Ձեր վստահելի աղբյուրը

«Հանրապետականը ոչ միայն կուսակցություն է, այլ նաև քաղաքական մտքի ֆաբրիկա, որն ունակ է արտադրել գաղափարներ, գնահատականներ և այդ գնահատականները դարձնել Հայաստանի քաղաքական դաշտի մտավոր սեփականությունը»,-ՀՀԿ 17-րդ համագումարում ունեցած ելույթում հայտարարեց կուսակցության գործադիր մարմնի անդամ Արմեն Աշոտյանը:

Նա հայտնեց, որ կուսակցությունը փորձել է գնահատականներ տալ վերջին 5 տաիներին և դրանք բաժանել են երեք պայմանական փուլի՝ 2016-18թթ., երբ ՀՀԿ-ն իշխանության էր, 2018-ից մինչև պատերազմ և դրանից հետո:
 
Արմեն Աշոտյանը նկատեց, որ մեծ էր գայթակղությունն համագումարում ստեղծել հերթական հայտարարության փաստաթուղթը, որով արձանագրեին, դատապարտեին կատարվողը և կոչեր անեին, հմտորեն շրջանցելով այն գնահատականները, որոնք ազնվույթուն են պահանջում, բայց ՀՀԿ նախագահ Սերժ Սարգսյանի ելույթում ամեն ինչ ասված է:

«Նախագահի ելույթն ամբողջությամբ բաբախող նյարդ էր մեր անցյալի, այսօրվա և վաղվա մասին, հետևաբար ամեր բանաձև հենց այդպիսին պետք է լինի»,-հայտարարեց  Աշոտյանը և հավելեց. «Մենք զերծ ենք մնացել ռեզոլյուցիաներ գեներացնելու բյուրոկրատական ավանդույթներից և մեր հասարակությանը տվել ենք մանիֆեստ և այս բանաձևի նախագիծն ոչ թե լոկ Հանրապետականի փաստաթուղթն է, որը փոշինալու է մեր դարակներում, այլ՝ ակտիվ, կենդանի փաստաթուղթ, որը պետք է  օգտագործվի մեր համակիրների կողմից՝ ժողովրդին բացատրելու անցյալը, ներկան և ապագան»:

Նա հայտարարեց, որ իր ներկայացրած բանաձևը ՀՀԿ նախագահ, ՀՀ երրորդ նախագահ Սերժ Սարգսյանի ելույթի վերջում բերված բանաձևն է՝ 0 հուսահատություն, 0 հանդուրժողականություն դավաճանների հանդեպ և 0 ամբիացիա:

«Դժվար է պատկերացնել հանրապետականին առանց ամբիցիայի և, պատկերացրեք, ինչ ծանր է երկիրը, որ մենք ինքներս ասում ենք հենց այդ մասին՝  0 ամբիցիա քաղաքական դաշտում՝ ունենալով գեթ մեկ ցանկություն՝ իշխանափոխություն և իշխանափոխությունից հետո անելիքների ճանապարհային քարտեզ»,-ասաց ՀՀԿ ԳՄ անդամը:

Նա նշեց, որ այդ բանաձևը տալիս է նաև ՀՀ քաղաքացիների այն հարցի պատասխանը, ըստ որի՝ գործող իշխանություններին հեռացնելուց հետո ի՞նչ կարելի է անել, հնարավոր է ինչ-որ բան հետ բերել:

«Նախորդ տարվա նոյեմբերի 9-ից սկսած մենք ասում ենք՝ այո հնարավոր է  և ամեն օր դեռ հնարավոր է: Այս բանաձևի մեջ նկարագրած ճանապարհային քարտեզի հիմնական ուղղություններն այդ հարցերի պատասխաններն են՝ ինչը կարելի է անել իշխանափոխությունից հետո, որպեսզի Հայաստան լինի, Արցախ լինի, Հայը լինի»,- իր խոսքն ամփոփեց Արմեն Աշոտյանը: