Ձեր վստահելի աղբյուրը

«Իմ նախագահության ժամանակ մենք հռչակել էինք կոմպլեմենտարության քաղաքականություն, բայց այն ժամանակ Ռուսաստան-ՆԱՏՕ հարաբերություններում Ռուսաստանն ավելի շատ ծրագրեր ուներ ՆԱՏՕ-ի հետ, քան մենք և ՌԴ-ՆԱՏՕ խորհուրդ կար»,- այսօր հրավիրված մամուլի ասուլիսում ասաց ՀՀ երկրորդ նախագահ Ռոբերտ Քոչարյանը՝ պատասխանելով ՌԴ-ՆԱՏՕ ներկայիս սրված հարաբերությունների մասին հարցին:

Նրա խոսքով՝ այդ լարվածությունը բերել է նրան, որ կոմպլեմենտարության հնարավորությունը շեշտակի նեղացել է, կամ ընդհանրապես գոյություն չունի և Հայաստանը պետք է հասկանալի կերպով կողմնորոշվի, թե ինչ է ուզում:

Շեշտելով, որ մինչ այս չի հասկացել Հայաստանի արտաքին քաղաքականության  տրամաբանությունը՝ Ռոբերտ Քոչայանը բերեց վերջերս ԱՄՆ-ի կազմակերպած Ժողովրդավարության համաժողովի օրինակը:

«Ակնհայտ է, որ սա հակառուսական և հակաչինական ծրագիր է: Մենք այստեղ ի՞նչ ունենք: Ինչ-որ մի 3 րոպեանոց անբովանդակային, անհասկանալի ելույթի համար մենք մտել ենք մի ֆորմատի մեջ, որը քո ռազմավարական դաշնակցի, որը քո երկրի սահմանների անվտանգությունն է ապահովում, մենք այդ երկրի դեմ կազմակերպված միջոցառման ինչի՞ ենք մասնակցում»,- նկատեց ՀՀ  երկրորդ նախագահը՝ շեշտելով, որ ինքը չունի դրա բացատրությունը:

Նրա խոսքով՝ միջոցառումը փորձ էր վերակենդանացնել մի տրենդ, որը ժամանակին ԽՍՀՄ-ը փլուզվելուց հետո բավական հզոր ներուժ ուներ և այն ժամանակ միտքն այն էր, որ ամբողջը ժողովրդավարացնելով ավելի կանխատեսելի ու անվտանգ աշխարհ ունենալ, սակայն դրան հաջորդեցին աղետալի հետևանքներով գունավոր հեղափոխություններ:

«Եղավ արաբական գարունը, եղավ ներխուժումն Իրաք, Աֆղանստան ևս աղետալի հետևանքներով, եղան Գուանտանամոյի խոշտանգումները: Այդ միֆին մարդիկ այլևս չեն հավատում և հիմա այս ամենը մի կողմ դրած, մենք դուխով մտել ենք ներկա ստանալու համար: Աշխարհը փոխվել է, չի կարելի»,- ասաց Ռոբերտ Քոչարյանը:

Ըստ ՀՀ երկորդ նախագահի՝ Արևմուտք-Ռուսաստան հարաբերություններում սրումը երբ ուժեղանա և ծայրահեղ դրսևորումներ ստանա, այն ժամանակ Հայաստանին կարող են ոտքի տակ գցել, եթե չունենանք ուժեղ բանակ և ամուր անվտանգային համակարգ:

Անդրադառնալով Անդրկովկասում ՌԴ քաղաքականությանը՝ Քոչարյանը շեշտեց. «Բավական երկար ժամանակ ՌԴ-ն հասկանալի հեռավորություն է դրսևորել Հայաստանի ու Ադրբեջանի նկատմամբ, ինչը իսկապես ՌԴ շահերից է բխում: Իրենք հույս ունեին, որ իրենց ազդեցությունը նաև Ադրբեջանի նկատմամբ չի նվազի»:

Նրա խոսքով՝ այս պատերազմից հետո իրավիճակ է փոխվել Հարավային Կովկասում, որը կարելի է բնութագրել տարածաշրջանի աշխարհաքաղաքական վերափոխում:

«Երբ Թուրքիան միացավ այս ամենին և Թուրքիա-Ադրբեջան տանդեմը լրիվ այլ բնույթ ստացավ, այլևս հավասար հեռավորություն պահել Հայաստանի ու Ադրբեջանի միջև և՛ դժվար է, և՛ ես համոզված եմ, որ նաև մի քիչ անհասկանալի է հայկական կողմի համար և չեմ կարծում, որ երկարատև առումով դա լավ բանի կարող է բերել, բայց այդ ձևաչափը դեռ չի փոխվել»,- ասաց Ռոբերտ Քոչարյանը  և, նկատելով, որ Ռուսաստանի կյանքը դժվարացել է այս ամենից հետո, որովհետև իրենց համար  հավասարակշռված քաղաքականությանը նոր տարր է ավելացել, շարունակեց.

«Իրենք դեռ չեն ադապտացրել իրենց գործունեությունն այդ նոր էլեմենտի հետ: Թուրքիայի դերը շեշտակի աճել է և շարունակելու է աճել: Ես ակնկալում եմ, և համոզված եմ, որ Ռուսաստանի ԱԳՆ-ն երևի մշակման մեջ են, հաշվարկներ անում են: Բայց մենք չենք կարող ՌԴ-ից պահանջել, որ ավելի հայ լինեն, քան մենք: Մենք որպես դաշնակից երկիր պետք է չկորցնեինք մեր կարգավիճակն այս տարածաշրջանում»:

ՀՀ երկրորդ նախագահը նշեց, որ Հայաստանը կորցրել է ամենամարտունակ բանակ ունեցող երկրի կարգավիճակը, ստացել ենք մի կարգավիճակ, երբ անընդհատ պաշտպանության կարիք ունենք:

Նա նկատեց, որ գործող իշխանությունների օրոք երկրի կշիռը փոքրացել է և այս ամենի հետ միասին վերջիններս անհասկանալի ինչ-որ ձևաչափերի մեջ են մտնում:

«Գիտեք, մարդու շորի վրա մի կոճակ կա, որ չես օգտագործում: Օրինակ վերնաշապիկի վերևի կոճակը, շալվարի վրա էլ այդպիսի կոճակներ կան: Եթե դու քեզ հասցրել ես այդ կոճակի կարգավիճակին, բայց մտնում ես նման պրոցեսների մեջ, ինչ ասեմ»,- նկատեց Քոչարյանը և հավելեց. «Դու չպետք է գլուխդ կորցրած թռնես մի վագոնի մեջ, որը ուրիշ տեղ է տանում: Դա որևէ աղերս չունի քո ՀԱՊԿ-ի, ԵԱՏՄ-ի մասնակցության հետ, հիմա դու կողմնորոշվիր՝ դու որտե՞ղ ես: Իհարկե, բալանսը պետք է պահել, բայց արդյոք այն մարդիկ, որոնք պետք է այդ բալանսը պահեն, հասկանում են, թե այդ բալանսն ինչ է»:

Նա նաև ասաց, որ իշխանությունների քայլերը ակնհայտ թուրքական շահերի սպասարկում է և հարց հնչեցրեց. «Ինչու՞ են դա անում, իրենց համոզմո՞ւնքն է, թե գաղտնի ներգործություն է: Ես մի անգամ ասել եմ, որ եթե ՀՀ ղեկավարը լիներ Թուրքիայի գործակալ, կաներ ճիշտ այս քայլերը»: