Ձեր վստահելի աղբյուրը

ԱԺ ֆինանսավարկային և բյուջետային ու Տնտեսական հարցերի մշտական հանձնաժողովները գումարել են համատեղ նիստ, քննարկվում է ՀՀ հաշվեքննիչ պալատի կողմից ՀՀ էկոնոմիկայի նախարարությունում ՀՀ 2021 թվականի պետական բյուջեի վեց ամիսների կատարման հաշվեքննության արդյունքների վերաբերյալ ընթացիկ եզրակացությունները:

Հիմնական զեկուցող Հաշվեքննիչ պալատի երրորդ վարչության պետ Հակոբ Միհրանյանը մանրամասն ներկայացրեց եզրակացությունը։

Հաշվեքննիչ պալատը խախտումներ է հայտնաբերվել էկոնոմիկայի նախարարության կողմից իրականացվող Գյուղատնտեսական կենդանիների պատվաստման, Գյուղատնտեսական վարկերի տոկոսադրույքների սուբսիդավորման, Գյուղատնտեսական հումքի մթերումների (գնումների) նպատակով ագրովերամշակման ոլորտին տրամադրվող վարկերի տոկոսադրույքների սուբսիդավորման, Էկոնոմիկայի ոլորտում պետական քաղաքականության մշակման ծրագրերի համակարգման և մոնիթորինգի ոլորտներում, ինչպես նաև Կորոնավիրուսի տնտեսական հետևանքների չեզոքացման նպատակով տրամադրված վարկերի տոկոսադրույքների սուբսիդավորման ծրագրի շրջանակներում։

Հակոբ Միհրանյանը հայտնեց, որ դաբաղ  պատվաստանյութի գնման մասով 2021 թ. 9 ամիսների հաշվեքննության շրջանակներում գործն առանձնացվել ու ուղարկվել է գլխավոր դատախազություն։

Ուսումնասիության համաձայն, նախարարության կողմից Դաբաղ և Ծաղիկ պատվաստանյութերի ձեռքբերման գործընթացում առկա են պլանային և կատարողական ցուցանիշների միջև անհամապատասխանություններ և հսկողական գործընթացի թերացումներ. «Վերոնշյալը հանգեցրել է 2019-21 թթ-ի ընթացքում նշված պատվաստանյութերի հրատապության հիմքով մեկ անձից գնմանը, պատվաստանյութերի ուշ մատակարարմանը և արդյունքում 2021 թ-ի հուլիսի մեկի դրությամբ Դաբաղ պատվաստանյութի գծով 326,087 հատ պակաս հակադաբաղային միջոցառման իրականցմանը։ 2021թ-ին Դաբաղ պատվաստանյութը մեկ անձից՝ միջնորդ կազմակերպությունից գնելու հետևանքով, նախարարությանը մատակարարված ապրանքի գինը գերազանցել է արտադրող կազմակերպության վաճառքի գնին, որը կազմել է 63, 099, 84 հազար դրամ»։

Նա նշեց, որ կորոնավիրուսի տնտեսական հետևանքների չեզոքացման նպատակով տրամադրված վարկերի տոկոսադրույքների սուբսիդավորման ծրագրի շրջանակներում հաշվեքննությամբ արձանագրվել են անհամապատասխանություն, հսկողական գործընթացի թերացում կապված  ծրագրով նախատեսված մոնիթորինգի իրականացման, պարտականությունների կատարման,  նախարարության և ֆինանսական կառույցների հետ կնքված պայմանագրերի մասով։ Անհամապատասխանությունը հանգեցրել է խեղաթյուրման 1, 249, 486, 37 հազար դրամ գումարի չափով։

Հաշվեքննիչ պալատի երրորդ վարչության պետի ներկայացմամբ, 2021 թ. տարեսկզբին նախարարությունում հաստատված հաստիքացուցակով 459 հաստիքային միավոր է արձանագրված եղել, 112-ը թափուր։ Կիսամյակի վերջում հաստիքացուցակում կատարված փոփոխության հետևանքով հաստիքների թիվը կազմել է 390 հաստիքային միավոր, որից 87-ը թափուր, այդ թվում  69-ը դեռևս տարեսկզբից։

