Ձեր վստահելի աղբյուրը

Վարչական դատարանը մերժել է «Միասնական Վարդենիս» դաշինքի ներկայացրած բողոքը Վարդենիս համայնքի ՏԻՄ ընտրությունների հետ կապված։ Այս մասին լրագրողներին ասաց «Միասնական Վարդենիս» դաշինքի փաստաբան Արթուր Հովհաննիսյանը՝ նշելով, որ դատական իշխանությունն այս դեպքում իր բարձունքին չեղավ, չկանգնեց քաղաքացու քվեի կողքին։

«Տեղական ինքնակառավարման մարմինների ձևավորման ժամանակ, փաստորեն, քաղաքացիների կամքը չի իրականացվում և դատական իշխանությունն էլ իր այս վճռով  չպաշտպանեց քաղաքացու քվեն»,- հավելեց փաստաբանը։ 

Նա նշեց, որ վարչական դատարանը նման գործերը 5 դատավորի կազմով է քննում, դատավորներից մեկի մոտ կա հատուկ կարծիք. «Ենթադրում եմ ի օգուտ «Միասնական Վարդենիսի» է։ Իմ կարծիքով, դատարանը գտել է, որ հայցը ենթակա էր բավարարման, այսինքն մի դատավոր ամեն դեպքում ավելի անկախ է գտնվել ու փորձել է ինչ-որ կերպով աջակցել տեղական ինքնակառավարման  ձևավորմանը, քաղաքացիների սահմանադրական իրավունքների իրականացմանը»։

Նա մանրամասնեց, որ «Միասնական Վարդենիսը» վիճարկել էր 21 Տարածքային ընտրական հանձնաժողովի որոշումը, որով ՏԻՄ ընտրություններում Վարդենիս համայնքի մանդատները բաշխվել են հետևյալ կերպ՝ ՔՊ-ին 13, «Ահարոն Խաչատրյան» դաշինքին 10 և «Միասնական Վարդենիսին» 4։ Ըստ նրա, մինչև այդ՝ դեկտեմբերի 5-ին, արդյունքներն այլ կերպ էին բաշխված՝ «Միասնական Վարդենիսն» ուներ 5,  «Ահարոն Խաչատրյան» դաշինքը 10, իսկ ՔՊ-ն 12 մանդատ։

Ա. Հովհաննիսյանը նշեց, որ ընտրության նախնական արդյունքները «Միասնական Վարդենիս» դաշինքի կողմից չէին բողոքրվել, քանի որ արդյունքները, ըստ էության, ձեռնտու էին, նույնիսկ եթե կային որոշակի խախտումներ։

«Մենք գտել ենք, որ արդյունքները բավարար են, անկախ նրանից՝ խատումներ կային, թե ոչ։ Դրանից հետո ՔՊ-ն միջնորդում է  վերահաշվարկ իրականացնել։ 6 տեղամասում իրականացվում է  վերահաշվարկ, որի արդյունքում 1 ձայն ավելացվում է։ Վերահաշվարկի ընթացքից տասնյութերեր կան, կարելի է տեսնել, որ այնտեղ կան քվեաթերթիկներ քվեարկված ՔՊ օգտին, որոնք ի սկզբանե տեղամասային հանձնաժողովները համարել էին անվավեր, բայց վերահաշվարկի արդյունքում տարածքային հանձնաժողովը որոշում է, որ դրանք վավեր են։  Նույնիսկ մեկ քվեաթերթիկ պատռված էր, այսինքն անվավերությունն ակնհայտ էր, որ տեղամասային հանձնաժողովը պատռել էր։  Այսինքն, տեղամասային հանձնաժողովը ճանաչել է անվավեր, վերահաշվարկի արդյունքում տարածքային հանձնաժողովի կողմից դիտվել են վավեր ու դրվել ՔՊ օգտին»,- ասաց Ա. Հովհաննիսյանը։

Նա նշեց, որ ընդհանուր մոտ 19 քվեաթերթիկ նման թերություններով մատնանշել էին վարչական դատարանին։ Միջնորդությունը բավարարվել էր, դատարան էին տարվել քվեաթերթիկներով պարկերը, ներկայացվել անվավեր քվեաթերթիկները։

«Սրանից հետ թե դատարանն ինչպես է մեր հայցը մերժում, ինչպես է արդարացնում դատարանը տարածքային հանձնաժողովի քայլը, դեռ չգիտեմ, պետք է կարդամ որոշումը»,- ասաց Հովհաննիսյանը։

Փաստաբանը հայտնեց, որ այս  տեսակ գործերը քննելիս վարչական դատարանի որոշումը վերջնական է, ուժի մեջ է մտնում հրապարակման պահից, բողոքարկման հնարավորություն չունեն։

«Իրավական մասը մի կողմ դնենք, մեր հայցը մերժեց, բայց եթե խորքային դիտում ենք, ինչ է կատարվում. այսօրվա իշխանություններն ամեն ջանք գործադրելով, տեղական ինքնակառավարման ձևավորման պրոցեսում ամեն ինչ անում են, որպեսզի կամ անցնի իր թեկնածուն, եթե իր թեկնածուն չի անցնում, խոչընդոտել  տեղական ինքնակառավարման ձևավորման պրոցեսներն այնպես, որպեսզի ոչ իշխանության ներկայացուցիչները չդառնան համայնքի ղեկավար»,- ասաց փաստաբանը՝ նշելով, որ Վարդենիսի դեպքում այս օրինակն ակնհայտ է։

«Ինչ սկզբանե ինչպես էր՝ 10, 5 և ՔՊ-ն՝ 12,  այսինքն 15/12, բավականին լավ  բալանսավորված վիճակ էր։ «Ահարոն Խաչատրյան» դաշինքը «Միասնական Վարդենիսի» հետ հուշագիր ուներ, որ համատեղ են գործելու։ Հստակ կար 15 մանդատ։ Հիմա ի՞նչ է անում իշխանությունը։

Վերահաշվարկի ապօրինի  արդյունքներով մեկ ձայն խլում է  դաշինքներից, դառնում է 14, խլած մանդատ տալիս են ՔՊ-ին,  դառնում է 14/13։ Նորից ոչ իշխանական ուժն ավելի շատ քվե ունի։ Հաջորդ քայլով ի՞նչ են անում։ Կալանավորում են «Միասնական Վարդենիս» դաշինքի համար մեկ թեկնածուին, որպեսզի չկարողանա մասնակցի ավագանու առաջին նիստին և լինեն ձայները 13/13, չընտրվի համայնքի ղեկավար»,- ասաց Ա. Հովհաննիսյանը։