Ձեր վստահելի աղբյուրը

«Իշխանությունը ՏԻՄ-ից գողանում է իշխանությունը։ Քրեական օրենսգրքում նման կետ կա, իշխանության յուրացում».-Վանաձորի ավագանու չկայացած նիստից հետո լրագրողների հետ զրույցում ասաց  «Հայրենիք» կուսակցության քաղխորհրդի անդամ Արսեն Բաբայանը։

Հիշեցնենք, որ այսօրվա կարճատև նիստին մասնակցում էին  ավագանու միայն «Մամիկոն Ասլանյան» և «Հայրենիք» խմբակցությունների անդամները։

«Նիկոլ Փաշինյանի ուղիղ հանձնարարությամբ մշտական հաճախորդ Էդմոն Մարուքյանի ղեկավարած կառույցը, ինչպես նաև դատարանը մասնակից են դառնում այս հանցագործությանը։ Սա ակնհայտ, բացահայտ հանցագործություն է։ Ընտրողների մեծամասնությունն իր քվեն տվել է մեկ անձի, իսկ Նիկոլ Փաշինյանն ու նրան սպասարկող Էդմոն Մարուքյանը, նրան սպասարկող դատարանն ու այլ ուժեր, որոնց մենք գիտենք, փորձում են խլել իշխանությունը, որպեսզի իրենց ուզած մարդուն դնեն քաղաքապետ։ Շատ պարզ բան տեղի ունեցավ, իրավական բեսպրեդել, որն այս իշխանությունների համար արդեն սովորական է»,-ասաց նա։

Իրավաբան Բաբայանը մանրամասնեց, թե ինչ է կատարվել։ Ընտրությունների արդյունքները վիճարկելու համար «Լուսավոր Հայաստան» կուսակցությունը դիմել է վարչական դատարան։ Դատարանը որոշում է կայացրել, որը մեր օրենսդրությամբ բողոքարկման ենթակա չէ։ Սակայն «Լուսավոր Հայաստան»-ն այնուամենայնիվ որոշել է բողոքարկել։

«Մինչ վերաքննիչ վարչական դատարանը կասի, որ այս ակտը ենթակա չէ բողոքարկման, հանցակից են դարձնում մեկ ուրիշ դատավորի, որն ասում է՝ արգելել համայնքի ղեկավարի ընտրությունն ավագանու կողմից, մինչև վերաքննիչ վարչական դատարանը կընդունի որոշում»,-ասաց Բաբայանը։

Այս առումով նա հիշեցրեց Նիկոլ Փաշինյանի՝ բազմիցս արած հայտարարություններն այն մասին, թե ժողովուրդն է ամեն ինչ որոշում, եթե ժողովուրդը որոշի, ինքը կկանգնի գնդակահարության պատի տակ։

«Ժողովուրդն այստեղ որոշել է, որ քեզ պատի տակ սատկացնելու է։  Վարդենիսում,  Փարաքարում նույն վիճակն է։ Այն համայնքներում, որտեղ պարտվել է այս իշխանությունը, ռեպրեսիաներով, իրավապահ համակարգով, գրապանում եղած քաղաքական ուժերին օգտագործելով գնում է  այն ճանապարհով, որպեսզի ժողովրդի կատարած ընտրությունը չկայանա»,-ասաց «Հայրենիք» կուսակցության քաղխորհրդի անդամը։

Արսեն Բաբայանի խոսքով, նույնիսկ Մամիկոն Ասլանյանին անազատության մեջ պահելով ավագանու անդամների հավասար քվեներ ստանալու դեպքում համայնքապետ է ընտրվելու Մամիկոն Ասլանյանը։

«Նրանց պետք է ժամանակ, որպեսզի կարողանան ավագանու անդամներից գողանան, ճնշեն, դատապարտեն, պատանդառեն, կատարեն ցանկացած այլ ապօրինի գործողություն, որ հասնեն իրենց նպատակին։ Ես մի վատ բան էլ իմացա, դատավորը, որ կայացրել է այդ ապօրինի որոշումը, Մամիկոն Ասլանյանի՝ երկար տարիների ընկերն է։ Այս պատմության մեջ ամենածանրը դա էր»,-ասաց Բաբայանը՝ ընդգծելով, որ իրավունքը Հայաստանում 2018-2019 թվականներին սպանվել է, Հայաստանում տեղի է ունենում իրավական բանդիտիզմ։