Ձեր վստահելի աղբյուրը

Արմավիրի մարզի խոշորացված Փարաքար համայնքում լարված իրավիճակ է։ Բազմաթիվ մարդիկ են հավաքվել համայնքապետարանի դիմաց՝ իրենց բողոքն արտահայտելու ՏԻՄ ընտրություններից հետո ստեղծված իրավիճակի վերաբերյալ։

Բանն այն է, որ այստեղ դեկտեմբերի 5-ին կայացած քվեարկության արդյունքում առավել մեծ թվով ձայներ հավաքել է «Ապրելու երկիր» կուսակցությունը՝  4 637 քվե։ «Դավիթ Մինասյան» դաշինքը ստացել է 2 227 քվե, ՔՊ-ն՝ 2 609 քվե։ Երեկ երեկոյան «Ապրելու երկիր» կուսակցությունը հայտարարել է, որ համայնքապետ է ընտրվել Վալոդյա Գրիգորյանը, իսկ Դավիթ Մինասյանը պնդում է, որ ավագանու նիստում ինքն է ընտրվել։

«Մենք ուզում ենք, որ Վալոդյա Գրիգորյանն օրինական ճանապարհով դառնա համայնքի ղեկավար։ Իրենք անում են անօրինական գործողություններ»,-լրագրողների հետ զրույցում հայտարարեց բնակիչներից մեկը։

Նա մանրամասնեց է, երեկ տեղի ունեցած նիստում Գրիգորյանն ընտրվել է 10 կողմ, 0 դեմ ձայնով։ Այսօր նրա աշխատանքային առաջին օրն է։ Համայնքապետարանում հայտնաբերել են, որ կնիքը չկա։

«Ում հարցնում են՝ ասում են, որ պեչատը չկա, չգիտենք՝ որտեղ է։ Այն պետք է լինի, որ Վալոդյա Գրիգորյանի ընտրվելու մասին որոշումը կնքվի, ուղարկվի համապատասխան մարմիններին։ Ասում են՝ Դավիթ Մինասյանի մոտ է, բայց ինքը վաղուց լիազորված չէ գործել որպես համայնքապետ»,-ասաց բնակիչը։

Վալոդյա Գրիգորյանը լրագրողների հետ զրույցում ասաց, ակցիան ինքը չի կազմակերպել։

Նրա խոսքով, երեկ բոլոր ընթացակարգերին համապատասխան ավագանու նիստ են հրավիրել, դրա մասին տեղեկացված են եղել մյուս երկու ուժերը, սակայն փաստաթղթի բացակայության պատճառով չեն մասնակցել։  Նիստին մասնակցել են «Ապրելու երկիր» կուսակցության ընտրացուցակով ընտրված ավագանու անդամները։ Գրիգորյանն ասաց՝ առաջադրվել է իր թեկնածությունը, ինքն ընտրվել է։

«Ես գիտեմ մի բան, որ կա կարգ, ու կարգը պահպանվել է։ Նիստը փակված ենք համարել, հաջորդ նիստը նշանակվել է հունվարի 8-ին, ծափահարություններով ամփոփել ենք ու տուն ենք գնացել»,-ասաց Գրիգորյանը։

Նրա խոսքով, իրենց հրավիրած նիստից հետո ևս մեկ նիստ են հրավիրել մյուս երկու քաղաքական ուժերը, որի ընթացքում ընտրել են Դավիթ Մինասյանին։

Վ. Գրիգորյանը հայտարարեց, որ հանուն արդարության ինքը պայքարելու է։

«Չեմ ուզում, որ սա նմանվի քցոցու։ Իսկ քցողը հաստատ մենք չենք»,-ասաց նա՝ ավելացնելով, որ պատրաստ է համագործակցության մյուս ուժերի հետ։