Ձեր վստահելի աղբյուրը

Անցած տարի տնտեսական անկումը եղել է 7.4%, Կենտրոնական բանկի գնահատականով՝ այս տարի  կանխատեսվում է 4.2 տոկոս տնտեսական աճ, իսկ այն, ինչ կլինի դրանից ավելի, ուղղակի նկարած է լինելու։ Այս մասին տարեվերջյան ասուլիսում հայտարարեց ՀՀ երկրորդ նախագահ Ռոբերտ Քոչարյանը։

Նրա խոսքով՝ նույնիսկ 2019 թվականի ցուցանիշներին հասնելու համար պետք է այս տարի ապահովեին ավելի քան 8 տոկոսանոց աճ. «Չենք ապահովել, վստահ եմ, որ հաջորդ տարի ևս չենք չենք ապահովելու, և ստացվելու է՝ 2020-2022 թվականները լինելու են տեղում կանգնած տարիներ»։

ՀՀ երկրորդ նախագահը հիշեցրեց, որ 2018 թվականին «կախարդական փայտիկի» մասին արվում էին հայտարարությունները.

«Հիմա պարզվեց, որ այդ փայտիկը ռևերսի ռեժիմով էր աշխատում, դա ոչ թե մեր տնտեսությունը մեծացնելու, ժողովրդին հարստացնելու համար էր, այլ ճիշտ հակառակը՝ աղքատացնելու և տնտեսության ծավալները փոքրացնելու կախարդական փայտիկ էր»:

Ռոբերտ Քոչարյանը նշեց, որ պետական պարտքն անցել է 9 մլրդ-ից՝ միայն վերջին երեք տարում աճելով 2.3 մլրդ դոլարով։ Ուստի, ըստ նրա, 4 տոկոսանոց կանխատեսվող տնտեսական աճի զգալի մասը պայմանավորված է պարտքի մեծացմամբ։ «Այլ բացատրություն չկա»,- ընդգծեց նա։

Անդրադառնալով գնաճին՝ ՀՀ երկրորդ նախագահն ասաց, որ պաշտոնական թվերով այն կազմում է 9.6%, սակայն դրա արժանահավատությունը կասկածի տակ է.

«Ես տասը տարի նախագահ եմ եղել և չեմ պատկերացնում՝ ինչ պետք է անես, որ ունենաս 9.6% գնաճ։ Միջին գնաճը եղել է 2-3%: Նման գնաճի պարագայում որպես պետություն դու պարտավոր ես ինդեքսավորել թոշակները և աշխատավարձերը, ինչը չի արվում, և ինչպես ես հասկանում եմ՝ չի էլ սպասվում»։

Նրա խոսքով՝ այս իշխանությունը շփոթել է երկնիշ թվերը գնաճի և տնտեսական աճի միջև։
«Տեղերը փոխվել են։ Պետք է լիներ հակառակը, երկնիշ թվերով պետք է աճեր ոչ թե գնաճը, այլ՝ տնտեսությունը։ Մենք կարիք ունենք լրիվ այլ տնտեսական աճի տեմպերի, հակառակ դեպքում մեր անվտանգային հարցերը որևէ կերպ հնարավորություն չենք ունենա լուծելու», - ընդգծեց Ռոբերտ Քոչարյանը։

Նա նկատեց, որ այս տարվա ընթացքում նաև պարզվեց, միլիարդավոր դոլարների ներդրումային ծրագրերը միֆ էին, լկտի սուտ։

«Այս մի քանի տարվա ընթացքում մարդկանց ավելորդ, չհիմնավորված լավատեսություն էին հաղորդում, ինչի պատճառով մարդիկ մտել են մեծ սպառողական վարկերի բեռի տակ, և այսօր մենք կանգնած ենք լրջագույն պլոբլեմների՝ վարկային փաթեթների անորակ լինելու առջև: Մեծ է հավանականությունը, որ ունենալու ենք ճգնաժամ այդ սպառողական վարկերի սպասարկման տեսանկյունից»,- ասաց Ռոբերտ Քոչարյանը՝ հավելելով, որ այդ ճգնաժամը շրջանցելու համար  Կառավարության և Կենտրոնական բանկի կողմից անհրաժեշտ են լրջագույն քայլեր։

Անդրադառնալով սոցիալական խնդիրներին՝ ՀՀ երկրորդ նախագահը նշեց, որ կառավարության հիմնական խնդիրը պետք է լինի ժողովրդի կենամակարդակի բարձրացումը, մինչդեռ այս տարվա ընթացքում աղքատության թիվը միայն աճել է։

«Միայն սա բավարար է ասելու, որ ոչինչ չեք արել։ Միգուցե փորձել եք, բայց, ըստ էության, որևէ արդյունքի չեք հասել, քանի որ ժողովրդի կենսամակարդակն իջել է, աղքատության թիվը կլինի 27-30%։ Դրան զուգահեռ աճել է պետական ծառայողների վերնախավի բարեկեցությունը։ Անամոթ ձևով պարգևավճարները շարունակում են գոյություն ունենալ և մենք տեսնում ենք, թե ինչպիսի ծախսեր է արվում թիկնապահների, դաչաների, լիմուզինների, պադավատների, ճոխ ճամփորդությունների համար։ Մի արտահայտություն կա՝ «քեֆը ժանտախտի ժամանակ», և այս ամենն ինձ մոտ այդպիսի տպավորություն է թողնում»,- նշեց Ռոբերտ Քոչարյանը՝ հավելելով, որ ակնհայտ է՝ հարուստների և աղքատների միջև այդ բևեռացումը միայն խորացել է այս տարվա ընթացքում։