Ձեր վստահելի աղբյուրը

«Բյուջեի վերբաշխվող 128 մլն 439 հազար դրամից 98 մլն 401 հազար դրամը դրամաշնորհային պայմանագրի հիման վրա հատկացվում է «Պատմամշակութային ժառանգության գիտահետազոտական կենտրոն» ՊՈԱԿ-ին»,-կառավարության նիստում հայտնեց  ԿԳՄՍ նախարար Վահրամ Դումանյանը՝ ներկայացնելով 2021թ բյուջեի վերաբաշխման հերթական նախագիծը:

Նախարարն ընթերցեց 98 մլն դրամի ծախսման ուղղությունները.

«-ՀՀ Լոռու մարզի Լոռի բերդ համայնքի Լոռի Բերդ ամրոցի (10-11-րդ դարեր) պարսպապատի հարավարևմտյան հատվածին և երկրորդ բաղնիքին հարող հատվածների պեղումներին,

-ՀՀ Լոռու մարզի Լոռի բերդ համայնքի Լոռի Բերդ ամրոցի միջնաբերդի պարիսպների հարավարևմտյան հատվածի եկեղեցու և երկու բաղնիքի ամրակայման, նորոգման և վերականգնման գիտանախագծային փաստաթղթերի մշակմանը,

-Լոռու մարզի Ամրակից գյուղի ռուսական եկեղեցու (1846 թ.) ամրակայման, վերականգնման և տարածքի բարեկարգման գիտանախագծային փաստաթղթերի մշակում,

-Տավուշի մարզի Սրվեղ վանական համալիրի (13-րդ դար) ամրակայման, վերականգնման և տարածքի բարեկարգման գիտանախագծային փաստաթղթերի մշակում.

-Տավուշի մարզի Տավուշ ամրոցի (10-րդ դար) պարիսպների, կից կառույցների, եկեղեցու ամրակայման վերականգնման և տարածքի բարեկարգման գիտանախագծային փաստաթղթերի մշակում»:

Դումանյանը հայտնեց, որ 20 մլն 138 հազար դրամը դրամաշնորհային պայմանագրի հիման վրա հատկացվում է «Հնագիտության և ազգագրության ինստիտուտ» ՊՈԱԿ-ին՝ ՀՀ Տավուշի մարզի Բերդ համայնքի Տավուշ ամրոցի տարածքի պեղումների իրականացման համար, իսկ  9 մլն 900 հազար դրամը հատկացվում է «ՀՀ պատմության թանգարան» ՊՈԱԿ-ին՝ Արենի 1 քարանձավից գտած մ.թ.ա. 3600-3500 թվականների հնագիտական գտածո կաշվե ոտնամանի պահպանման համար հատուկ ցուցապահարանի պատրաստման և տեղադրման աշխատանքների ձեռքբերման համար: