Ձեր վստահելի աղբյուրը

«Կարծում եմ՝ իշխանությունները կգնային ընտրություններին, եթե վստահ լինեին, որ կհաղթեն։ Չեն գնացել ընտրությունների, որովհետև գիտակցում են, որ Երևանում կունենան լրջագույն պրոբլեմ և Երևան քաղաքում չեն կարող նույն մոդելը կիրառել, ինչ Վանաձորում, Գորիսում կամ մեկ այլ տեղ։ Միշտ մայրաքաղաքն ավելի ըմբոստ է եղել», -ասաց Ռոբերտ Քոչարյանը՝ շեշտելով, որ եթե անցկացվեն ընտրություններ՝ անպայման մասնակցելու են։

Նրա խոսքով՝ Երևանի նոր քաղաքապետի ընտրությունը լեգիտիմ չէ և պետք է քաղաքապետի ընտրություններ անցկացվեն: 

ՀՀ երկրորդ նախագահը, տեղեկացնելով, որ իր թիմում չեն քննարկել և չի կարող ասել, թե քաղաքապետի ընտրություններին մասնակցելիս ով կլինի իրենց թեկնածուն՝ ասաց. «Եթե լինեն ընտրություններ՝ գտնելու ենք այն թեկնածուին, որը երևանցիների կողմից ընդունելի և ընկալելի կլինի»։

Նա նկատեց, որ կալանավորումների այն քանակը, որն այսօր է, երբևիցե որևէ իշխանության օրոք չի եղել, իսկ իշխանությունը հրաժարվեց այն սկզբունքից, որի դրոշների ներքո եկել էր իշխանության։

Նա հետաքրքիր համարելով Հայկ Մարությանի ելույթը՝ շեշտեց. «Երբ մենք ենք դա ասում, ընկալումը մեկն է, երբ իրենց թիմի կարկառուն ներկայացուցիչն է ասում, արժեքը՝ ուրիշ է, բայց նոր բան չասաց։ Ինչ կատարվում է կալանավորումների վերաբերյալ, խայտառակություն է։ Առաջինը՝ խոսքի ազատության քրեականացումն է, սա այն ձեռքբերումն էր, որը, իսկապես, կարելի է ձեռքբերում համարել ժողովրդավարացման գործընթացում, և կալանավորումների այն քանակը, որն այսօր է, երբևիցէ որևէ իշխանության օրոք ուղղակի չի եղել»։

ՀՀ երկրորդ նախագահի խոսքով՝ իր նախագահության օրոք ուժային կառույցները ՏԻՄ մարմինների աշխատանքին երբևէ չեն մասնակցել և չի նստել ու ասել թե ով՝ ինչ պետք է անի: 

«Այն ժամանակ վարչապետն Անդրանիկ Մարգարյանն էր, որը կուսակցական էր, և կար շատ բնական ցանկություն կուսակցության կողմից մասնակցելու ամեն տեղ, ես միշտ զսպում էի, և ասում՝ նայեք, սա ՏԻՄ ընտրություն է, ով էլ ընտրվի, ցանկանալու է իշխանության, կառավարության հետ լավ հարաբերություններ ունենալ, ով էլ ընտրվի, պետք է սկզբից էլ համարել, որ մեր բարեկամն է լինելու, և պետք է ազատ թողնել, որ ընտրվի այն մարդը, որը մեծ հեղինակություն է վայելում այդ համայնքում»,-ասաց Ռոբերտ Քոչարյանը։

Նրա խոսքով՝ իշխանությունը հանցանք է կատարում, բայց այդ հանցանքը կատարելիս հանցակից է դարձնում բազմաթիվ պաշտոնյաների։

Շեշտելով, որ գալու է պահը, որ բոլոր հանցակիցները  պատասխան են տալու ապօրինությունների համար՝ Ռոբերտ Քոչարյանն ասաց.«Ենթադրում եմ՝ հրահանգ տվողը թռնելու է, իր մոտ լավ է ստացվում, բայց մյուսները մնալու են։ Ոչինչ այնքան չի մտերմացնում մարդկանց, որքան համատեղ գործած հանցանքը»։

Նա ապօրինություն կատարելու հրահանգ ստացողներին հորդորեց չգնալ նման քայլերի, իրենց համար գիծ քաշեք, որովհետև գալու է պահը, որ պատասխան են տալու։

Եվ, առհասարակ, այս ամեն ինչի վերջը շատ վատ է լինելու որոշ մարդկանց համար»,-շեշտեց Ռոբերտ Քոչարյանը:

ՀՀ երկրորդ նախագահի որդին՝ Լևոն Քոչարյանն իր ֆյսբուքյան էջում հրապարակել է ասուլիսում Ռոբերտ Քոչարյանի հնչեցրած հիմնական մտքերը.

