Ձեր վստահելի աղբյուրը

«Այո, Փաշինյանը վերջին ասուլիսում ասել է՝ Արցախն Ադրբեջան է, ու վերջ, լկտի ստելով, թե 2016 թվականից հետո, իբր, այդ հարցն անբեկանելի էր և Ադրբեջանի կազմում Արցախի մնալու հարցն արդեն կանխորոշված էր»,- «Հայելի» մամուլի ակումբում հատնեց ռազմական փորձագետ Դավիթ Ջամալյանը և հիշեց՝ Արմեն Աշոտյանը բանակցությունների ողջ տրամաբանության մասին տեղեկացրել էր, որը հակառակն է փաստում:

Ջամալյանը պնդեց՝  թիվ մեկ մարդը, որը կարող է հերքել այդ կեղծիքը, հենց Փաշինյանի կիրթ գործընկեր Իլհամ Ալիևն է, որը 2016 թ. հոկտեմբերին հայտարարել էր՝ փակ դռների հետևում իրեն ստիպում են ճանաչել Արցախի անկախությունը:

Փորձագետը նկատեց, որ Ալիևի այդ մտքի ակտիվ շրջանառմամբ ադրբեջանական պետական մամուլն այն ժամանակ փաստում էր, որ բանակցային սեղանին շատ սուր դրված էր Արցախի ճանաչման հարցը:

Նրա խոսքով՝ 2016 թվականի ապրիլյան պատերազմի ժամանակ Արցախի սահմանը վերահաստատվեց և պետք էր ռազմի դաշտում ձեռք բերված հաղթանակը փոխակերպել դիվանագիտական հաղթանակի և պատահական չհամարեց, որ ապրիլյան պատերազմին հաջորդեցին Վիեննայի և Սանկտ Պետերբուրգի պայմանավորվածությունները:

Ռազմական փորձագետը հայտնեց, որ դրանից հետո բանակցությունները տարվում էին այն ուղղությամբ, որ հայկական կողմը Արցախը պահեր 12 ,000 ք/մ տարածքով:

Նկատելով, որ կապիտուլյանտը կանխատեսելի էր՝ Ջամալյանն ասաց. «Այդպես էլ պետք է լիներ, գալու էր պահը, երբ նա իրեն բնորոշ մանիպուլյատիվ ոճով սկսելու էր զարգացնել Արցախը վերջնականապես Ադրբեջանին հանձնելու ստոր, ազգադավ նպատակի մասին»:

Փորձագետի կարծիքով՝ այդ դավաճանական թեման առաջինը բարձրաձայնել են Փաշինյանի աջակից զանգվածի այն ներկայացուցիչները, որոնք կորցնելու բան չունեին, որից հետո Փաշինյանն է Արցախի հանձնման գաղափարը զարգացնում՝ իր մանիպուլյատիվ ոճով:

«2021թ-ը ես խայտառակ կբնութագրեի, քանի որ մեր ժողովրդի բարոյահոգեբանական անկումն այնքան է, որ այս կապիտուլյանտական, դավաճանական ռեժիմը վերարտադրվեց»,-անդրադառնալով ներքաղաքական զարգացումներին՝ ասաց Դավիթ Ջամալյանը և փաստեց, որ ԱԺ ընտրությունները խոսում են այն մասին, որ հանրության բարոյահոգեբանական անառողջ մթնոլորտը բոլոր կարմիր գծերը հատել է:

Նրա խոսքով՝ ԱԺ ընտրություններում կատարվեց այն, որը չէր կարող կատարվել, եթե հասարակությունը բարոյահոգեբանորեն լիներ հասուն և առողջ:

«Տեղական ինքնակառավարման ընտրություններին որ նայում ենք, տեսնում ենք՝  հասարակությունը նիկոլական թմբիրից դուրս է գալիս, սթափվում է և այն փսիխոտեխնոլոգիաները, մանիպուլյացիոն տեխնոլոգիաները, որոնք կիրառվել են և այս աղետի գալուց՝ հեղափոխությունից առաջ դրանք այնքան էֆեկտիվ են եղել, որ հասարակության սթափվելու գործընթացը սպասվածից ավելի արագ է տեղի ունենում»,- ասաց Դավիթ Ջամալյանը և հավելեց, որ այսօր բոլոր սթափ գնահատող փորձագետները հաստատում են, որ ներկայիս ռեժիմն այլևս չունի հանրային հենարան, բացառությամբ որոշ ուժային կառույցների:

«Իշխանությունների անխուսափելի վերջի մասին են խոսում նաև վերջին բռնաճնշումները»,- հայտնեց ռազմական փորձագետը և Գառնիկ Իսագուլյանի ձերբակալումը կապեց այն փաստի հետ, որ նա առաջինն էր ճիշտ գնահատել հեղափոխությունից հետո առաջ եկած վտանգները և բարձրաձայնել այդ մասին:

Ըստ ռազմական փորձագետի՝ Իսագուլյանը կտրուկ խոսքի իր ոճով կարողացավ ասելիքը հասցնել ժողովրդին, ինչը չէր կարող չանհանգստացնել իշխանություններին: