Ձեր վստահելի աղբյուրը

«Անկարայի կողմից հայ-թուրքական հարաբերությունների հարցում նշանակված բանագնացը, կարծում եմ 21-րդ դարում Թուրքիայի լավագույն դիվանագետներից է»,- ասուլիսում Հայաստանի հետ բանակցություններում Թուրքիայի հատուկ ներկայացուցիչ նշանակված Սերդար Քըլըչին գնահատելիս ասաց միջազգայնագետ Սուրեն Սարգսյանը։

Տեղեկացնելով, որ ԱՄՆ-ում հետևել է Քըլըչի գործունեությանը՝ բանախոսը շեշտեց, որ տեսել է, թե ինչպես էր նա հայկական ցանկացած նախաձեռնություն բնում խեղդում:

Սուրեն Սարգսյանը շեշտեց, որ Քըլըչի հետ բանակցելու համար Հայաստանը ներկայացնում է բանագնացի, որը դիվանագիտական ծառայության փորձ չունի, առավել ևս՝ բանակցություններ վարելու հարցում:

Արձանագրելով, որ դիվանագիտությունն արտաքին քաղաքականության գործիքներից մեկն է՝ միջազգայնագետը պնդեց, որ այսօր Հայաստանը չունի արտաքին քաղաքականություն, դրա փոխարեն գնում են շատ թևթև դիվանագիտական ինչ-որ պրոցեսներ:

Սուրեն Սարգսյանն ասաց, որ հարաբերություններ հաստատելու դեպքում Թուրքիան Հայաստանի նկատմամբ կարող է տնտեսական էքսպանսիա իրականացնել, ամբողջությամբ իր ազդեցության տակ վերցնելով տնտեսական ենթակառուցվածքները՝ սկսած գործարաններից, վերջացրած հողամասերով և հողակտորներով:

«Ես չեմ բացառում, որ որոշ ոտնձգություններ լինեն Սյունիքի նկատմամբ, ես չեմ խոսում ճանապարհների մասին,այլ՝ ողջ Սյունիքի»,- ասաց միջազգայնագետը:

Նկատելով, որ Ադրբեջանը՝ նաև Թուրքիայի հորդորով Հայաստանի տարբեր հատվածներում տեղակայել է իր զինված ուժերը՝ Սարգսյանը հայտարարեց. «Հունիս ամսից ադրբեջանցիները եկել նստել են Սև լճի սահմաններում և այդտեղ հայկական կողմից որևէ գործողություն չի արվում, կարծես թե լուռ համաձայնություն կա այդ ուղղությամբ»:

Նա բացատրեց, որ թուրքական կողմը փորձում է մաքսիմալ պոկել, քանի դեռ Հայաստանը թույլ է, քանի որ պատմությունը զսպանակաձև է և կգա մի պահ, որ նրանք չեն ունենա այդ հնարավորությունը:

Պնդելով, որ Հայաստանն իր պատմության ամենածանր փուլերից մեկն է ապրում՝ Սուրեն Սարգսյանն ասաց. «Մեր իմունային համակարգի վերականգնման որևէ գործիք չունեմ, քանի որ ինչ փորձում ենք չի աշխատում»:

Միջազգայնագետն անդրադարձավ նաև Անդրկովկասում Թուրքիայի գործողություններին ու թիրախներին և նշեց, որ վերջինս երբ ցանկանում է աշխարհի որևէ հատվածում ներգրավվել՝ այն անում է ռազմական կոնֆլիկտով, որից հետո պնդում է, որ այդտեղ ինքը մասնաբաժին ունի, ինչպես արեց Սիրիայում, Լիբիայում և Հարավային Կովկասում:

Սարգսյանը նկատեց, որ 5 տարի առաջ Թուրքիան Հարավային Կովկասում այն չափ ներկայացված չի եղել, ինչպես այսօր և պնդեց, որ այսօր արդեն Անկարան այստեղ ունի իր մասնաբաժինը:

Նրա խոսքով՝ Ռուսաստանը մեծ խնդիրներ ունի և դրանք միայն Հարավային Կովկասում չեն, հետևաբար՝ նրա նման հզոր պետության համար բարդ է սպասարկել մի քանի ուղղություններ:

«Բնականաբար, Ռուսաստանն ինչ-որ տեղերում ստիպված է լինում նահանջել, հաճախ՝ իր շահերի հաշվին, հաճախ էլ՝ ոչ իր շահերի հաշվին»,- ասաց Սուրեն Սարգսյանը և տեղեկացրեց, որ 2-րդ Համաշխարհային պատերազմից հետո ՌԴ-ն իր արևմտյան սահմաններում այդքան կուտակված զինված ուժեր երբևէ չի ունեցել, ինչքան հիմա Ուկրաինայում և սահմանակից եվրոպական մյուս երկրներում:

Միջազգայնագետը դիտարկեց սցենարը, երբ Ուկրանիայի հետ հավանական կոնֆլիկտի ժամանակ հնարավոր է Ռուսաստանի համար բացեն մեկ այլ ճակատ, որի ամենահարմար տեղը Անդրկովկասն է:

«Թուրքիան կարող է շատ հմտորեն օգտվել այդ հնարավորությունից և վերցնել Սյունիքը»,- ասաց բանախոսը:

Նա նկատեց, որ Հայաստանում 2018 թվականին էլ արտաքին տարբեր ուժեր մրցակցել են և պատահական չհամարեց ՀՀ երրորդ նախագահ Սերժ Սարգսյանի այն հայտարարությունը, որ այն ժամանակ իր դեմ արտաքին ուժեր կային:

«Այսօր եկել է Ալիևի վարձահատույց լինելու ժամանակը, նա պետք է Թուրքիային, Իսրայելին, Պակիստանին ինչ-որ բան տա, քանի որ նրանք պատերազմում օգնել են և՝ ոչ իր սիրուն աչքերի համար, այլ ակնկալիքներ են ուենցել»,- անդրադառնալով հետպատերազմյան աշխարհաքաղաքական տարածաշրջանային վերաձևավորման հարցին՝ ասաց Սուրեն Սարգսյանը և նկատեց, որ Իսրայելի պարագայում Բաքուն կարող է վարձահատույց լինել հակաիրանական գործընթացով, Թուրքիայի պարագայում՝ հակառուսական գործողություններով:

Միջազգայնագետը պնդեց, որ Ադրբեջանը խնդիր է ունենալու թյուրքական երկրներին միանալու Թուրքիայի պարտադրանքի և ԵԱՏՄ մտնելու Ռուսաստանի առաջարկի ընտրության հարցում: