Ձեր վստահելի աղբյուրը

««Լուսավոր Հայաստանի»-ի հետ երբեք առևտի մեջ չենք մտել։ 2016-ին այդ կուսակցությունը Վանաձորի ավագանիում ունեցել է տասը մանդատ, այսօր ունի զրո մանդատ»,-լրագրողների հետ զրույցում հայտարարեց Վանաձորի ավագանու «Մամիկոն Ասլանյան» խմբակցության ղեկավար Արթուր Օհանյանը՝ արձագանքելով այն հարցին, թե Վանաձորում այսօր ում հետ է առևտուր անում «Լուսավոր Հայաստան» կուսակցությունը։

Օհանյանն ասաց՝ վանաձորցին իր գնահատականը տվել է «Լուսավոր Հայաստան»-ի քաղաքական գծին, գործողություններին։

««Լուսավոր Հայաստան» կուսակցությունը մոտ մեկ ու կես տարի՝ 2016-2018-ին խաթարել է այս քաղաքի գործընթացները, այսօր եկել է այդ պտուղները քաղելու ժամանակը, ինքը ստացել է այդ պտուղները»,-ասաց Օհանյանը։

Նա նաև նշեց,  «Մամիկոն Ասլանյան» դաշինքի ընտրացուցակը գլխավորող Ասլանյանի փաստաբանական խումբը դիմելու է Վարչական դատարան, ՄԻԵԴ՝ վերականգնելու անազատության մեջ պահվող Մամիկոն Ասլանյանի ընտրելու և ընտրվելու  իրավունքները։  Վանաձորի ընտրություններում հաղթանակ տանելուց հետո կալանավորված Մամիկոն Ասլանյանն այսօր ավագանու կարճատև նիստին չէր մասնակցում։

Հիշեցնենք, որ դեկտեմբերի 5-ին կայացած ՏԻՄ համամասնական ընտրությունների արդյունքում Էդմոն Մարուքյանի ծննդավայր Վանաձորում մերժեցին նրա ղեկավարած կուսակցությանը։ Ընրողների ձայների առնվազն 4 տոկոսը չստանալու հետևանքով «Լուսավոր Հայաստան» կուսակցությունը չընդգրկվեց Վանաձորի ավագանու կազմում։

ԼՀԿ-ն դիմել է Վերաքննիչ վարչական դատարան՝ բողոքարկելու արդյունքները, դատարանը որպես հայցի ապահովման միջոց արգելել է Վանաձորի ավագանու նիստ անցկացնել, համայնքապետ ընտրել, ինչի հետևանքով այսօր նախատեսված անդրանիկ նիստը չկայացավ։