Ձեր վստահելի աղբյուրը

Չինաստանը ողջունում է ԱՄՆ-ի հետ համագործակցությունը, սակայն չի վախենում առճակատումից, իսկ առճակատման դեպքում «կպայքարի մինչև հաղթական ավարտը»: «ՌԻԱ նովոստի»-ի փոխանցմամբ՝ երկուշաբթի այդ մասին հայտարարել է Չինաստանի արտգործնախարար Վան Ին։

«Չինաստանի դիրքորոշումը հստակ է և անփոփոխ՝ եթե երկխոսություն, ապա հավասարների միջև, եթե համագործակցություն, ապա այն ողջունելի է, բայց միայն փոխշահավետորեն, եթե մրցակցություն, ապա պոզիտիվ, մենք չենք վախենում նաև առճակատումից և կպայքարենք մինչև հաղթական ավարտը»,- ասել է Վան Ին միջազգային իրավիճակի և չինական դիվանագիտության վերաբերյալ  համաժողովի ժամանակ։

Վան Ին ընդգծել է, որ համագործակցությունը օգուտ կբերի երկու կողմերին, իսկ առճակատումը կվնասի բոլորին։ Նրա խոսքով՝ վերջին մեկ տարում լարվածության մեծացումը ևս մեկ անգամ ցույց տվեց, որ չին-ամերիկյան հարաբերությունների լուրջ դժվարությունների և բազմաթիվ մարտահրավերների հիմնական պատճառն այն է, որ ԱՄՆ-ը ռազմավարական առումով ոչ ճիշտ գնահատական է տվել Չինաստանին և չին-ամերիկյան հարաբերություններին: