Ձեր վստահելի աղբյուրը

Վանաձորի ավագանու անդրանիկ նիստում, որը մի քանի րոպե տևեց,  «Հայրենիք» խմբակցության անդամ Վահե Դոխոյանը ներկաներին շնորհակալություն հայտնեց, որ հարգել են ու եկել՝ մասնակցելու նիստին։

«Չգիտեմ, երջանիկ պատահականությամբ, թե՞ ոչ, այսօր Վանաձորի ազհաբնակչության մեծամասնության քվեն ստացած դաշինքի ղեկավարի ծննդյան օրն է։ Առաջարկում եմ ծափահարություններով շնորհավորել»,-ասաց Դոխոյանն ու նրա խոսքին հետևեցին բարձր ու երկարատև ծափահարություններ։

Անդրադառնալով Վարչական վերաքննիչ դատարանի՝ ավագանու նիստ գումարելու և քաղաքապետ ընտրելու արգելքին, «Հայրենիք»-ի ներկայացուցիչն ընդգծեց, ակնհայտ է, որ իշխող ուժը փորձում է խլել վանաձորցու քվեն։

«Այդ գործում իշխող ուժին աջակցում է վանաձորցու աջակցությունը չշահած «Լուսավոր Հայաստան»-ը։ Ընդամենը այսքանը։ Շնորհակալություն»,-խոսքն ամփոփեց նա։

Հիշեցնենք, որ դեկտեմբերի 5-ի ընտրություններից հետո հաղթանակ տարած «Մամիկոն Ասլանյան» դաշինքի ընտրացուցակը գլխավորող Մամիկոն Ասլանյանը ձերբակալվեց, ապա կալանավորվեց։
Նշենք, որ Վանաձորում ՏԻՄ համամասնական ընտրությունների արդյունքների վիճարկման հայցով դատարն է  դիմել «Լուսավոր Հայաստան» կուսակցությունը, ով բավարար թվով ձայներ չի ստացել ավագանու կազմում ընդգրկվելու համար։

Վերաքննիչ վարձական դատարանը որպես հայցի ապահովման միջոց արգելել է Վանաձորի ավագանու նիստ անցկացնել ու քաղաքապետ ընտրել։  Որոշումն ուժի մեջ է մտնում հրապարակման պահից ու ենթակա չէ բողոքարկման։