«Չի կատարվել Քաղաքացիական ծառայության մասին օրենքի 10-րդ հոդվածի պահանջները՝ քաղծառայության պաշտոնը թափուր մնալուց հետո երեք ամսում պետք է հայտարարվի մրցույթ»,- նշեց Միհրանյանը։

Նա նաև հայտնեց, որ պարգևավճարների ուսումնասիրության արդյունքների համաձայն, նախարարության աշխատակիցները նախատեսված խնայողություններից 2021 թ. վեց ամիսների ընթացքում պարգևատրվել են շուրջ 121 միլիոն դրամ գումարի չափով։ Նշված խնայողություններն առաջացել են վեց ամսում նախարարության  հաստիքացուցակով հաստատված թափուր պաշտոնները չհամալրելու արդյունքով։

««Աշխատողների  աշխատավարձեր և հավելավճարներ» հոդվածով նախատեսված խնայողություններից պարգևատրելը հակասում է էկոնոմիկայի նախարարի 2007 թ. հունվարի 9-ի հրամանի պահանջներին»,- ասաց Հաշվեքննիչ պալատի  երրորդ վարչության պետը։

ԱԺ «Հայաստան» խմբակցության պատգամավոր Արթուր Խաչատրյանը ողջունեց Հաշվեքննիչ պալատի քայլը գլխավոր դատախազություն դիմելու հետ կապված. «Կոռուպցիան հո պոզով պոչով չի լինում, որովհետև այստեղ ունենք առերևույթ 34 միլիոն դրամի չարաշահում»։

Այնուհետև ընդդիմադիր պատգամավորը խնդրեց հստակ նշել, որ նախարարության կողմից դաբաղ և  ծաղիկ պատվաստանյութեր գնելու համար մրցույթները չեն կայացել նախարարության կողմից սխալի պատճառով։

«Իմ կարծիքով, դա եղել է գիտակցված սխալ Ավելացված արժեքի հարկի հետ կապված»,- ասաց Ա. Խաչատրյանը։

Խնդրեց նաև հաստատել, որ Հաշվեքննիչ պալատի կողմից դատախազություն դիմելու հանգամանքը չէր առաջանա, եթե մրցույթները ճիշտ կազմակերպած լինեին։

«Հաստատեք, որ կա կասկած, որ առնվազն 133 միլիոն դրամի ավելի վարկ է տրամադրվել ընկերություններին, որոնք չեն ուղղվել մթերողներին։ Հաստատեք, որ որոշ ընկերություններին վարկը տրամադրվել է պայմանների կոպիտ խախտմամբ և մոնիթորինգ չի  իրականացվել»,- ասաց «Հայաստան» խմբակցության պատգամավորը։

Նա նաև ասաց, որ հստակ նշեն՝ նախարարության կողմից կորոնավիրուսի հետ կապված ծրագրով տրամադրվել են մոտ 2 միլիարդ դրամից ավելի գումար առանց որևէ մոնիթորինգ անելու և հասկանալի չէ, թե այդ փողերն ուր են գնացել։

Ա. Խաչատրյանը նաև հետաքրքրվեց՝ արդյոք նախարարությունում գործում է ներքին աուդիտի ստորաբաժանում, թե արտապատվիրակվել է մասնավոր ընկերությունների։

Տնտեսական հարցերի մշտական հանձնաժողով նախագահ, «Քաղաքացիական պայմանագիր» խմբակցության պատգամավոր Գևորգ Պապոյանը ասաց, որ պարոն Խաչատրյանն արձանագրեց այն, ինչ կար, բայց այլ ձևակերպումներով։

«Ես խնդրեցի պարոն Միհրանյանին, որ վերահաստատի»,- արձագանքեց Ա. Խաչատրյանը։

Ինչ վերաբերում է նախարարությունում ներքին աուդիտի ստորաբաժանմանը, Միհրանյանն ասաց, որ արտապատվիրակված է։