Ձեր վստահելի աղբյուրը

«Ես առնվազն 13 տարի իշխանության մեջ չեմ և մի քիչ դժվար է լիքը բաների մեջ մեղադրել, եթե հեշտ լիներ, այս պարտությունը, 44 օրյա պատերազմն, ամեն ինչն ինձ վրա կբարդեին»,-տարեվերջի իր ասուլիսում նշեց ՀՀ երկրորդ նախագահ Ռոբերտ Քոչարյանը՝ պատասխանելով ներկայիս իրավիճակի համար իր պատասխանատվության և նախկին պետական ծառայողների զգալի մասի՝ գործող իշխանությունների հետ համագործակցության վերաբերյալ հարցին:

Նա նկատեց, որ պետական համակարգից գործող իշխանությունը քարը քարի վրա չի թողել և հիմնականում պատվեր կատարողներն այն մարդիկ չեն, որոնք իր ժամանակ են կայացել:

Ռոբերտ Քոչարյանը հայտարարեց, որ իր պաշտոնավարման ընթացքում կրթական ոլորտում  բարեփոխումների ամենամեծ ծավալն է արվել, որը պետք է բերեր զգալի արդյուքնքների, որը, իշխանության եկածների սերնդից դատելով, չի կարելի ասել, որ ապահովվել է և չի կարող ասել, թե ինչն է պատճառը:

«Կրթությունն ու մշակույթը պետք է քո ինքնության մեջ ձևավորեին հզոր կապ հողի հետ: Երբ հողից կտրվում ես, միայն բարձրագույն արժեքը քո ընտանիքն է, ապա դու ունենում ես այն վիճակը, որ ունենք այսօր: Սկսում է աշխատել «որտեղ հաց, էնտեղ կաց» բանաձևը, հողերի ու սարերի կորուստը չես ընդունում  որպես սպառնալիք քո ընտանիքին: Պետականությունը  շատ փոքր տեղ է զբաղեցնում մեր մեջ»,-շեշտեց ՀՀ երկրորդ նախագահը:

Անդրադառնալով հարցին, թե հնարավոր է իր իշխանության գալուց հետո չեղարկի նոյեմբերի 9-ի փաստաթուղթը՝ Քոչարյանը պատասխանեց. «Այդ փաստաթղթի բոլոր վատ կետերն իրականացված են, և որևէ ողջամիտ մարդ չի գալու ու ասի՝ չեղարկենք այս փաստաթուղթը»։

Նկատելով, որ նոյեմբերի 9-ի համաձայնագրից միայն չի կատարվել գերիների վերադարձի կետը՝ Քոչարյանը ենթադրեց, որ այն չեղարկելով՝ ասելու են, որ հայկական կողմը գերիներին չեն ուզում, որովհետև այն միակ իրավական փաստաթուղթն է, որտեղ ռազմագերի բառն է օգտագործված։

Երկրորդ նախագահը նկատեց, որ Բրյուսելում շոկային իրավիճակ էր, քանի որ ռազմագերի բառը չօգտագործվեց։

Նրա խոսքով՝ պետք է ձգտել վերականգնել Արցախի Հանրապետության տարածքի ամբողջականությունը։

«Այդ ուղղությամբ պետք է քայլեր անել, գոնե մի մասը չի կարող հաջողությամբ չիրականացվել։ Ամեն օր քայլ կատարելով, քարը քարին դնելով, հնարավոր չէ, որ դու ինչ-որ տեղ, ինչ-որ ժամի հաջողություն չունենաս»,-ասաց Ռոբերտ Քոչարյանը և նկատեց. «Ամենից վատ բանը չփորձելն է, կյանքում ոչինչ չանելն է։ Ամենից շատ քարոզարշավի ընթացքում խանգարեց այդ հանգամանքը, որովհետև իմ մեջ, Դաշնակցության մեջ, մյուսը՝ Սյունքը, որն ավելի մարտական էր տրամադրված, տեսել էր ուժի, որը կարող է փորձել ինչ-որ բան փոխել, ինչի վտանգավոր հետևանքը կարող է լինել պատերազմը։ Պատերազմից սարսափած ժողովրդի մոտ դա ազդեց, և ամենամեծ գործոնն էր, որն ազդեց ընտրությունների վրա»։

Նրա խոսքով՝ այսօր հասարակությունը տեսնում են, որ անվտանգային հարցերը լուծված չեն, և հարցումներով 70-80 %-ը այդ հարցը համարում են առաջնահերթ:

«Բայց պատերազմի սարսափը մի տարբերակ է, որը պահելով ժողովրդի գլխին կարելի է գնալ մեր շահերից չբխող տարբեր լուծումների՝ այդ սարսափը պահելով։ Սա է ամենամեծ խնդիրը, որը պետք է հաղթահարենք, հակառակ դեպքում մենք միշտ կլինենք զիջողի դերում»,-ասաց ՀՀ երկրորդ նախագահը։