Ձեր վստահելի աղբյուրը

«Իմ նկատմամբ անվստահության գործընթացի հեղինակներն ու նրանց կուսակցական ընկերներն ասում են՝ Հայկ Մարությանը շեղվել է հեղափոխական արժեքներից։ Հիմա տեսնենք, թե ով է  հրաժարվել հեղափոխական արժենքերից»,- ավագանու նիստում հայտարարեց Երևանի քաղաքապետ Հայկ Մարությանը։

Նա հիշեցրեց, երբ 2018-ի իշխանափոխությունից հետո սկսել էին աշխատել, մի օր հանկարծ իմանում են, որ կառավարության  հեղափոխական անդամները գաղտնի որոշմամբ կտրուկ բարձրացրել են իրենց աշխատավարձերը։

«Օրինակ, նախարարները մեկ ու կես մլն դրամ աշխատավարձ են ստանում, խոսքը մաքուր գումարի մասին է՝ հարկերը հանած։ Փոխնախարարները մեկ մլն դրամ են ստանում։ Հեղափոխական նախարարները՝ գաղտնի որոշմամբ։ Ես չեմ խոսում կառավարության տեխնոկրատ անդամների մասին, որոնք պրոֆեսիոնալ են ու իրենց աշխատանքի համար պետք է բարձր վարձատրվեն, ես խոսում եմ գաղափարական հեղափոխականների մասին, հեղափոխությանը մասնակցած ու դրա շնորհիվ պաշտոն ստացածների մասին։ Ես կարծում էի, որ հեղափոխության նպատակը պետք է լինի բարելավել ուրիշների կյանքը, բայց իրականության մեջ նրանք եկան ու սկսեցին անմիջապես բարելավել իրենց կյանքը, այն դեպքում, երբ երկրում աղքատության մակարդակը տատանվում էր 30 տոկոսի սահմաններում»,-շեշտեց Մարությանը։

Նա նշեց, որ բազմիցս այդ հարցը բարձրացրել է ՔՊ-ում, թիմի ներսում, տարբեր մակարդակներում, ոչ մի արձագանք չի եղել, կարծես, այդպես էլ պետք է լիներ։

Մարությանը նաև խոստովանեց՝ տարբեր պաշտոնյաներից, նույնիսկ ամենաբարձր ռանգի, զանգել են իրեն, թե քաղաքապետարանի այսինչ աշխատակիցը ինչ-որ վատ «քոմենթ» է գրել կամ կամ վատ գրառումը լայքել է։

«Տասնյակ նման զանգեր եմ ստացել, ի պատասխան ասել եմ, ժողովուրդ ջան, հարգելիներս, հեղափոխությունը ախր նաև դրա համար ենք արել, որ հին ժամանակների նման չլինի, քաղաքական հայացքների համար հետպանդվում էին, աշխատանքից ազատում էին։ Ասում էի՝ ցավներդ տանեմ, ախր երկիրը ֆեյսբուքով չեն կառավարում, ախր ամեն ինչ ֆեյսբուքով չի սկսվում ու վերջանում։ Հարազատներ ջան, ինձ հանգիստ թողեք, ես դրա համար չեմ այստեղ եկել, ես գործով եմ զբաղված։ Կարճ ասած, մերժում էի նման բոլոր առաջարկները։ Բայց սա դեռ ծաղիկներն են։»,-ասաց նա։

Մարությանի խոսքով, հետո իրեն սկսել են զանգել նաև տարատեսակ պաշտոնյաներ ու խնդրել իրենց հարազատների համար արտոնություններ՝ էս ծաղիկի բուդկեն այստեղ դնեն, այս շինթույլտվությունը տան, հարկ ավելացնենք, հողը ընդլայնենք։

«Բոլոր դեպքերում ստացել են նույն պատասխանը, քանի ես այստեղ եմ, ամեն ինչ արվելու է օրենքի ու օրինականության սահմաններում, բոլորը հավասր են օրենքի առաջ։ Սա տհաճ ազդակ էր ինձ համար, որովհետև  ես նման զանգեր չէի սպասում, երբ միանում էի թիմին։ Եվ ահա այդտեղ սկսեց իմ ու ՔՊ-ի միջև աշխարհայացքային խզումը, ու հիմա էս մարդիկ ասում են՝ Հայկը հեղափոխությունից շեղվել է։  Սա ասում են մարդիկ, որոնք երկրի համար էս նեղ պահին 200 հազար դոլարոնց մեքենա են գնում, ու ամբողջ քաղաքական թիմով մեկ ամիս շարունակ լծվում են արդարացնելու այդ որոշումը՝ ցույց տալու, թե ինչքան անհրաժեշտ գնում էր երկրի համար»,-ասաց Մարությանը՝ հիշեցնելով, որ երկրում 30 տոկոսանոց աղքատություն կա, Հայաստանը միջազգային գործընկերներից գումար է  խնդրում մանկապարտեզներ, ճանապարհներ կառուցելու, բյուջետային ծախսերը փակելու համար, իսկ ՔՊ-ն արդարացնում է 200 հազար դոլարանոց մեքենայի գնումը, իբր դա պետության պրեստիժի համար է։

«Ուրեմն ասեմ, հարգելինե՛րս, դա պրեստիժ չի, հակառակը՝ դա մովետոն է, դա շատ վատ տպավորություն է թողում։ Դրանով դուք անգամ խղճահարություն չեք առաջացնում դրսում, այլ միայն տարակուսանք և քմծիծաղ»,-ասաց նա։