Ձեր վստահելի աղբյուրը

Մուսալեռցի Վրեժ Թասլակյանը Մուսա լեռան հերոսամարտից մոտ 100 տարի անց կարողացել է գնալ Մուսա լեռ ու գտնել իր հայրական տունը, որտեղ  ապրել են իր հայրն ու մայրը, երեք եղբայրները: Ծնողները ու եբայրները   Մուսա լեռան վրա անցկացրել է 40 օր, փրկվել, այնուհետև գնացել Լիբանան, որտեղ էլ ծնվել է  Վրեժ Թասլակյանը: 

«Մուսալեռցիները կռվել են հանուն փրկության, հանուն իրենց ազատության: Մուսալեռցիները երախտապարտ են ֆրանսիացի ծովակալ Լուի Դարտիժ դյու Ֆուրնեին: Եթե նա հանձն չառներ մուսալեռցիների փրկությունը, մուսալեռցիներն ընդհանարապես չէին լինի, այտեղ  չէինք լինի»,- Panorama.am-ի հետ զրույցում ասաց Վ. Թասլակյանը: 

Նա պատմեց, որ կնոջ հետ եղել է Արևմտյան Հայաստանում, վեց-յոթ գյուղ են այցելել, նաև Մուսա  լեռ. «Վեց եղբայր ենք, միայն ես եմ գտել հորս, մորս տունը»:

Վ. Թասլակյանի կինը՝ Էմմա Միքայելյանը պատմեց. «Արևմտյան Հայաստանի տարբեր գյուղերում եղանք: Այնտեղ բնակվող մարդիկ  լավ էին վերաբերվում մեզ: Մի տեղ գնացինք, տեսա, թե ինչպես է մի կին յաթաղանով ճյուղեր կտրում: Այդ պահին ես պատկերացրեցի, թե ինչպես են հենց նման յաթաղաններով սպանել հայերին: Այդ պահին թշնամանքնով լցվեցի նրանց նկատմամբ»:

Վրեժ Թասլակյանը ծնվել է 1942 թվականին Այնջարում (Լիբանան): 1946 թվականին ընտանիքի հետ ներգաղթել է Հայաստան: 1968 թվականին ավարտել է Երևանի Պոլիտեխնիկական ինստիտուտի ճարտարապետության բաժինը: 1965 թվականից  աշխատում է «Հայարդնախագիծ»  ինստիտուտում որպես ճարտարապետ: Զուգահեռաբար 1970 թվականից մինչ այսօր դասավանդում է Երևանի Ճարտարապետության և շինարարության ազգային համալսարանում, դոցենտ է, զբաղվում է նաև գիտական գորոծունեությամբ: Ունեցել է անհատական ցուցահանդեսներ: Հայաստանի քաղաքաշինության նախարարության ազգային թանգարան-ինստիտուտում  այս տարվա սեպտեմբերի 15-ին բացվել էր  Վրեժ Թասլակյանի ցուցահանդեսըը, որը նվիրված էր Մուսա լեռան հերոսամարտի 100-ամյակին: