Ձեր վստահելի աղբյուրը

«ՀՀԿ համագումարը տեղի է ունենում Հայաստանի ժամանակակից պատմության ամենաողբերգական շրջափուլում։ Շուրջ 3,5 տարի առաջ իզմեր չունեցող իշխանատենչները պատանդ վերցրին Հայաստանը»,- «Հայաստանի Հանրապետական» կուսակցության 17-րդ համագումարում ասաց  ՀՀԿ խոսնակ Էդուարդ Շարմազանովը։

Նա նշեց, որ նրանք մերժեցին ավանդական արժեքները, եկեղեցին, ընտանիքը, արցախյան հաղթանակները, մեր ավանդական արժեքները։

«2018 թվականի գարնանից սկսած ՀՀԿ-ականներն էին, որ պայքարում էին պետության ազատագրության, ավանդական արժեքների համար, քանզի ՀՀԿ-ն ստեղծվել է որպես պայքարի կուսակցություն, ՀՀԿ ակունքները գալիս են դեռևս Ազգային միացյալ կուսակցությունից, 2018 թվականին պայքարող ես և իմ ընկերները գիտակցում էինք, որ մենք պարտք ունենք տալու Աշոտ Նավասարդյանի, Անդրանիկ Մարգարյանի, սպարապետ Վազգենի, Արցախյան պատերազմներում զոհված մեր նահատակների հիշատակի առջև»,- ասաց Շարմազանովը։

Նա ընդգծեց, որ ՀՀԿ-ն այսօր կա ու հանդիսանում է Հայաստանի քաղաքական դաշտի ամենակայացած քաղաքական ուժերից մեկը։

«Ի՞նչ պետք է անել։ Պետք է պայքարել։ Արդյո՞ք երկարատև է լինելու այդ պայքարը։ Այո։ Մարաթոնյան պայքար է, որտեղ հաղթելու է նա, ով ուշ է հոգնելու։ Մենք պետք է թույլ չտանք, որ Հայաստանը դառնա «проходной двор» պանթուրքիզմի համար, թույլ չտանք, որ Արցախի ինքնորոշման իրավունքի իրացումը լինի ընդամենը հիշողություն»,- ասաց ՀՀԿ-ական գործիչը։

Նա նշեց, որ Հայաստանի Հանրապետությունը ծնվել է Արցախյան հերոսամարտից, պայքարից, հետևաբար կլինի Արցախը, կլինի Հայաստանը, չի լինի Արցախը, չի լինելու Հայաստանը, սա պետք է գիտակցել։

«Մենք չպետք է լինենք անտարբեր, քանի որ անտարբերությունը հատուկ է 30 արծաթով ստամոքսը լցնողին։ Մենք չպետք է հուսահատվենք, քանզի հուսահատությունը մեղք է, մեղք է նաև մեր նահատակված հերոսների հիշատակի առջև։ Մենք չպետք է անհամբեր լինենք, այլ համբերատար պայքարենք, միայն այս դեպքում լույսը կհաղթի խավարին, հավատը՝ կռապաշտությանը, հույսը՝ կասկածամտությանը,   սերը՝ ատելությանը»,- ասաց Էդուարդ Շարմազանովը։