Ձեր վստահելի աղբյուրը

«Հունվարի 29-ին երկու անգամ իրականացրել ենք գնման գործընթաց, բարձր գնի պատճառով գնում չի իրականացվել»,- ԱԺ ֆինանսավարկային և բյուջետային ու Տնտեսական հարցերի մշտական հանձնաժողովների գումարած համատեղ նիստում ՀՀ հաշվեքննիչ պալատի կողմից ՀՀ էկոնոմիկայի նախարարությունում 2021 թվականի պետական բյուջեի վեց ամիսների կատարման հաշվեքննության արդյունքների ներկայացմանն ասաց էկոնոմիկայի փոխնախարար Տիգրան Գաբրիելյանը։ Նա անդրադարձավ «Հայաստան» խմբակցության պատգամավոր Արթուր Խաչատրյանի դիտարկումներին, որ նախարարության կողմից դաբաղ և  ծաղիկ պատվաստանյութեր գնելու համար մրցույթները չեն կայացել նախարարության կողմից սխալի պատճառով,  դա եղել է գիտակցված սխալ Ավելացված արժեքի հարկի հետ կապված։

«Միայն «Ինովատոր» ՍՊԸ-ն է գնառաջարկ ներկայացրել, դրա համար մեկ անձից գնումն իրականացվել է հենց այդ ՍՊԸ-ից»,- ասաց փոխնախարարը։

Արթուր Խաչատրյանը նշեց, որ  գինը մրցունակ չի եղել, քանի որ գնի մեջ ԱԱՀ չէր ներառվել։

«Նշվում է՝ հրատապության կարգով եք մտցրել, քանի որ Արցախից 10 հազար գլուխ խոշոր կենդանի է մտել Հայաստան, որոնց  պետք էր պատվաստել։ Բայց չեմ հասկանում՝ ինչու ավելի  10 հազար գլուխ կենդանու համար  3 միլիոն 410 հազար 950 միլիլիտր  պատվաստանյութի ծավալը չեք ավելացրել, այսինքն 10 հազար ավելի կենդանի կա, բայց նույն չափաքանակը։

Մյուս կողմից՝ 3 միլիոն 410-ի փոխարեն գնել եք 3 միլիոն 12 հազար 770 միլիլիտր պատվաստանյութ։ Բացատրեք՝ ինչո՞ւ է սկզբում եղել 3 միլիոն 410 հազար չափաքանակ, հետո ասել եք՝ ավելի կենդանի կա, հետևաբար պետք է  ավելի կենդանի պատվաստել, բայց իրականում գնել եք  3 միլիոն 12 հազար, որովհետև կար պահուստավորված։ Եթե ունեիք պահուստավորված, ինչո՞ւ էիք ավելիի համար ներկայացում»,- հարցադրումներ արեց ընդդիմադիր պատգամավորը։

Նա նաև ասաց, որ հաշվետվության համաձայն կառավարությունն ապրիլին 16-ին նախարարությանը թույլատրել էր դաբաղ և ծաղիկ  պատվաստանյութերի ձեռքբերման նպատակով իրականացնել հրատապության հիմքով մեկ անձից գնում, սակայն 2021 թ. մարտի 19-ին Կենդանիների առողջության պահպանման դաշնային կենտրոնը 3 միլիոն 410 հազար 950 միլիլիտր  պատվաստանյութի համար առաջարկել է 291 միլիոն 636  հազար 220 դրամ, 1 միլիլիտրի համար 85,5 դրամ։ Այսինքն, «Ինովատորից» շուրջ մեկուկես ամիս առաջ ավելի շուտ դաշնային կենտրոնն առաջարկել է 85,5 դրամ, բայց գնումը կատարվել է մեկ աղբյուրից 96,8 դրամով։ Տեսնում ենք, որ թանկ է գնվել»։

Գաբրիելյանն ասաց, որ դաշնային կենտրոնն առաջարկել է այդ գինը, բայց հետագայում գնմանը չի մասնակցել։

«Կարծում եմ՝ դատախազությունը  պետք է  նաև պատշաճ կերպով ուշադրություն դարձնի այս հարցին, քանի որ դաշնային  կենտրոնն առաջարկություն է ներկայացնում, գնման գործընթացին չի մասնակցում, ընդ որում 2010 և 2020 թվականներին մասնակցել էր։
Գոնե կենցաղային տրամաբանության մեջ այս ընկերության վարքագիծը չի տեղավորվում»,- ասաց Արթուր Խաչատրյանը։