Ձեր վստահելի աղբյուրը

ՊՇՌ թեստավորումը քաղաքացիների հաշվին իրականացնելու առողջապահության նախարար Անահիտ Ավանեսյանի հրամանը ՍԴ կողմից հակասահմանադրական ու անվավեր ճանաչելուց, դրան հաջորդած առողջապահության նախարարության հայտարարությունից հետո, թե  պետությունը արտոնյալ և անվճար պայմաններով չի երաշխավորում ՊՇՌ թեստավորումը, աշխատողներն ամեն դեպքում պետք է իրականացնեն թեստավորում, քաղաքացիներին հետաքրքրում է՝ ի վերջո ո՞վ է վճարելու ՊՇՌ թեստի գումարը։

«Հայաստան» խմբակցության պատգամավոր, ՍԴ-ում ՍԴ դիմած պատգավորների ներկայացուցիչ Արամ Վարդևանյանն արձագանքելով այդ հարցադրմանը, գրել է. «Իմ կարծիքը հստակ է՝ պարգևատրումների լիքը գումար ունեցող կառավարությունը»։

Ֆեյսբուքյան ուղիղ եթերում Արամ Վարդևանյանն ասել է, որ առողջապահության նախարարության հայտարարությանը պետք է փորձել ըմբռնումով մոտենալ, բայց մյուս կողմից պետք է հարցին մոտենալ այլ մասով. «Եթե նույնիսկ ըմբռնում մոտենում ենք, իսկ ի՞նչ պետք է անել այն հարյուր հազարավոր մարդկանց դեպքում, որոնք այդ ժամանակահատվածում հակասահմանադրական հրամանի նման ձևակերպմամբ ծախսել են միջոցներ»։

Նրա խոսքով, ՀՀ-ում պետք է ձևավորվի քաղաքական պատասխանատվության ինստիտուտը. «Դրա ձևավորման համար ճանապարհներից մեկն այն է, երբ ՍԴ-ն ակնհայտ հարցերում գնահատական է  տալիս և ճանաչում է  սահմանադրությանը հակասող և անվավեր ինչ-որ մի գործողություն, դրույթ կամ այդ դրույթի հեղինակի վարքագիծը, պետք է հետևանք ունենա։ Դրա հետևանքը չպետք է լինի էմոցիոնալ բնույթի հայտարարությունները»։

Արամ Վարդևանյանը նշել է, որ միջազգային փորձի համաձայն՝ մարդիկ պետք է կամ պատվաստվեն կամ թեստ հանձնեն, բայց նույն միջազգային փորձն ասում է՝ այդ պարտականությունը չպետք է լինի մարդու՝ իր միջոցների հաշվին, որովհետև եթե այդպես է լինում, դասական իմաստով վերածվում է հարկադիր պատվաստման գործընթացի, մարդիկ սուղ միջոցներ ունենալու պատճառով ստիպված են լինում կանգնել պարտադրանքի առջև։

Նա նաև ասել է, որ հարց կարող է առաջանալ՝ ո՞ւմ վրա է դրվելու «իր հաշվին» պարտականության փոխարեն ձևակերպումը՝ գործատուի՞, թե՞ Հայաստանի Հանրապետության։

«Իմ կարծիքը միանշանակ այն է, որ պետք է դրվի Հայաստանի պետական բյուջեի միջոցների վրա։ Տրամաբանությունն էլ ինչումն է՝ ՀՀ պետական բյուջեն ունի բավարար հնարավորություններ և միջոցներ, ոչ ոք թող չփորձի հակառակը մանիպուլացնելով կամ այլ ձևով հանրությանը ներկայացնել։  Պետական միջոցները բավարար են առավել քան, հետևաբար այս պարտականությունը որևէ այլ հասցեատիրոջ վրա դնելն ուղղակի աբսուրդային իրավիճակ է առաջացնելու»,- ասել է Վարդևանյանը։

Նա նաև հարցադրում է արել. «Հիմա այդ ողջ գումարները, որոնք ծախսել են քաղաքացիները, ի՞նչ հետևանք են ունենալու, արդյո՞ք ՀՀ կառավարությունը, որ մշտապես խոսում է ժողովրդի անունից, իբրև ներկայացնում է ժողովրդի լավագույն շահը, գումարները վերադարձնելու է»։

Արամ Վարդևանյանն ընդգծել է՝ պետությունն իրականում իր պարտականությունը թողել էր մարդկանց վրա։