1․ Անվտանգության համար այս տարին կատարյալ ձախողում էր: Մենք կորցրել ենք վերահսկողությունը ոչ թե 40-45 կմ-ի, այլ՝ տասնապատաիկ ավելի մեծ տարածքների նկատմամբ: 

2․ Տարվա ընթացքում ոչինչ չի արվել բանակի մարտունակությունը բարձրացնելու համար: Երկու-երեք դիրքի համար մարտական գործողություններում 30-ից ավելի ռազմագերի ունենալը խոսում է բանակում լրջագույն պրոբլեմների մասին։  

3․ Մինչ օրս չի հրապարակվել պատերազմում զոհվածների թիվը․ պետք էր հուշամատյան կազմել՝ նրանց բոլոր տվյալներով։ Սա պետության վերաբերմունքը կլիներ զոհվածների և նրանց ընտանիքների հանդեպ։ 

4․ 2018 թ․ կախարդական փայտիկը, պարզվում է, ռեվերսի ռեժիմով է աշխատում։ Պետական պարտքն անցել է 9 մլրդ դոլարի սահմանը։ 2022թ-ին կանխատեսվող 4 տոկոսանոց տնտեսական աճի զգալի մասը պայմանավորված է պարտքի մեծացմամբ։

5․ Պետության բարձրագույն արժեքը՝ մարդը, փախչում է երկրից։ Արդեն 103 հազար մարդ լքել է երկիրը․ մոտավորապես մի քաղաքի բնակչություն։

6․ Հայաստանը դադարել է լինել ժողովրդավար պետություն, քանի որ դադարել է լինել իրավական պետություն։ Ժողովրդավարության ենթադրյալ բաստիոնից երկիրը դարձել է տգիտության և իրավական բեսպրեդելի բաստիոն։ 

7․ Հայաստանը ձեռքերը լվացել է Արցախից․ ՀՀ ղեկավարը կասկածի տակ է դրել ԼՂՀ անկախության հռչակագիրը, ինչի վրա ձևավորվել է ԼՂՀ-ն։ Հայաստանի առաջին դեմքն ասում է, որ ինքը չի տեսնում Արցախի որևէ կարգավիճակ Ադրբեջանի կազմից դուրս։

8․ Քի Վեստի պայմանագրով նախատեսված էր Արցախի միացումը Հայաստանին, լինելու էր 42 կմ լայնությամբ միջանցք նույն կարգավիճակով, ինչ կունենար Արցախը։ 

9․ Դելիմիտացիայի այլընտրանքը պարզապես այդ պրոցեսին չգնալն է․ առանց երկկողմանի դիվանագիտական հարաբերությունների դելիմիտացիան չեն սկսում։ Դա դիվանագիտական այլասերություն է։ 

10․ Հայաստանն իրականացրել է Թուրքիայի բոլոր նախապայմանները, այն էլ բոնուսով․ տվել է Շուշին ու Հադրութը, հիմա էլ քննարկում են միջանցքի հարցը։ Երբ որ ՀՀ իշխանություններն ասում են, որ պատրաստ են Թուրքիայի հետ հարաբերություններ հաստատել առանց նախապայմանների, ավելի մեծ երեսպաշտություն դժվար է հորինել։ 

11․ Պետք է ձգտել վերականգնել գոնե ԼՂԻՄ-ի տարածքային ամբողջականությունը․ ամենավատ բանը չփորձելն է։ Ես հավատում եմ, որ ամեն օր քայլ անելով, ամեն օր քարը քարին դնելով, հնարավոր չէ ինչ-որ տեղ, ինչ-որ չափով հաջողություն չունենալ։ 

12․ Լեռնային Ղարաբաղի մասնակցությամբ Մինսկի խմբի շրջանակներում վերջին բովանդակային քննարկումը եղել է 1996 թ․ հոկտեմբերին։ 1997 թ․ հունվարին ՄԽ համանախագահները որոշել են գումարել նիստ, որի վերջին օրը հայտարարել են, որ անցնում են չելնոկային դիվանագիտության։ 

13․ Եթե լինեն Երևանի ավագանու նոր ընտրություններ, անպայման մասնակցելու ենք։ Իշխանությունները չգնացին ընտրությունների, որովհետև գիտակցում են, որ այստեղ կունենան լրջագույն խնդիրներ, չեն կարող կիրառել նույն մոդելը, ինչ Վանաձորում կամ այլ տեղ։ 

14․ Քրեական օրենսգրքի մեղադրանքներով մի մեծ ուսապարկ շալակած՝ այս մարդիկ ման են գալիս։ Միգուցե սա ինքնանպատակ է դարձել իշխանությունը պահելու համար։ Նրանք վախենում են ու ճիշտ են անում։ Չես կարող այս աղետը բերել քո երկրի ու ժողովրդի գլխին և չվախենաս, հնարավոր չէ։ 

15․ Ես կողմնակից եմ կիսանախագահական կառավարման մոդելի, բայց դեմ եմ, որ այս ճանապարհով մտնեն սահմանադրական բարեփոխումների մեջ։ Կա լրջագույն կասկած, որ այս ամենն այլ նպատակ ունի․ հնարավորություն ստեղծել ևս ինչ-որ մի տեղ տեղավորվելու»։