնք կառավարելը  շատ դժվար է, նման ծավալի խոշորացումը բացասական երևույթ եմ համարում ու չեմ կարծում, որ այդ համայնքների խնդիրները նորմալ լուծում կստանան։ Խնդիրները շատ են լինելու, որոշ դեպքերում նաև անհաղթահարելի։

Մի բան էլ նշեմ, գոռում-գոչում են, որ ապակենտրոնացված կառավարման են անցնում։ Ճիշտ հակառակ գործընթացն է տեղի ունենում։ Նախկինում  էլ միջամտության քիչ դեպքեր չեն եղել տարբեր կուսակցությունների կողմից, քիթը խոթել են համայնքների ինքնուրույնության մեջ, բայց այսօր  նույնը շարունակվում է  ռեպրեսիոն միջոցներով։

Panorama.am-Ձեզ համար սպասելի՞ էր  ՔՊ-ի նման քայլը։
Ռաֆիկ Անդրեասյան-Ինձ համար էդ իշխող կուսակցության կողմից ցանկացած քայլ սպասելի է՝ թե ձերբակալություն, թե բանսարկություն, թե գործ կարել։ Ամեն ինչ սպասում եմ, քանի որ նրանք պետություն հանձնեցին։ Հույս ունեմ, որ հայի պայքարող տեսակը դեռ մենք ունենք ու նրանք իրենց գործն անելու են։

Panorama.am-Ձեր դաշինքը՝ «Իմ հզոր համայնք»-ը հետագա անելիքների մասին քննարկում ունեցե՞լ է, կա՞ որոշում։
Ռաֆիկ Անդրեասյա-Մենք մեր անելիքները դեռ չենք որոշել։ Սպասում էինք, որ էսօր ավագանու նիստը կկայանար, կշարունակեինք մեր աշխատանքը։

Panorama.am-Փաստորեն այս պահին հաջորդ ընտրություններին մասնակցելու վերաբերյալ հստակ որոշում չունեք։
Ռաֆիկ Անդրեասյան-Այս պահին ոչ, բայց իմ կարծիքն այն է, որ պետք է միանշանակ մասնակցել։ Եթե թիմակիցների մեծամասնությունը չհամաձայնեն ինձ հետ, բնականաբար, չենք մասնակցի։ Կարծում եմ, այդ որոշումը չի լինի։ 
Դուք հիմա տեսնում եք, թե ինչ է տեղի ունենում մյուս համայնքներում։ Այս իրավիճակում ինձ համար զարմանալի է, թե ինչու ընդդիմադիր պատգամավորներն իրենց մանդատները վայր չեն դնում։ Չեմ հասկանում, ինչ է կատարվում։ Ես իրենց քվե չեմ տվել, որ գնան լռեն կամ աթոռ զբաղեցնեն։ Թող իրենք էլ հրաժարական տան։