Ձեր վստահելի աղբյուրը

«Արցախյան այս վերջին պատերազմն ուղեկցվեց աղետաբեր հետևանքներով, ադրբեջանական պատերազմական հանցանքներով, որոնք կատարվեցին ոչ միայն զինծառայողների, նաև խաղաղ բնակիչների նկատմամբ, ավերվեցին բնակավայրեր»,- 44-օրյա պատերազմում զոհված Գևորգ Արշակյանի հիշատակին նվիրված մրցանակաբաշխությանն ասաց ՀՀ Մարդու իրավունքների պաշտպան Արման Թաթոյանը։

Նա նշեց, որ պատերազմի ողջ ընթացքում այդ հանցանքներից, դաժանություններից մեր հայրենակիցների, բնակավայրերի անվտանգությունը  շարունակում էին պաշտպանել մեր զինվորները, որոնք, իրենց կյանքը չխնայելով, մեր կյանքն ու անվտանգությունն էին ապահովում։

«Նրանց պետք է անընդհատ մեծարենք, արժևորենք մեր հերոսներին»,- ասաց Ա. Թաթոյանը։

Նա հայտնեց, որ այս միջոցառումը նվիրված է 44-օրյա պատերազմում զոհված, «Մարտական խաչ» առաջին աստիճանի շքանշանակիր Գևորգ Արշակյանի հիշատակին ու Արշակյանի անվան մրցանակաբաշխությանը։

«Գաղափար առաջացավ, որը, կարծում եմ, կլինի շարունակական՝ գնահատել մեր հերոսներին, բայց նաև նրանց անունը, հիշատակը վառ պահելով՝ գնահատել մեր այն հայրենակիցներին, ովքեր պատերազմի ընթացքում օրուգիշեր չխնայելով իրենց՝ աշխատել են լուսաբանումների հարցում, բժշկական օգնություն ցուցաբերելով, նաև իրավապաշտպաններն ու փաստաբանները, որոնք բացառիկ աշխատանք են տարել հիմքեր ապահովելու, հետագայում կանխարգելելու այն ցեղասպան քաղաքականությունը, որ տարվել է»,- ասաց Ա. Թաթոյանը։

Իրավապաշտպան Սիրանուշ Սահակյանը նշեց, որ չափազանց կարևորել են որոշ մասնագետների դերը պատերազմի ու հետպատերազմյան ժամանակաշրջանում՝ լրագրողներ, բժիշկներ, իրավաբաններ։

«Մենք կարևորել ենք, որ պատերազմի ընթացքում հերոսություն իրականացրած մեր տղաների անունը վառ մնա, հետագա սերունդները դաստիարակվեն նրանց օրինակով նույնքան հայրենասեր ու քաջ, որքան մեր հերոսները։

Այս առումով Գևորգ Արշակյանը սիմվոլիզմ է։ Թեև այս պահին մենք կարևորել ենք և նախաձեռել ենք նրա անվան մրցանակը, սակայն, կարծում եմ, այն ունենալու է շարունակականություն, վստահ եմ՝ այս անվանակարգերը ստեղծվելու են այլ հերոսների անուններով»,- ասաց նա։ 

Գևորգ Արշակյանի մայրը՝  Նաիրա Հովսեփյանը, շնորհակալություն հայտնեց  Սիրանուշ Սահակյանին, Արման Թաթոյանին, ԵՊԲՀ ռեկտոր Արմեն Մուրադյանին այս միջոցառմանն աջացելու համար։

«Ընդգծված շնորհակալություն Սիրանուշ Սահակյանին,  ամեն ինչ արել է, որ այս միջոցառումը լինի»,- ասաց  տիկին Նունեն։

Ադրբեջանական պատերազմական հանցագործությունների վերաբերյալ հավաքագրված փաստերի և միջազգային կառույցներին ներկայացնելու գործում իրավական գնահատականների, ձևակերպումների հարցում հետևողական ջանքերի համար 44-օրյա պատերազմում զոհված, «Մարտական խաչ» առաջին աստիճանի շքանշանակիր Գևորգ Արշակյանի անվան մրցանակաբաշխության պատվոգիր տրվեց միջազգային իրավունքի մասնագետ, փաստաբան Լևոն Գևորգյանին։

«Անչափ զգացված ու զարմացած եմ, նաև պարտավորված։ Կարծում եմ՝ ոչ ոք ավելի շատ արժանի չէ այս պատվոգրին, քան տիկին Սիրանուշ Սահակյանը»,- ասաց Լ. Գևորգյանը։

44-օրյա պատերազմի ընթացքում ցուցաբերած բացառիկ մարդասիրական նվիրումի համար պատվոգրեր տրվեցին «Զինվորի տուն» վերականգնողական կենտրոնի բժիշկներ Հասմիկ Դավթյանին, Լուսինե Պողոսյանին, Գոհար Բաղդասարյանին,  ռազմաբժիշկ, ռազմաճակատում կյանքեր փրկած Արմեն Հարությունյանին։

44-օրյա պատերազմի վերաբերյալ հետաքննությունների և մարդու իրավունքների խնդիրները հետևողականորեն բարձրաձայնելու և լուսաբանելու համար պատվոգիրը տրվեց «Հետք» լրատվամիջոցին։

ԵՊՀ փիլիսոփայության և հոգեբանության, իրավագիտության ֆակուլտետների և ՀՀ ՊՆ Վազգեն Սարգսյանի անվան ռազմական համալսարանի շրջանավարտ Գևորգ Արշակյանը սեպտեմբերի 28-ին համալսարանական իր ընկերների հետ ձևավորել էր կամավորական դասակ և մեկնել Արցախ՝ պաշտպանելու հայրենի հողը: Երբ ընկերները հերթափոխ էին իրականացրել և վերադարձել տուն՝ սպասելով, թե երբ պիտի նորից վերադառնան մարտի դաշտ, Գևորգն առանց վարանելու մեկնել էր Շուշի, որ իր պաշտելի բարձունքը կանգուն մնա: Հենց այնտեղ էլ հայրենիքի պաշտպանության սուրբ գործն իրականացնելիս Գևորգը հերոսաբար զոհվել է: