Ձեր վստահելի աղբյուրը

«Այսօր և այստեղ ուզում եմ ձեզ հետ շատ բաց և շիտակ լինել, եթե կուզեք՝ խոցելիության աստիճանի: Ահա կանգնած եմ ձեր առջև անձնական կորուստների ու հարվածների ցավը չհաղթահարած, բայց գիտակցումով ու պատասխանատվությամբ, որ դեպի անդունդ գլորվող մեր անկախ պետականության ճանապարհի այս հատվածում անկարելի է սեփական ցավով օտարանալը:  Հայրենիքից չեն նեղանում, սեփական ժողովրդից չեն նեղանում, անգամ եթե դեռ հասկացված չես»,-ՀՀԿ 17-րդ համագումարում հայտնեց կուսակցության առաջնորդ Սերժ Սարգսյանը:

Նա նկատեց, որ իր զինակից ընկերների, դահլիճում գտնվող շատերի ծնողների հետ  կյանքի ու մահվան մի ամբողջ ճանապարհ են անցել, որտեղ մարտի դաշտում զոհված ամեն մի զինվորի հետ մահացել են ու պաշտպանած ամեն մի բարձունքի հետ կյանք ստացել:

«Տարիներ շարունակ ոմանց կողմից ձևավորվող թաքուն սպասումն ու  ոգևորությունը, թե՝ «Արցախը հանձնենք, լավ կապրենք», քայքայեց ու կործանեց մեր երեսնամյա անկախության հիմքերը: Արցախի հարցը եղել ու մնում է մեր ժողովրդի գոյության և պաշտպանության հարցը, մեր ինքնության ու տեսակի պահպանման հարցը` որպես անկախ պետական միավոր: Եվ սա հասկանալու համար, ցավոք, մեր ժողովրդին պետք եղավ անցնել կորուստներով լի մի ամբողջ արյունալի պատերազմով՝ սա հասկանալու համար»,- ասաց ՀՀ երրորդ նախագահը:

Նկատելով որ աշխարհում 85 ազգ կա, որ 3-ից 30 միլիոն բնակչություն, լեզու, մշակույթ, կրոն ունեն, բայց պետություն չունեն՝ Սերժ Սարգսյանը տարակուսեց, թե այրդյո՞ք հայ ժողովուրդն ուզում է համալրել նրանց շարքերը, մոռանա՞լ անկախության համար իր կյանքը զոհաբերած հազարավոր եղբայրների ու քույրերի արյունը:

ՀՀԿ նախագահը նկատեց, որ ինքը և զինակից ընկերները երբեք չենք թաքնվել բունկերում, իր սերունդը հավատում էր, որ Հայրենիքի առջև պարտքը կատարելը հերոսություն չէ, որ ժողովրդի անվտանգությունն ապահովելն իրենց պարտքն ու ծառայությունն էր և հավատում էր, որ գործերը խոսում են իրենց մասին:

«Ընդ որում, միջազգային հարաբերությունների տեսանկյունից հետաքրքիր է արձանագրել, որ երկրորդ աշխարհամարտից հետո տարածքային ձեռքբերմամբ և առանց սանկցիաների ուղեկցվող հաղթանակներ չեն եղել աշխարհում: Ինչպե՞ս չկարողացանք հստակ բացատրել մեր ժողովրդին այս բարեբախտության նշանակությունը: Փոխարենը «տանք, որ լավ ապրենք»-ը լայնորեն գովազդվում էր: Ակամայից ուզում եմ հարցնել` հիմա լա՞վ եք ապրում»,- հայտարարեց Սերժ Սարգսյանը:

Շեշտելով որ ՀՀԿ 17-րդ համագումարը նաև յուրօրինակ ջրբաժան է՝ կուսակցության առաջնորդն շեշտեց, որ այսօր կուսակցության անդամները, որպես քաղաքական ուժ,  ինքնամաքրման գործընթացի փուլի ավարտն են ազդարարելու՝ ընտրությունների արդյունքներով հաստատելով Հանրապետականի դավանած արժեքների համար պայքարում ամուր կանգնողների վճռականությունը, իսկ քաղաքական խրամատում պայքարին անպատրաստ կուսակիցներին ասելու են` հաջողություն:

Շեշտելով, որ վերջիններս չեն կարող տեղ ունենալ ՀՀԿ շարքերում՝ Սերժ Սարգսյանն ասաց. «Թվում է, թե վերջին երեք տարիներին մենք անցել ենք ամենածանր փորձությունների միջով, բայց ոչ, սիրելի՛ կուսակից ընկերներ,  ինքներդ էլ հասկանում եք, որ դրանք անցյալում չեն մնացել. մեզ և մեր երկրին ու ժողովրդին պատուհասած փորձությունները չեն ավարտվել, և մենք, որպես քաղաքական ուժ, պետք է պատրաստ լինենք դիմագրավելու, առանց վհատվելու պայքարելու երկիրն ու մեր երեխաների ապագան կործանման տանող դավաճան ստահակների դեմ: Այստեղ նստած յուրաքանչյուրդ և այս դահլիճից դուրս գտնվող մեր հազարավոր հանրապետական ընկերները պետք է հարց տան իրենք իրենց և ազնվորեն պատասխանեն` պատրա՞ստ են զոհողությունների: Կուսակցությունում մնալու պայմանը պետք է լինի նրանց պատասխանը`
-  Այո՛, պատրաստ ենք մինչև վերջ տեր կանգնելու մեր ազգային արժեքներին.
-  Այո՛, պատրաստ ենք աննահանջ կանգնելու Հայաստանի և Արցախի պաշտպանության ու ինքնիշխանության համար պայքարի դիրքերում.
-  Այո՛, պատրաստ ենք մեր լեզուն, մշակույթը, եկեղեցին պաշտպանելու օտարահաճո ապազգային տարրերի հարձակումներից.
-Այո՛, պատրաստ ենք տեր կանգնելու մեր ազգային արժանապատվությանը, մեր սուրբ հողին ու պետությանը և արժանի լինելու բոլոր ժամանակներում հանուն այդ հողի և պետության նահատակված մեր հերոսների հիշատակին»: