Ձեր վստահելի աղբյուրը

«Գերիների վերադարձի գործընթացը շարունակական է լինելու, հատկապես երբ կան հաստատված գերիներ»,- լրագրողների հետ զրույցում ասաց իրավապաշտպան Սիրանուշ Սահակյանը։

Նրա խոսքով, քանի դեռ Ադրբեջանը պահում է հաստատված գերիներին, անխուսափելի է, որ վերադարձեր լինելու են։

«Դրանք հիմնականում կազմակերպվում են քաղաքական գործընթացների շրջանակում. կամ Ռուսաստանը, կամ ԱՄՆ-ն, կամ Եվրոպական Միությունը, այլ ազդեցիկ պետություններ, իրենց քաղաքական ազդեցությունն օգտագործելով՝ կազմակերպում են գերիների վերադարձը։ Այն մասնակի է, ամբողջ ծավալով չի ապահովում։ Դա էլ միգուցե  տրամաբանական է, քանի որ կան ընթացող մեծ գործընթացներ՝ քաղաքական, որտեղ ներգրաված են միջազգային դերակատարները և ահա այս պրոցեսի շրջանակներում նաև լուծվում են  որոշ մարդասիրական խնդիրներ», - ասաց նա։

Ս.Սահակյանը հայտնեց, որ այս պահին Ադրբեջանում հաստատված շուրջ 50 հայ գերի կա, իսկ չպաշտոնականացված՝ հավելյալ 80 անձի մասին է խոսքը։

«Գործնականորեն չի կարող լինելու գերու վերադարձ առանց նրա գերեվարման պաշտոնականացման։ Այս խմբի մասով խնդիրներն ավելի բարդ են։ Նախ պետք է ապացույցների ճնշման ներքո հասնել մի վիճակի, երբ Ադրբեջանն ընդունում է  նրանց գերեվարված լինելը անկախ հետագա զարգացումներից, առնվազն այն անձանց մասով, ովքեր դեռևս ողջ են, նոր քննարկումներ լինեն  հայրենադարձության մասով։ Երկու մակարդակի խնդիր ունենք՝ կարողանալ կոտրել Ադրբեջանի այս քաղաքական մոտեցումը, որը հայտարարվեց փետրվարին՝ այլևս գերիներ չեն պահվում Ադրբեջանում, ընդունեն, որ պատերազմից մնացած անձինք կան, ովքեր թեև գերեվարված են եղել, բայց պետությունը չի ընդունել, այժմ ընդունում է և նոր դրան կհաջորդի հայրենադարձությունը»,- մանրամասնեց իրավապաշտպանը։

Խոսելով Հայաստան վերադարձած գերիների նկատմամբ իրականացվող իրավական գործընթացների մասին, Սիրանուշ Սահակյանն ասաց, որ  անթույլատրելի էր հրապարակային դաշտում խոսել գերիների նկատմամբ քրեական հետապնդումների մասին։

«Իրավական ու բարոյական առումով չեմ կարծում, որ նրանց կալանավորելու հիմքեր գոյություն ունեն։ Նրանց առողջական վիճակն ու այլ հանգամանքներ իսկապես չեն արդադացնում անազատությունը։ Ես չեմ տեսնում նաև ռիսկեր նրանց փախուստի դիմելու, քննությունից թաքնվելու կամ քննությանը խոչընդոտելու առումով։ Եթե նրանք փախուստի դիմելու նպատակ ունենային, ուղղակի կտեղափոխվեին իրենց կամարտահայտության հիման վրա երրորդ երկիր», - նշեց նա։

Իրավապաշտանի կարծիքով, գերիներն, անկախ իրենց մեղսագրվող արարքներից, պետք է մնան ազատության մեջ,  նրանց առնչությամբ կարող են խափանման այլ միջոցներ կիրառվել ու քննությունը, երբ հանգամանալից կկազմակերպվի ու արդյունքներ կտա, այդ ժամանակ նոր պետք է խոսել, թե ինչ արարքներ են կատարվել, դրանք հիմնավոր են, թե ոչ։

«Ինչպես ես կանխատեսում էի՝ Ադրբեջանը դա շահարկելու էր ու կարճ ժամանակ անց հայտարարեց, որ հայ գերիներին իրենք վերադարձնում են, իսկ  Հայաստանում նրանց ձերբակալում են, կալանավորում են, խոշտանգում են։ Կարճ ժամանակ անց միջազգային ատյաններում կտեսնեք, թե ինչպես են կասկածի տակ դնում գերիների ցուցմունքները, որտեղ նրանք հայտնել են խոշտանգումների կամ այլ հանգամանքների մասին։ Ադրբեջանը փորձելու է ներկայացնել, որ այդ անձինք ոչ թե խոշտանգվել են, այլ Հայաստանի սպառնալիքի ներքո տվել են սուտ ցուցմունքներ խոշտանգումների մասին։ Պետք է ավելի զգուշավոր գործել, անգամ եթե հիմքեր կան և քննություն պետք է իրականացվի, դա չպետք է լինի հրապարակային», - ասաց Սիրանուշ Սահակյանը։