Ձեր վստահելի աղբյուրը

«Կարծում եմ, որ այսօրվա իշխանությունների հաջողությունների մասին խոսելը ավելորդ է։ Ինչ վերաբերում է 2009-10 թվականների իրադարձություններին, կարծում եմ, շատ սերտ ու մասնագիտորեն այդ իրադարձությունը վերլուծել է նախկին արտգործնախարար էդվարդ Նալբանդյանը։ Այնպես որ, դրա մասին էլ խոսելն էլ ճիշտ չեմ համարում»,- ՀՀԿ 17-րդ համագումարից հետո լրագրողների հետ զրույցում ասաց ՀՀԿ նախագահ, ՀՀ երրորդ նախագահ Սերժ Սարգսյանը՝ պատասխանելով հարցին, որ արդեն Թուրքիայից բարձր մակարդակով հայտարարվում է՝  հունվարից մեկնարկ է տրվելու հայ-թուրքական դիվանագիտական հարաբերություններին, Դուք այն ժամանակ սկիզբ դրեցիք, ինչ-որ նախապայմաններ առաջ քաշվեցին, ինչպե՞ս է դա հաջողվում Փաշինյանին այսօր և ո՞րն է Ձեր գնահատականը։

Ս. Սարգսյանի խոսքով, եթե նկատել են, ինքը չի խոսում իրենց ձեռքբերումների մասին, որովհետև դրանք անցյալում են։

«Այսօր պետք է խոսենք մեր պրոբլեմների մասին, մեր անելիքների մասին, ինչն էլ որ արեցինք»,- ասաց ՀՀ երրորդ նախագահը։

Հարցին՝ գործարար միջավայրից կա ոգևորություն, որոշ գործարարներ չափից ավելի ոգևորվել են հայ-թուրքական հարաբերություններով, թուրքական մամուլը գրում է, որ չվերթ կբացվի, այդ թվում՝ հայկական ավիաուղիների, Սերժ Սարգսյանը պատասխանեց. «Այդ նրանք են, ովքեր ո՛չ քաղաքականությունից են հասկանում, ո՛չ էլ գործարար միջավայրը բարելավելուց»։

Պատմություն է՞լ չգիտեն հարցին ի պատասխանց՝ ասաց. «Պատմություն իմանալու մասին ընդհանրապես խոսք չկա»։