Ձեր վստահելի աղբյուրը

«Առանց գաղափարախոսության որևէ ազգ կենսունակ չէ իր գոյության պայքարում, առանց դրանց նա դառնում է պատեհապաշտ գործելակերպի մեջ անսկզբունք, նպատակների և անելիքների մեջ չկողմնորոշվող, հաճախ նաև՝ դեպքերի և իրադարձությունների խաղալիք»,-ՀՀԿ համագումարում ունեցած ելույթում ասաց ՀՀԿ գործադիր մարմնի անդամ Արտակ Զաքարյանը:

Նա նկատեց, որ նման էջեր ունեցել է նաև հայ ժողովրդի պատմությունը, և այդ արցունքոտ և արյունոտ էջերից շատերը սեփական նպատակների բացակայության և օտար արժեքների ու ուսմունքների ուսումանսիրության հետևանք են:

«Մեր ժողովրդին այսօր փորձում են զրկել հարազատ իզմերից, իսկ մենք ասում ենք, որ հայ մարդն առաջին հերթին ազգային է և պահպանողական՝ նվիրված իր ժողովրդին և հայրենիքին»,- հայտարարեց Զաքարյանը և նկատեց, որ ՀՀԿ-ն իր ստեղծման օրվանից հիմնված է եղել ազգային պահպանողականության արժեքների վրա՝ զբաղեցնելով իր հստակ դիրքերը գաղափարական-քաղաքական պայքարի դաշտերում:

Նրա խոսքով՝ ազգային գաղափարախոսությունը, որպես ազգային իղձերի և նպատակների միասնական համակարգ գոյություն ունի ի սկզբանե՝ ազգի ծննդի հետ և  խնդիրը ոչ թե այն ստեղծելն է, այլ ճանաչելն ու հայտնաբերելը:

«Մարդկային էության մեջ միշտ էլ եղել են անանց արժեքներ, ինչպիսին են՝ հայրենիքը, անկախ պետականությունը, լեզուն, մշակույթը, ընտանիքը հավատքը, որը հատկապես դրսևորվում է այն հայորդիների մոտ, որոնք պարտավորվածություն են զգում ազգի և հայրենիքի հանդեպ»,-ասաց ՀՀԿ անդամը և հավելեց. «Պահպանողականությունը ոչ թե հնի, այլ հավերժի հաստատումն է , ոչ թե անցյալի, այլ մնայունի պաշտպանն է՝ այն  արժեքավորի, որն ստեղծվել է անցյալում և  ստեղծվելու է նաև ապագայում: Իզուր չի ասված, որ ով չունի անցյալ՝ չի կարող ունենալ նաև ապագա»:

Զաքարյանի կարծիքով ապագա ունենում են նրանք, ովքեր գնահատում ու պահպանում են իրենց հիմնարարա արժեքները:
 
ՀՀԿ անդամը շեշտեց, որ նրանք, ովքեր մեր ժողովրդին առաջարկում են մոռանալ անցյալը՝ դրանով Հայաստանին զրկում են իր ապագայից:

«2018 թվականի իշխանազավթումից հետո մեր երկրին բաժին են հասել վնասարարություն, ավերածություններ և նոր ռիսկեր»,- ասաց Արտակ Զաքարյանը և շեշտելով, որ իշխանափոխությունից հետո ՀՀԿ-ի բոլոր մտահոգություններն ու կանխատեսումներն իրականություն են դարձել՝ նշեց. «Ապաշնորհ, դավաճան իշխանությունները կոլապսի եզրին են հասցրել մեր պետականությունը, ՀՀ-ի և ԱՀ-ի քաղաքացիները պոպուլիսների պատճառով առերեսվել են ահռելի խնդիրների հետ, կորցրել ենք կենսական տարածքներ, մշակութային ժառանգություն, զրկվել ենք նորօրյա սերնդի լավագույն սերուցքի մի հատվածից, խաթարվել է մեր անվտանգային համակարգը, փոշիացվել և գետնին են հավասարացվել տարիներով կառուցված և ամրացված ռազմապաշտպանական կառույցները, զրոյացվել է պետական հաստատությունների դերն ու նշանակությունը»:

Զաքարյանը համոզմունք հայտնեց, որ խայտառակության աստիճանի է հասցվել Հայաստանի արտաքին հեղինակությունը, պատվազրկվել և նսեմացվել է հայի միջազգային համբավն ու հարգանքը, հոգեվարքի մեջ է հայտնվել տնտեսական զարգացման ողջ ներուժը:

Բանախոսն ընդգծեց, որ կորել է հայ քաղաքական ղեկավարի ավանդական էությանը և  լրջությանը հարիր կերպարը:

«Գալիս է ժամանակը կրկին տեր կանգնելու, վերկանգնելու, վերապրեցնելու ապահով և անվտանգ Հայաստանն  ու Արցախը»,-հայտնեց ՀՀԿ ԳՄ ներկայացուցիչը և նկատեց, որ Ադրբեջանցիները և նրա հետևում կանգնածները հայերին մեղադրում են ռևանշիզմի մեջ, որովհետև լավ գիտեն, որ Հանրապետականի հետ Հայաստանի ազգային շահի առևտուր չեն կարող անել:

Իսկ կուսակցության հիմնական խնդիրն, ըստ Զաքարյանի, այս իշխանություններից երկիրն օր առաջ ազատելն է: