Ձեր վստահելի աղբյուրը

Հայաստանը 2021 թվականի հունվար-հոկտեմբերին ամենախոշոր առևտրաշրջանառությունն ունեցել է Ռուսաստանի, Չինաստանի, Իրանի և Շվեյցարիայի հետ։ Այս մասին են վկայում ՀՀ վիճակագրական կոմիտեի հրապարակած տվյալները:

Ըստ վիճակագրության՝ արտաքին և փոխադարձ առևտրի առևտրաշրջանառության ծավալը 2021 թվականի 10 ամիսներին կազմել է 6 մլրդ 537 մլն 236.3 հազար դոլար՝ 2020-ի նույն ժամանակշրջանի համեմատ աճելով 13.6%-ով:

Վիճակագրության համաձայն, արտահանումը կազմել է 2 մլրդ 410 մլն 591.2 հազար դոլար՝ 2020 թ-ի հունվար-հոկտեմբերի համեմատ աճելով 16.9%-ով, ինչ վերաբերում է ներմուծմանը, ապա ծավալներով ներմուծումը շարունակում է գերազանցել արտահանմանը: Մասնավորապես, 2021 թվականի հունվար-հոկտեմբերին ներմուծումը կազմել է 4 մլրդ 126 մլն  645.1 հազար դոլար, ինչը նախորդ տարվա նույն ժամանակաշրջանի համեմատ աճել է 11.8%-ով։

Հայաստանի հետ արտաքին և փոխադարձ առևտրի առևտրաշրջանառությամբ Ռուսաստանը զբաղեցնում է առաջին տեղում։ Մասնավորապես, այս տարվա հունվար-հոկտեմբերին Ռուսաստանի հետ առևտրաշրջանառությունը կազմել է 2 մլրդ 33 մլն 87.9 հազար դոլար՝ նախորդ տարվա նույն ժամանակաշրջանի հետ համեմատ աճելով 14.3%-ով։ Երկրորդ տեղում Չինաստանն է, որի հետ իրականացվել է 974 մլն 962.3 հազար դոլարի արտաքին և փոխադարձ առևտուր՝ ընդ որում այն 2020-ի նկատմամբ աճել է 28.2%-ով: Այնուհետև հաջորդում է Իրանը, որի հետ Հայաստանի արտաքին և փոխադարձ առևտրի առևտրաշրջանառությունը կազմել է 388 մլն 724.9 հազար դոլար (աճը՝ 17.6%-ով)։ Չորրորդ տեղում Շվեյցարիան է՝ 282 մլն 923.2 հազար դոլար առևտրաշրջանառությամբ։ Այս ցուցանիշը 2020-ի համեմատ նվազել է 30.6%-ով։

ԱՊՀ երկրների հետ առևտրաշրջանառությունն ընդհանուր կազմել է 2 մլրդ 272 մլն78.9 հազար դոլար, այդ թվում՝ ԵԱՏՄ երկրերի հետ Հայաստանն այս տարվա հունվար-հոկտեմբերին ունեցել է 2 մլրդ 114 մլն 80.8 հազար դոլար՝ 2020թ-ի նույն ժամանակաշրջանի համեմատ աճելով 13.9%-ով։ Մասնավորապես, Ղազախստանի հետ առևտրաշրջանառության ծավալը 2021-ի հունվար-հոկտեմբերին աճել է 56.9%-ով, Ղրղզստանի հետ՝ 29%-ով, մինչդեռ Բելառուսի հետ առևտրաշրջանառության ծավալը նվազել է 2.3%-ով։

ԵՄ երկրների հետ Հայաստանի արտաքին և փոխադարձ առևտրի առևտրաշրջանառությունը կազմել է 1 մլրդ 291 մլն  504.5 հազար դոլար՝ 2020-ի հունվար-հոկտեմբերի համեմատ աճելով 23.2%-ով:

Ըստ վիճակագրության՝ ԱՄՆ-ի հետ Հայաստանի առևտրաշրջանառության ծավալը այս տարվա հունվար-հոկտեմբերին կազմել է 162 մլն 984.2 հազար դոլար՝ 2020-ի նույն ժամանակահատվածի համեմատ աճելով 43.6%-ով:

Նշենք, որ պաշտոնական տվյալներով, Հայաստանի արտահանումն աճում է հանքահումքի հաշվին (16.7%-ով): Այս տարվա հունվար-հոկտեմբերին զգալի աճել են պատրաստի սննդամթերքի (8.8%), մանածագործական իրերի (28.9%), ոչ թանկարժեք մետաղների (60.4%), սարքավորումներ և մեխանիզմների (53.4%), կենդանի կենդանիներ և կենդանական ծագման արտադրանքի (51.5%),  բուսական արտադրանքի (41.3%)և այլ ապրանքների գծով արտահանումը: 

Ի դեպ, այս տարվա 10 ամիսներին նախորդ տարվա նույն ժամանակահատվածի համեմատ 2.3 անգամ ավելացել են արվեստի ստեղծագործությունների արտահանման ծավալները՝ կազմելով 925.5 հազար դոլար։